自修室，學界既蘭桂坊: 32

當我睇到呢段說話嘅時候，我就知道其實我無得揀…
我就知道我同Jojo無得返番轉頭…
即使只係做返普通朋友都無可能。

我知道你鍾意我又點…你都唔俾機會我鍾意返你…

第二日，落到自修室，如我所料，我已經見唔到Jojo，之不過，我依然唔忿氣咁問出呢道問題。

「咦，Jojo呢，點解佢無嚟嘅?」我問Shirley。
「佢…話佢應該唔會再嚟自修室住啦，佢話想以後返屋企溫算喎，我都話佢有啲嘢架啦..」





雖然我都預咗，但聽到嗰一刻始終都係接受唔到。
「哦…係咩…」

「其實佢以前一向都係喺屋企溫書架，佢話屋企自己一個靜靜地咁溫仲易入腦，係有一日佢俾我地拉咗嚟呢度溫佢先繼續嚟咋嘛。」
「邊一日?」
「咪九月二號囉，我同你第一次見面嗰日呢，啱啱開學我地夾硬扯埋佢嚟咋。」
「哦…」
哦…嗰日亦都係我同Jojo嘅第一次見面…





我終於明白哂所有嘢，但明白哂又點，有啲嘢，唔明好過明，明白咗可能會更加後悔。
人生最痛苦嘅事莫過於後悔。

我好掛住Jojo，掛住佢嘅笑容，佢塊面珠墩，佢啲收皮啦，佢個麥兜Icon。
我打開Facebook，諗住入去佢個facebook睇下佢，點知，當我打開佢個Fb時，竟然見到Friend嗰度變返做Add friend，即係話佢unfriend咗我。

洗唔洗做到咁絕?俾我睇下你都得掛。
但諗真啲，可能佢咁樣只係避免自己打開我個Fb，保護自己…

從今日起，麥兜同車厘龜，各自各返番去自己嘅動畫世界，大家再唔係朋友了。





之不過，我都係唔忿氣咁，噤咗落個add friend掣。
望住個Add friend變咗做Friend request sent，希望有一日佢會Accept返我…
今日星期五，肥鈞同Venus夜晚去咗補英文，Jojo又無嚟，所以得返我同Shirley撐枱腳。
我好掛住Jojo，掛住佢嘅一切，所以，今日我想食粥。
「Shirley呀，不如今日清淡啲，去食粥好唔好?」
「無所謂呀，係咪去之前你同Jojo去開嗰間?」
「係。」

入到去粥鋪，一切如舊，變嘅只係我身邊嘅唔係Jojo，而係Shirley。
呢一個本來只係屬於我同Jojo嘅地方，依家已經變咗質。
佢以後唔會再同我嚟呢度食粥了。
唔知老闆娘仲係咪都一樣係失憶，今日啲粥又有冇落鹽呢?

「兩位食咩呀，隨便睇。」老闆娘道。





我望住個餐牌，其實粥嚟嚟去去都係嗰幾樣，無咩特別，本來又想叫牛肉粥，但諗諗下，今日想試下Jojo食開嘅艇仔粥。

「一碗艇仔粥吖唔該，Shirley你食咩呀?」
「同你一樣吖。」

好快，老闆娘又倒好碗粥放喺我地面前。
「慢慢食下，睇熱。」

我食一啖，唉，佢都係失憶，又無落鹽啦，我見Shirley拎起匙羹想食。
「Shirley，唔好食住，老闆娘，啲粥無落鹽呀。」
「呀係咩係咩，唔好意思，我再煮過，等等下。」

Shirley見到我咁樣，一臉疑惑。
「我都未食，你點知我嗰碗都無落鹽嘅。」




「我同Jojo嚟食過兩次架啦，我咪話過個老闆娘失憶嘅，次次啲粥都唔記得落鹽架。」我道。
「哈哈，原來係咁。」

等咗一陣，老闆娘終於拎咗兩碗有落鹽嘅粥嚟。
「慢慢食下…唉…依家愈嚟愈少人嚟呢度食嘢啦，可能係我老啦，煮啲嘢愈嚟愈唔好食…」老闆娘慨嘆。

呢句說話其實我已經聽咗四次…

「你地兩個係兄妹嚟架?」老闆娘問。
 「唔係呀，佢係我男朋友嚟。」Shirley道。
 「男朋友?」然後老闆娘突然用一種懷疑嘅眼神望住我。

我呆一呆，突然醒起前日我先嚟過，仲話Jojo係我女朋友。
嘩我屌你，你唔係依家先至嚟唔失憶下話，咪亂嚟呀，我死俾你睇架。





等咗五秒，個老闆娘終於出聲，嚇到我屎都標。
「哈哈，乜依家啲情侶轉咗口味咩，做咩咁鍾意嚟食粥嘅，前日好似又有對情侶嚟食，同你地差唔多年紀架咋應該。」

仆你個街，你記啲唔記啲，我要快啲轉話題先得，萬一突然俾佢認得我就仆街。
「係呀，你啲粥好味嘛，落咗鹽嘅話。」我暗串佢。

「哈哈哈，我下次一定會落架啦，呀，你地下次再喺呢頭拍拖嘅話咪再嚟食囉，話唔定會撞到嗰日對情侶呢，我見佢地都好鍾意食我啲粥架，我覺得佢地好襯。」

講完，個老闆娘又行返去灶頭搞佢嘅嘢。
呼，真係險過剃頭。

「你同Jojo嚟食過兩次，點解佢都唔認得你咁嘅?」Shirley問。
「所以我咪話佢失憶囉。」
「咁佢真係好慘，我好難想像一個人成日咩都唔記得哂會點…個腦一片空白。」
「有時可能係好事嚟呢，可以好輕易咁忘記一個人，或者忘記一啲唔開心嘅事。」我道。





我諗Jojo依家可能好想做呢個老闆娘，咁就可以好輕鬆咁忘記我…

「睇嚟你都有心事喎。」Shirley道。
「哈哈，唔係，分析下姐，快啲食粥。」
「你壞壞呀你。」Shirley扁咀。