突然做左人地老豆，多左個女: 59

話咁快又到左開學日，終於可以係幼稚園見到Yan啦！雖然拍拖之後，我地每一晚都會傾電話傾到訓，不過始終唔能夠見面，思念係一種需要通過接觸先會解決到既問題黎，所以我好期待今朝可以係幼稚園見到佢。
 
「傑哥哥！你睇下！」小貞跳下跳下咁走過黎，只見佢已經著好套校服。
 
不知不覺間，小貞已經由咩都唔識、怕怕羞羞咁，變到識自己換衫、成日都笑眯眯咁望住我，原來小貞已經慢慢咁長大，慢慢咁大個女啦……
 
「小貞大個女啦！真係好叻！」我豎起手指公讚道。
 
小貞被我讚一讚，又紅都面哂咁。
 


「小貞，記得今日放學之後，要帶喵喵去絕育呀！」我道。
 
除左小貞不知不覺咁長大之外，連喵喵都係，家姐提醒我係時候要幫喵喵絕育啦，所以我地預約左今晚帶喵喵去診所到絕育。
 
小貞輕輕咁抱起喵喵，摸下喵喵個頭仔話：「喵喵乖，喵喵都大個女啦！」
 
餵過喵喵之後，我地就手拖手咁返去幼稚園啦，一返到幼稚園，就見到Yan拖住瑜仔係到等緊我地。
 
係陽光之下，Yan笑得更加燦爛，「早晨！傑哥哥！」
 


「早晨！」我笑笑回應。
 
「咁多位早晨！」小貞同瑜仔都仲未打招呼，我地就已經聽到小海把聲。
 
「Julia，幫我拎啲手信俾佢地！」小海充滿傲氣咁講。
 
然後Julia就好聽話咁係佢個環保袋到拎左幾盒野，遞俾我地四個，我地接過一望，係朱古力黎。
 
「今個復活節假，爸爸媽媽帶左我去new york玩，呢啲係送俾你地既手信黎。」
 


我望住呢幾盒朱古力，就知道一定係貴野黎，總係覺得小海只係想炫耀一下自己去左外國旅行，而唔係真係想俾手信我地，屌！當初咁樣幫小海，搞到小海而家又變到咁，不過點都好，佢地既家庭關係好左，點都係一件值得高興既事黎。
 
「多謝小海！」小貞笑眯眯咁講，完全唔知小海既用意。
 
瑜仔突然默默咁將手上既朱古力俾埋小貞。
 
「你做乜野呀瑜仔？」小海問。
 
「我都唔鐘意食朱古力。」瑜仔呆呆咁答。
 
小海見自己既炫耀計劃唔成功，佢就嬲爆爆咁話：「哼！你地都唔識欣賞既！」
 
然後就粗粗魯魯、大步大步咁返入去幼稚園到啦。
 
最後小貞同瑜仔都入左課室之後，我同Yan就手拖手咁走啦。


 
「不如你送我去搭地鐵返工啦？」Yan甜笑道。
 
「好呀！」我笑笑回應。
 
我地十指緊扣住，Yan隻手真係又白又滑，手指又修修長長咁，我諗起嗰日同佢係床到對望既一刻，能夠做到佢男朋友，我真係覺得好夢幻、好幸福！
 
我望住佢，發現佢又望住我，我地相視而笑，然後我再將佢隻手捉緊一啲。
 
「點算呀？」我道。
 
「乜野點算呀？」Yan笑笑回應。
 
「之前成日都要掛住小貞，而家仲要掛埋小Yan。」
 


Yan聽到之後，再甜甜咁笑一笑。
 
「咁你呢？有無掛住男朋友仔？」
 
Yan用另一隻手撓埋我拖緊佢隻手到，然後成個身挨埋黎話：「我超級超級超級超級超級超級超級掛住我個男朋友仔！」
 
「邊個係你既男朋友仔？」
 
佢拍一拍我個手臂再講：「明知故問！」
 
然後我扮哂野咁鬆開佢隻手，「你唔講我真係唔知架！」
 
佢又好緊張咁撓返住我隻手，「咪係你囉傑哥哥！」
 
然後我又甜甜咁笑一笑，拖返住佢既手。


 
「我都係一樣啦，其實我以前無咩點掛住Alexis架，可能耐左感情始終都淡左，我只係會掛住瑜仔，但係唔知點解而家又會掛埋你……」Yan臉紅紅咁講。
 
我摸一摸Yan個頭，我就忽然發現，原來我地身高相差一個頭，我可以好舒適咁摸佢個頭。
 
「不過我希望我地係細水長流既愛情，而唔會變淡。」Yan深情地望住我道。
 
望住一個咁含情脈脈既眼神，係男人都會把持唔住，然後我一手攬住Yan條纖腰，另一隻手就輕輕咁撫摸佢既臉頰，佢對眼睛就慢慢咁合埋，我亦都配合佢，慢慢將個嘴唇拱埋佢個嘴唇到，再合埋眼，慢慢享受呢一種深情一吻。
 
