自修室，學界既蘭桂坊: 67

旅程完結，我地執拾好哂行李之後，就出發返去機場，返香港。
我地搭夜機返香港，所以搭飛機嘅時候，個個都瞓哂。
我唔係好眼瞓，我就拎返部相機出嚟睇相。
相機入面嘅相，有五個人一齊嘅，有肥鈞同Venus嘅，有我同Shirley嘅，有佢地三姊妹嘅。
望住佢地三姊妹嘅相，見到Shirley同Jojo，佢地都笑得好燦爛。
佢地兩個對於我嚟講，都係十分重要。
但自從當日喺櫻花樹下同Jojo嗰一吻之後，我個心已經屬於Jojo。

之不過理智又同我講，如果我喺呢一刻走去揀Jojo，就會深深咁傷害佢地之間嘅友情。張相入面嘅笑容就會消失。





我望住佢地張相，好苦惱，好苦惱。

「你唔洗理我架。」無啦啦有一把聲叫一叫我，係Jojo，原來佢醒咗。
「咩唔洗理你?」
「我知道你依家喺度諗緊咩，你千祈唔好諗住揀我，我係唔會接受架。」

我聽到Jojo咁講，我個心無啦啦嗱住嗱住…好痛。
「點解…你唔係話你想拍拖架咩…你唔係話你…咩我架咩?」
「我係呀，就係有你，我先知道原來同自己鍾意嘅人拍拖係咁開心架，我連我嘅初吻都俾咗你呀死嘢。」





佢講到咁，我真係唔知應該俾咩反應佢好…
「之不過，我地係唔可以一齊。」Jojo道。
「你諗下，你同我一齊，Shirley會點諗?我同佢係好好好好嘅朋友，我同你一齊，我同Shirley就一定無朋友做。」

「我依家係好想拍拖，但係愛情同友情比較，我會比較珍惜我同Shirley 六年嘅友情多啲，當然，同你嘅友誼我都會好好珍惜嘅。」Jojo講完笑一笑，搭一搭我膊頭。

Jojo可愛嘅時候係好可愛，但當佢成熟起上嚟，真係成熟得恐怖…
「其實我明…但係…」
「你明就得啦，唔準再講落去。」Jojo打斷我。
「嗱，我講嘅嘢就係咁多啦，喂，我地一齊睇相啦。」Jojo笑一笑，續道。





我拎住部相機，幫Jojo噤相嚟睇，Jojo睇得好入神。之不過呢一刻嘅我，已經無哂心情。

望住Jojo睇相個樣，忽然之間我醒起仲有張相未睇。
我即刻喺褲袋拎部電話出嚟，打開的士佬幫我地影嗰張相。

一片粉紅色嘅櫻花做背景，我地一齊坐喺張綠色嘅長椅上面，互相側住頭咁向對方送出深情嘅一吻，呢張相，靚過哂頭先睇嘅所有相。

「呢張相真係影得好靚。」我睇得好入神。
「我都覺呀，喂，send俾我吖。」Jojo道。
「你想要?」
「緊係，呢個係一個好好嘅回憶嚟…仲有呀，我嗰段發癲片，你都send埋俾我吖。」

我聽到佢咁講，我就即刻send俾佢。
Jojo收到我段片同相之後，就即刻開嚟睇，一路睇佢一路笑。




「哈哈哈，我真係好白痴呀。」

段片播到黑畫面，佢就噤停咗。
「呢度唔睇得，我真係太樣衰。」Jojo面紅紅咁講。
「車厘龜，呢張相同段片，我永遠都會好好收藏架。」
「嗯嗯，我都會。」望住佢，我又忍唔住，搣咗佢塊面豬墩一下。
「妖!!!嗱，今次俾你搣啦。」
「我地永遠永遠，都會係好好嘅朋友。」Jojo笑瞇瞇地道。


接下來嘅日子，機又打過哂，旅行又去完，日日喺屋企發瘟，我卒之都係俾老媽子叫咗去返暑期工。

我去咗一間賣哥爾夫球用品嘅運動鋪做售貨員，日日喺度罰企，望住自己毫無興趣嘅哥爾夫球用品，好悶，唔知係咪悶得濟，個人有啲痴痴地線，當無嘢做嘅時候，我就會拎部電話出嚟，喺度聽Jojo飲醉酒嗰段片。

我控制唔到自己呀，每次聽到呢句說話，我都會自己一個喺間鋪頭度傻笑。





但當段片播到去車厘龜，我仲係好鍾意你呀…呢句說話時，我個心都會喺度淌淚。
返咗成個月工，呢句說話我諗我足足聽咗上千次。

相思真係一種病嚟。

後來我見返工太悶，我就開始學人上youtube，上高登，睇到啲搞笑嘅短片或者搞笑嘅post，我就會用facebook inbox俾Jojo，我send俾佢嘅嘢佢全部都會睇，有時一齊笑，有時鬧我無聊，鬧我高登，鬧我毒。

有陣時我會send啲嚇人片俾佢，佢睇完，就會炸堆嬲嬲樣俾我，頂我妖我，然後佢就會唔睬我一日，雖然佢唔睬我，但係嚇到佢，見到佢堆嬲嬲樣就會令到我心情好爽快。

我每日都會send五六條link俾佢，但佢都唔會話我煩，唔會唔理我，唔知點解佢好似知道我好悶咁，所以我每次Send嘢俾佢嘅時候，佢都會秒回我。
可能，佢同我一樣，都係咁無聊掛。

多得佢，我先至捱到整個月苦悶嘅返工生涯。





放工嘅時候，Shirley會嚟接我放工，喺銅鑼灣返工嘅我，放工之後就會同Shirley去行街食飯，拍拖拍耐咗，我同Shirley之間好似已經無乜新嘅火花，依家又唔洗溫書，日日行街食飯，生活就係咁平淡，初戀嘅我睇嚟我要學下點樣維繫一段感情。

好快，今日就係七月十四日，咁就過咗個令月，呢個月入面無任何特別嘅事發生，我亦都無再見過的士佬，之不過，聽日就一啲都唔平淡，因為聽日就係DSE發榜嘅大日子。