《今時今日，係香港生活，其實好難。》

《今時今日，係香港生活，其實好難。》


「未來外父同我講，想食雞髀，先儲好首期......」── 27歲文員 阿明

「(哭腔) 以為潮文先有得睇啫，點估到有朝一日真係發生係我身上？好彩女朋友都願意同我一齊儲錢。但香港樓價咁高，就算我夜晚打多份工，都起馬要儲多幾年先夠數，之後就要開始供樓，踏入房奴生涯、日捱夜捱，捱，唉......唉唉唉唉唉唉*2036......」



「香港人睇外表，樣生得唔好嘅女仔只可以靠自己。」── 28歲 Sales Eva





「係咪真係有男仔可以完全唔介意外表睇內在？係香港呢個乜都講求快嘅城市，第一眼印象其實就代表咗好多野，你一開始就pass唔到，邊有人會深究你內在係點？又係咪真係個個女仔都可以靠化妝就執返好？如果係就唔洗咁多明星去整臉整鼻啦。但香港自稱開放城市，對整容呢個觀念始終都係非常守舊，總之......下刪五千字。」



「旺角？幾年前就唔行啦。」── 20歲前 MK仔 阿俊 (自稱)

「假日行旺角？以前就會行下瓊華，而家？根本就無地方好行，講下條行人專用區，電訊商擺檔阻街呢個問題一直都無解決過。仲有啲檔根本唔知係為賺錢定為藝術。例如即影即有咁，以前一兩檔真係無乜野，但跟風開到半條街都係就真係過哂火囉。而家除非一大班人指定要出旺角食野唱k，唔係都唔去架啦。」







「有時個囝扭計想去遊樂場玩，都會好頭痛......」── 32歲人妻 Iris

「帶佢落公園就一定唔會滿足。但你知啦，因為自由行，假日去海洋公園、迪士尼一定好多大陸人，分分鐘排個旋轉木馬都去咗半日。至於閒日？就算個囝放假，我同老公都要返工啦。有時真係會懷念荔園，至少個陣嘅遊樂場真係屬於香港人。」



「每次都係返工先黎好天，放假先黎落雨。」── 25歲新入職文員Sam

「仲有放工先黑雨，放假先八號風球，所有野都好似默認咗咁。李氏力牆嘛，強國有天氣控制系統嘛。咁無計啦，去唔到郊區影相，咪行下商場囉，但你知啦，而家商場間間都係領匯嘅，行黎行去都係幾間鋪，食黎食去又係個幾味。唉，唔講啦，買咗飛一陣睇eason演唱會，好難先收到兩張黃牛飛。」







今時今日，住係香港嘅你地，又點睇呢個地方呢？到這裡留下想法吧。
http://www.facebook.com/photo.php?fbid=330655563732933&set=a.144899825641842.30425.119295764868915&type=1&theater