[男籃]一球穿Jump: 第四回 - 美人計

MACY「有呀，我地下個月就會攪多次呀，你今年有興趣呀﹖」
 
「係呀，上年玩過一次都幾好玩丫，所以今年如果有記得叫埋我。係喎，你冇我電話，你抄低丫，6XXX XXXX。」做男仔做到我主動俾電話個唔鐘意既女仔，都幾失敗。先講講MACY個樣，好正常的中間分界，一睇就知對自己個頭完全冇要求，打哂KICK咁。帶住一副金絲框眼鏡，係金絲框﹗面型其實OK的，但係真係太梁，而且冇好好打理自己攪到塊面好油同好多間瘡，總之就係冇人要個D啦。
 
犀牛呀犀牛，你識到我呢個兄弟你都死而無憾喇。
 
話說回頭，我得一個星期時間要MACY幫我地出千，我要把握機會。我MSG左MACY「HI MACY，我記得舊年賣物會呢，要出去揾D平平地既野返黎賣架喎，舊年我唔得閒，今年可唔可以帶埋我去。」MACY係學生會採購，聿於冇咩異性緣，所以舊年佢都係自己一個人去買貨。難得今年佢既男神邀請佢，佢梗係應承啦﹗
 
到星期六我地約好左既時候，我見到MACY一早就到左喇。
 




「你今日唔同左既好似。」
 
MACY「係咩。。。有咩唔同呀﹖」
 
我見到MACY有D面紅，即刻食住個勢上「你今日靚過平時返學好多﹗」(呢句野其實3分真，7分假啦。因為今日MACY戴左CON同札左條馬尾，加上冇左平時長到可以掂到襪既校裙。雖然同靚差好遠，但係都叫冇叫核突。)
 
MACY冇出聲，望住地下。我知道唔可以太過份，因為再講佢一定會誤會。我地一齊去左長沙灣D工廠大廈，睇左幾間賣文具既批發商，但係價錢唔岩，最後都冇買度。
 
「不如去STARBUCKS坐低飲杯野咯。」天口仲係好熱，我見到MACY大汗搭細汗咁，就提議去飲杯野，乘機講出我想講既重點。
 




去到STARBUCKS，我地嗌左杯野飲，開始閒聊。一開始就講下學校D野，講下D common friend 既八掛野咁。傾左差唔多10分鐘，我單刀直入。
 
「見你平時好多時都好似好開心咁既，你冇煩惱架﹖」
 
MACY「下。。。其實都真係冇咩架，屋企對我讀書方面都冇俾好多壓力。」哈哈，係喇，快D問番我啦，我對你有冇煩惱，有冇壓力完全冇興趣呀。MACY繼續「你呢﹖你有好多煩惱呀﹖講出黎睇下我幫唔幫到手丫。」你一定幫到架，我就係等你呢句。我將我同高佬同犀牛今年分左班，冇得一齊打學界等等加鹽加醋咁講哂俾MACY知，佢聽得入神之外，我仲睇得出佢真係諗緊有咩分法幫到我地。
 
佢提議左幾個廢到爆既方法俾我，包括叫犀牛教佢班同學打波，可能贏到呢~(冇可能!)叫阿SIR唔好跟以前規矩選阿犀牛入去~(咁不如你幫我抽籤仲快啦)叫其他班D同學放水俾佢地班~(有冇攪錯，咁都諗得出，你個腦載咩架!
 
「如果犀牛個班抽到好籤就好喇。」
 




MACY「抽籤﹖」「你想我星期一抽籤時幫佢地﹖。。。俾人發現左好大獲架。」
 
「其實抽籤都唔係唔公平架。犀牛佢地都未必贏到既，仲有呀，就算正常咁抽都有可能抽到呢個combination架，所以唔可能話對其他隊唔公平。」
 
MACY「之但係。。。」「抽籤個日仲有其他委員係度。。。」
 
「其實犀牛佢係有能力打校隊，幫我地學校爭光架。只不過係編班個度有問題之麻，而家係對犀牛唔公平至岩。」