今次，終於唔係蜻蜓點水啦。
 
我開始用舌頭係佢個嘴到打圈，Yan都慢慢咁配合我，我地就係條街到打茄輪，慢慢咁，小小傑都有啲反應啦。
 
Yan既長腿觸碰到小小傑，佢尷尷尬尬咁縮開隻腳，又尷尷尬尬擰轉塊臉。
 


我望一望佢，原來佢紅都面哂。
 
好啦，唔係再係街到搞埋啲咁既野啦，我地都係大人，唔係大學生啦，我重新拖返住Yan隻手，送佢去地鐵站。
 
「到啦。」Yan垂低頭，依然都係怕怕羞羞咁。
 
「嗯……好唔捨得你。」我忍唔住又攬住左佢。
 
「我都係……」
 
「好啦！今日既份量夠啦！我地要細水長遠架嘛！所以唔可以一次過用哂啲幸福！」
 
Yan笑笑回應，似乎好認同我既說話。
 
然後我輕輕咁錫左佢額頭一啖，「返工加油！」
 
「嗯！聽日再見！」
 
「咦！係喎！咁今日邊個湊瑜仔放學？」我忽然醒起。
 
「我阿姨會過黎湊瑜仔。」Yan笑得好開懷。
 
「做咩笑成咁？」
 
「好開心，你好關心瑜仔。」
 
我再摸摸佢個頭，「正傻妹！」
 
同Yan道別之後，我又返左屋企打理家頭細務，然後話咁快又到接小貞放學既時間，我今次放埋喵喵入去寵物袋到，接完小貞就可以直接去診所到幫喵喵絕育啦。
 
「喵喵……」喵喵入左袋之後好似好緊張咁，成日都喵喵咁叫。
 
接到小貞後，小貞聽到喵喵叫，佢又好溫柔咁對住喵喵講：「喵喵乖，好快可以返屋企架啦！」
 
到左診所，啲護士認得我地，就笑笑口咁講：「今次終於無賴屎咁過黎啦喎！」
 
我尷尬咁摸摸自己後腦。
 
入到去獸醫到，獸醫安撫左喵喵一輪之後，就開始動工啦，小貞又係眼甘甘咁望住獸醫，睇黎佢想做獸醫既夢想並未曾改變。
 
一諗到將來我老左，見到小貞成為左獸醫，幫無數小動物醫病、絕育，我都老懷安慰啦。
 
好快地，絕育手術已經完成啦，我叫小貞將喵喵放返入寵物袋到，我就去俾錢。
 
俾完錢之後我地行出診所無幾耐，喵喵竟然突然係個袋到走左出黎！
 
「呀！！！！」小貞好驚慌咁嗌。
 
喵喵聽到小貞一嗌，就更加係全速奔跑，我想追都追唔切。
 
小貞即刻由驚惶失措變到哇哇大哭，我望一望個寵物袋，原來小貞將喵喵放入去之後，並無拉好袋到既拉鏈，所以令喵喵成功偷走出黎。
 
我摸摸小貞個頭仔道：「小貞唔好喊住先，我地搵左喵喵先，佢應該唔會行到好遠啫！」
 
小貞擦擦眼睛，然後點點頭咁跟我去搵喵喵。
 
小貞好驚慌咁搵下啲後巷，又去裝下啲那隙咁，但係都係搵唔到喵喵。
 
「嗚……對唔住呀傑哥哥……都係小貞唔好……」小貞又忍唔住喊啦。
 
我抹下小貞啲淚水再講：「係小貞唔小心啫，小貞都唔想架……」
 
「哎呀！貓貓你食唔食餅餅呀？」
 
突然，我地都聽到有把阿婆既聲，阿婆咁樣講，喵喵有好大機會就係附近！
 
小貞聽到阿婆咁樣講，仲即刻提起左精神！
 
我地沿住阿婆把聲去搵，終於見到個阿婆同喵喵啦！
 
黑漆漆咁，真係喵喵黎！
 
「喵！」喵喵見到小貞，就即刻撲埋去小貞到。
 
小貞抱緊左喵喵，再喊住咁講：「嗚……喵喵……擔心死我啦……」
 
我摸摸小貞個頭仔道：「好啦！唔好再喊啦，再喊喵喵又走架啦。」
 
小貞聽到我咁講之後都慢慢咁無再喊，然後我地將喵喵擺返入袋到。
 
「多謝你呀婆婆！」小貞主動咁走去個阿婆到，好有禮貌咁講。
 
「小妹妹，你做乜要同我講多謝？隻貓明明係我養架喎！」但係阿婆居然好激動咁講。
 
小貞一臉無奈咁望住我，完全唔知而家係乜野狀況，需要我去解決咁。
 
