透明人間: 拯救(下)
第九章 拯救 （下）
輝揚起來的時候已是早上差不多十時，發覺肥賓很祟拜看著自己：「揚少！依嗰袋裡面咁多錢嘅？你真係用一晚時間就攞到番嚟？你點做到架？」輝揚笑咪咪說：「尋晚賭場賭錢贏番嚟！講都冇人信！買乜開乜！可能上天真係被我感動左，知我用依畢錢嚟救達叔兩父子掛！」肥賓：「挑！有無咁好彩呀？早知尋晚我同你一齊去啦！黐下你D好運都好！」輝揚：「咪啦！你嚟一定搭沉船！嗰袋裡面唔止六十萬架！如果今次可以救番達叔全身而退嘅話，我地每人可以分番六萬蚊添……講番正經先！錢依家就有啦！聽日先係交手日子！我地依家可以做D乜？」肥賓：「講真！馬龍依嗰人我地真係惹唔起！唔好怪我……尋晚我掙扎左好耐究竟留唔留低！不過廢樣我發覺上次你爆頭單野，係我累到你差D命都冇！今次借達叔依單野我就一鋪還清俾你！以後冇拖冇欠啦……仲有馬龍條友仔真係冇乜人性架！據我所知，無論最後我地有冇俾到錢，佢條仆街都唔會咁輕易放人！今次真係九死一生！所以我尋晚係到諗！不如我地今日早D去！反正佢講左個地址俾我地聽，佢地實以為我地無咁快攞到咁多錢番嚟！到時可以殺佢地一個措手不及！就算唔係，都可以探下路……你話係唔係先？」輝揚：「你嘅計畫都唔錯！早一日救番逹叔佢地兩父子都好！不如我地暗中報警，有D支援好D喎！」肥賓：「絕對唔可以報警架！佢人脈好廣架！黑白兩道都有佢嘅人！俾佢知道我地報左警，你同達叔兩仔爺收定屍都得啦！」輝揚：「咁我又唔係好明啦？講到佢咁把炮，一定食開大茶飯架啦！佢點會為嗰區區六十萬同我地兩個蛋散玩得咁認真先？會唔會真係你諗多左呀？」肥賓：「你果然仲未撚明！佢份人出左名做野無邏輯架啦，估佢唔到架！話知你掙佢一蚊定六十萬 ！可能佢係想立個威信！要D人知道佢唔好惹，掙佢錢就一定要還！唔好講咁多！我去準備買D野！你就快撚D洗臉刷牙落樓下食個早餐先，一陣係酒店大堂到等！記住攞埋袋錢先好走！」
輝揚：「肥賓，頭先你䆒竟買左D乜？」肥賓神色凝重：「兩把生果刀，一把士巴拿，再加D開鎖工具羅！」輝揚驚訝說：「駛唔駛咁大陣仗……」肥賓：「唔好講咁多！拿！收埋把刀先，萬一陣間黃左，記住攞住嚟自保！」佢地一路行一路講，不知不覺已到了合生工廠大廈樓下……
另一邊廂，昨晚跟蹤輝揚的中年黑衣男人目送這兩個羔羊進入工廠大廈……
「龍哥，兩條蛋散上緊去啦！駛唔駛通知上面哨牙同大儍呀？」
「俊，唔駛啦！就睇下佢地兩個有幾多斤兩？嘿嘿……貓捉老鼠遊戲正式開始啦！」
輝揚：「舊式工廠D lift咁on9架！要自己生埋對門先識郁嘅？」肥賓：「挑！你咪重on9，都識講係舊式工廠攞！你唔拿係未搭過呀？喂！㩒五樓先！」「點解嘅？唔係六樓咩？」「依D工廠區格式大部份差唔多，去五樓睇下D格局先，之後再行樓梯上去保險D嘛！」
這時輝揚暗中運用佢既透視能力，看見大肉蟲肥賓在前面專心觀看五樓格局！這一層呈一直線分成左右各六個單位！可以說是十室九空！全層得二個單位是有人的，一個單位做紙紮，只見一位年紀老邁的婆婆低著頭專心摺金銀衣紙，而路旁放滿各種形形式式的紙紮品，另一邊是做印刷的，機器發出的聲響全遍整個樓層！工人正忙著包裝剛印好的報章雜誌，對輝揚和肥賓兩個陌生人視而不見……
肥賓：「睇嚟上面六樓都差唔多！不過大佬有成十二個單位喎！我地點撚知邊個係收埋達叔?個呀？條仆街講D唔講D！我地好難撞架喎！」輝揚：「你放心！我有辦法！上到佢自然會知架啦！」「真係？冇計啦！上去先算……」
到了六樓，果然不出所料！同五樓格局完全一樣！不同的只是整個六樓完全是水靜鵝飛，就好像是完全荒廢！不過看真點，B室單位出面裝了個土地位，而且是剛剛上了香！肥賓：「我估係依個單位掛？」這時輝揚運用透視能力窺看B室內?單位，看到的只是兩男一女，室內改建成住宅式單位，女的優閒坐箸梳化觀看電視，一男躺在床睡覺，一男玩著手中的智能手機，而並沒有發現達叔和明仔！「唔係！唔係依到！」「你又知？」輝揚沒有理會肥賓，努力搜尋逹叔和明仔的足跡，花了一段時間，終於在走廊盡頭F室單位有所發現，室內有兩個男人，一個坐在看色情雜誌，而另一個剛剛入了洗手間，而在一間房內，終於看到達叔和明仔的蹤影，只見達叔和明仔被人用繩反縛手腳，明仔可能太累早已在地上睡著，相反達叔神色疲累坐在地上看著熟睡中明仔……
輝揚：「殊！細聲D！係依嗰單位啦！肥賓！達叔同明仔都係裡面！」「點解你會知嘅？」「信我啦！我嘅第六感唔會錯」「好！我信你！咁依家點做好？點入去救人？咪住先……揚仔，你見唔見到地下有D外賣盒？我地不如一個扮送外賣，一個幫拖偷襲！」「好！就咁話！」
輝揚：「送外賣，開門唔該！」這時一把男聲開口應道：「外賣？好似無叫到喎！」只見這男人最大特徵上排牙齒完全外露，上下唇無法合上，俗稱哨牙 ，「依度係咪六樓F室呀？鮮茄豬扒意，干燒伊麵，兩杯冬檸茶少甜！多謝七十二蚊！」哨牙男轉身說：「唔通係大儍叫？大儍，係咪你叫外……」賣字都未講出口，肥賓從後用士巴拿一記打暈了哨牙男！輝揚：「仲有一個係厠所！」大儍：「哨牙仔，你講乜撚野話？我痾緊屎呀！」「……」「屌你！叫左人又唔出聲！」等了慢長的五分鐘，大儍終於從洗手間出來，正想大駡哨牙仔，這時肥賓從後拿著士巴拿照辦煮碗全力一擊打中大儍的頭上……
肥賓洋洋得意：「挑！兩條廢柴！」這時輝揚第一時間衝入房解開達叔和明仔的繩，大聲叫：「達叔，明仔！有乜野遲D先講，快D離開依度先！」
正當輝揚想帶著達叔他們離開時，他才發覺不知甚麼時候肥賓早己被五男二女挾持著……