自修室，學界既蘭桂坊: 40
的士慢慢駛遠，我地幾個就喺銅鑼灣搵嘢食，我突然醒起。
「喂，你生日喎，就哂你，我地去搵間有粥食嘅餐廳?」
「傻仔，我依家好返哂，可以食其他嘢架啦，唔洗就我。」
「哦…咁好啦。」果然過咗兩個月，好多嘢都轉變咗。
由於去迪士尼都用咗好多錢，我地就平平地搵咗間樓上西餐廳食飯。
坐低咗之後，Jojo就開腔。
「唔好意思呀，因為我生日，搞到你地成日都無溫過書，咁就哂咗一日。」
「車，朋友嚟嘛，生日慶祝下就緊架啦，況且我地全部都玩得好開心。」
當Shirley講完，我地個個都笑住點頭。
「係呢，你幾時先同返我地落自修室呀，依家無人同車厘龜拗Econ啦，得戚到佢呢。」Shirley續道。
「哈哈，咪咁講，不過無敵真係幾寂寞嘅。」俾人咁讚，我的確幾high。
「咁囂張?我呢幾日就落返嚟會一會你，我閉關咗兩個月，就俾你睇下我真實力啦。」Jojo笑道。
照咁講，Jojo真係會返番嚟自修室，好嘢，一切真係回復原狀，我個心安樂哂。
差唔多食完飯，我突然醒起我地未買蛋糕。
我借啲意話要去廁所，然後衝咗落街去買蛋糕，去到一間麵包鋪，見到有好多蛋糕，我就喺度諗，唔知Jojo鍾意食咩蛋糕呢。
正當我望住啲蛋糕苦惱緊嘅時候，有個後生女店員一邊喺度執嘢一邊同我講，就咁睇個背影，好似幾索。
「喂，買蛋糕呀?買俾邊個架?」
「買俾個女仔，朋友嚟，買咩比較好?」
「女朋友緊係買我地個北海道牛乳蛋糕啦，夠哂甜耶耶，仲好重牛奶味添。」
「唔係呀…你聽錯，係買俾一個女仔，而佢係我朋友嚟。」
個女店員唔知有冇聽到我講嘢，就繼續講。
「如果你係買，我地可以叫師父即刻幫你寫埋個名上去喎，你女朋友叫咩名呀。」
屌，都話唔係女朋友，你可唔可以唔好咁聞塞。
「佢叫Jojo，係我朋友嚟，你幫我刻佢個名上去吖。」
「好啦，你等等我啦咁。」講完個女店員就走入去廚房。
等咗幾分鍾，佢就拎咗個蛋糕盒出嚟。
「盛惠一百五十八蚊吖唔該，加油呀!」個女sales做咗個osh嘅手勢出嚟。
呢個女sales真係走火入魔，但我見趕時間，俾完錢就急急腳走人。
我拎住個蛋糕行返上間餐廳，突然心情有啲緊張…
我發現自己蠢咗，我個身份咁尷尬，點解我唔叫肥鈞去買，呢樣嘢唔應該係由我去做…
唉，不過唔做都做咗，就唯有硬住頭皮上。
上到去，我拎住個蛋糕，放喺枱面。
「嘩有埋蛋糕添呀，你地真係好好…」Jojo道。
「唔知係咩蛋糕嚟呢，好想快啲食甜品。」肥鈞流哂口水咁講。
我好小心咁打開個蛋糕盒，個個都圍埋個頭嚟睇，我一打開，心諗…師父，唔係咁大整蠱呀…
個蛋糕上面寫住「JOJO生日快樂 <3 」
我地幾個人見到蛋糕上面嗰塊大大塊嘅朱古力牌，都靜咗一靜，呆咗。
我心知不妙，一時三刻都唔知點兜。
Jojo見到個心心，呆咗一呆，笑道。
「哈哈頂你，你係咪玩嘢呀，整個咁大嘅心心喺度。」
雖然佢咁樣鬧我唔知係咪有弦外之音，之不過佢咁樣鬧完，尷尬嘅氣氛的確舒緩不少。
「唔係呀唔係呀，我真係乜都唔知架，我剩係叫佢喺塊牌上面寫你個名同生日快樂，我都唔知點解佢會加個心心喺度，我買完連個盒都無開過就拎上嚟。」
「唔洗解釋咁多喎，心心呢啲嘢，好閒架姐。」Shirley道，我從佢嘅語氣，聽到有小小酸味。
「你地唔好理塊牌啦，快啲點蠟燭，唱生日歌。」我一邊插蠟燭一邊道。
插完蠟燭點完火，我地幾個就一齊唱生日歌，Jojo坐喺我地幾個中間，笑得好開心。
Jojo許完個願，嘟起個咀，一下子吹熄哂啲蠟燭，我地幾個再一次叫一聲Jojo生日快樂，就慶祝完佢生日。
「今年你嘅願望係咩呀?」Venus問。
「仲駛講嘅，緊係考好DSE，入KONG U啦，我想讀Econ&Finance。」
「係呢，咁你地想入邊間U讀咩科呀?好似未聽過你地講過喎。」Jojo續道。
「我諗我會想入文學院，入邊間大學到時就睇成績做人啦…」Shirley道。
「我好羨慕啲新聞主播，我想入BU新聞系。」Venus道。
「Venus讀BU我就去BU讀，有咩系入得就入咩系啦!」肥鈞好大聲咁講，唔知點解佢講完，間餐廳其他食客個個都用奇怪嘅目光望住佢。
個個都講完，佢地就望住我。
我其實一直以嚟都無諗過呢個問題，一向我溫書嘅目的都係諗住溝女，教到Shirley，教到其他人，夠我威就得，其實我無諗過入大學咁長遠，更加唔好講話讀咩科，除咗打機，其實我無任何興趣。
「我唔知喎，邊間大學好?讀咩科好?」我問。
「搞錯呀你，無啲計劃，點做人男朋友呀，你入咩大學讀咩系好影響你前途架，第時搵唔搵到錢，養唔養到家就睇佢架啦。」Jojo怒道。
我俾佢咁樣鬧一鬧，知道自己答錯嘢，我留意到Shirley扁一扁咀。
睇嚟，我要答一個型咪啲嘅答案，我先至過到關。
「哈，我無諗過讀咩大學入咩系，係因為我覺得我依家諗嚟無用，盞規範咗自己，以為自己考到咩成績入到咩就心足，到時萬一失手就弊，所以…」
「所以咩呀?」眾人道。
「所以只要我考到個成績咩U咩科都入到，到時慢慢揀，咁唔係仲好咩?」