「婆婆！呢隻貓係我地養架，佢叫喵喵。」
 
「喵喵？無理由架，我明明記得我尋日先接呢隻貓過黎住架喎！點會係你地養？」
 
「咁啦，你不如講下你自己隻貓外貌上有咩特別！」我道。
 
阿婆諗左陣再講：「係金黃色架……」
 
「係囉！喵喵係全黑色，又點會係你隻貓！」
 
阿婆聽到之後凝視左喵喵，佢終於都恍然大悟。
 
「真係唔好意思呀！我搞錯左！」阿婆道。
 
「唔緊要架婆婆！小貞有時都會記錯野！」小貞笑笑道。
 
「死啦……點解我會黎左呢到既……」阿婆再係到自言自語。
 
小貞皺哂眉，一臉擔憂咁望住個阿婆，「咁點算呀？婆婆唔洗驚，慢慢諗一定諗到既！」
 
然後我留意到，個阿婆身上有個牌，我走埋去拎左佢身上既牌一望，個牌到寫住左阿婆個名同地址，仲有寫住阿婆係有老人痴呆症既。
 
哦，原來係咁！
 
「婆婆，你身上有你既地址呀，等我送你返去啦！」
 
「點解我身上會有地址架？一定係俊仔個百厭仔亂咁放野係我身上啦！」阿婆嘮嘮叨叨咁講。
 
「係啦係啦，一定係咁啦！」我一邊扶住個阿婆，一邊拖住小貞，帶阿婆返屋企。
 
小貞拎住個寵物袋，溫柔咁對喵喵講：「喵喵乖，等我地送完婆婆返屋企，我地再返屋企啦！」
 
「俊仔係我個孫黎架！佢得八歲架咋！係大過小妹妹少少咁囉！但係佢真係好百厭架！成日去隔離屋搞破壞，搞到隔離屋個阿姐成日投訴我，話我唔識得教孫！」阿婆繼續講。
 
我點點頭回應。
 
「你點樣可以教到小妹妹咁乖既？可唔可以教下我呀？」阿婆道。
 
「阿婆，其實係小貞本身已經好乖，我都唔係太識架咋！」
 
「咁點得架！教細路一定要有耐心同愛心！點可以咩都唔識架！」阿婆又突然充滿精神咁教訓我。
 
「係既係既……」
 
小貞見我咁低聲下氣咁對阿婆，佢又格格聲咁笑我。
 
行到差唔多到阿婆既屋企，我地就見到有個後生仔係附近貼緊街招，我地走埋去一望，原來係尋人啟示黎，而且單張到張相，正正就係我身邊既阿婆！
 
個後生仔見到我地，都一臉驚訝咁，然後見到阿婆，就即刻連手上既街招都唔要，直接眼紅紅咁走去阿婆身邊。
 
「婆婆你突然間咁樣走左去，你嚇死我呀！」
 
「我咩突然間啫，我想去買雪條食啫嘛！」阿婆又突然咁講。
 
「你地好呀！我叫俊仔，係婆婆個孫黎，好多謝你地帶婆婆返黎呀！」個後生仔充滿謝意咁講。
 
原來阿婆口中八歲既百厭仔，就係眼前呢個廿幾歲既後生仔。
 
「希望你唔好介意我咁講啦，你婆婆有老人痴呆，真係要小心啲帶住佢呀！」我道。
 
「我知道，但係我唔想送婆婆去老人院，婆婆由細養到我大，佢從來都無嫌棄過我，到而家我大個左，我地能夠相處既日子愈黎愈少，我想好好珍惜，我想好好咁照顧返佢。」
 
諗唔到而家都仲有啲咁孝順既後生仔。
 
「不過你算醒目架啦，識係整個牌係阿婆身上掛住！」
 
「係呀，真係好多謝你地！」
 
「哥哥唔洗唔開心，婆婆佢無事！」小貞眼仔碌碌咁講。
 
後生仔聽到小貞咁講，佢破涕為笑，「好多謝你呀小妹妹！」
 
「我好肚餓啦！食得飯未呀？」阿婆突然係旁邊叫喊。
 
「食得啦食得啦！我地而家返屋企食飯！」
 
然後後生仔扶返個阿婆返屋企，臨走前再同我地講多句多謝。
 
「好啦小貞，我地都要返去食飯啦！」我道。
 
小貞點點頭，「傑哥哥！」
 
「嗯？」
 
「如果傑哥哥老左，小貞都會照顧你架！」
 
小貞突然咁講，搞到我真係好向左走向右走感動！！！我即刻攬實左小貞黎狂錫，搞到小貞又笑到格格聲咁！
 
小貞，我個乖女，我真係好愛你呀！！！