有咩恐怖得過同自己玩MSN？: 第十五節 - 開戰
續上回，見完冥通大叔之後，我地就各自展開為期一星期既修練，當然啦，因為無人睇住，偷懶都得，不過既然關係到條命仔既話，懶極都有個限度既......
唔知另一個我會幾時出現呢？就黎上戰場真係好緊張......希望可以好似《破壞之王》個外賣仔咁唔洗死啦。
果頭先擔心完，另一個我就好似聖神降臨咁從天而降，不過認真啲睇......原來只係有人幫佢加特效，差少少又比佢大到我。
K：「喂，你既隊友到晒平行世界啦，差你姐，依家我就送埋你去先，跟我黎啦，我好期待你既表現架，哈哈哈哈哈哈......」
我：「原來個遊戲係去你果個世界玩，即係你主場咁話啦，咁我地仲有得玩咩？」
K：「你放心，裁判司儀仲有觀眾等等都同我無關係，不過唔排除大部係觀眾係我既Fans咁解姐，哈哈哈哈，噢！話咁快就到啦～」
睇黎我方陣容都係我既朋友，有星仔、玥風、雷切爾，當然仲有我自己啦......而雷切爾係我一個好耐無搵既外國朋友，不過好似少緊個人咁......
我：「雷切爾！好耐無見啦，原來你都係魂持有者，你由小學果陣就返左英國，但今次點解又會知我有事既？」
雷切爾：「Oh～原來係仇魂，其實冥通既委託人係我，實不相暪，其實我祖先報夢比我知因為有人想扭曲世界既發展，而呢個人就係另一個你......」
我：「下，咁我地依家要做既野咪即係打Final Boss？唔係掛，一黎就打王......」
冥通：「無計啦！如果你既靈魂比佢吸左，咪即係能力都送埋比佢囉，魂力會進化架嘛，雖然我唔知你既刀魂會變成點！」
雷切爾：「Bingo，就係咁！係呢，果個叫銀次既日本人真係搵唔到？睇黎你要打埋一份啦。」
冥通：「唔係下嘛！我諗住做領隊架喎......」
雷切爾：「無辦法，因為真係搵唔到佢，兩個世界都係，一係咁啦，我加錢比你，你就幫下手出埋戰啦。」
冥通：「車......你估我真係果啲咁貪錢既人咩，話唔定5場比賽入面我地贏到3場呢，咁咪有2個唔洗打囉！」
玥風：「係啦大叔，你上次要既軍火我都帶埋黎，我諗你應該需要用到既。」
冥通：「都話我得24歲唔係大叔呀！其實呢批軍火係比你用架，你既槍魂話唔定更需要佢地，總之努力啦。」
星仔：「我唔係想阻大家吹水......不過我地係時候行出主舞台果到架啦。」
估唔到一出到主舞台，望到另一個我果隊就感受到無比既殺氣，即使佢地每一個既樣都神神秘秘咁......哇，乜個司儀係變色龍咁款既......
SEN：「Hi～大家好，我係今次靈魂收割戰既MC加Judge，黎自5光年咁遠既達拉星人SEN！全稱即係SixEightNine，689！依家即刻同大家介紹下比賽形式啦......」
SEN：「首先每次出場雙方都要透過我地既電腦黎抽一名隊員出戰，當然出過既就唔會重複啦，而比賽鬥乜野，就輪流交比雙方既隊長話事！即係Qilar同仇魂，拿拿拿，記住呀下，係抽左出咩人再決定比賽呀！」
我：「得啦涼粉！你快啲抽人啦，我好緊張呀！」
SEN：「拿拿拿，你唔好蝦我外星人呀，我知你鬧緊我係果個咩梁唔知乜野英既人呀下，你悔辱裁判既話，可以取消你資格架！」
星仔：「外星人先生......我地唔係想侮辱你，但其實係侮辱，唔係悔辱呀，你學好地球語言先啦。」
謎之男：「唔好嘈啦！快啲抽呀！」
K：「冷靜啲啦～比佢地娛樂下都好丫。」
謎之女：「呵呵，唔知我會同邊個打呢？」
我：「咦喂，另外果邊原來有囡囡架喎，唔知邊個會同佢打呢下？」
玥風：「可能係人妖呢......你覺得佢會帶到囡囡出黎打咩。」
SEN：「好！結果出黎啦！係玥風vs奧格斯！麻煩Qilar定比賽規則啦～」
我：「唔係嘛！一黎就果個巨人？但點解唔見對面有佢既存在既，明明佢咁大份......」
K：「奧格斯！開餐啦！今次既勝利條件當然係令其中一方死亡啦，哈哈哈哈哈哈......」
話口未完，果個巨人就由觀眾席高處一野跳左落黎，估唔到無見一個星期，佢又大份左......不過一黎就要賭命，呢場仗真係非勝不可......
奧格斯：「吼呀呀呀！」
玥風：「睇呢個食人魔果樣，應該得力量，無智慧，睇黎都係有機會贏既。」
SEN：「好啦！雙方上台！比賽開始～」
待續。