有咩恐怖得過同自己玩MSN？: 第十二節 - 陰影
搞左一大輪終於返到黎原本既時空，我諗都係時候同以前既自己講聲永別，始終大家既時空真係唔同，我都係繼續打下GTA算數，廢事又唔知搞到啲咩嘛！最後一次用果個MSN，都係傾多幾句算數......
我說：
喂喂，3年前既我，我都係以後唔ON啦......
㊣野一健★﹏☆說：
好耐無見啦喎，你係咪比果D唔知咩時間警察捉左呀？
我說：
(都係唔好話去過未來好D)唔係，不過我覺得自己同自己講野好似有病...
㊣野一健★﹏☆說：
你又有道理既，唔通同人講話我同未來既自己吹過水咩！
我說：
點都好啦，希望你努力打多啲機，成為一個高手啦......因為我乜都唔識，連打機都好廢，我off啦，Bye～
就係咁，我取消左skype果個破解，好好咁樣訓返一教好既......點知第二日，又有奇奇怪怪既事，就係無啦啦有條友搵我......
Qilar：
Yo～
我：
你係邊個？無啦啦加我skype既......
Qilar：
我係另一個平行世界既你，你一陣落黎你樓下果個公園果到啦。
我：
下，我明明無破解個skype，點解又會比你穿梭到時空架......
Qilar：
NoNoNo～我同你一樣大，唔關咩野時空事，總之你黎啦，係咁。
另一個我連Killer都可以串錯，不過都唔知係咪另一個我添，算，我就睇下咩料，當落街坐一陣......
點知落到去，又真係有個人同我差唔多樣坐左係到等我，但個頭就白色既，仔細咁睇，佢五官比例係好過我好多，而且高我10cm都有......但又著住套老西，幾斯文下，似乎都係好人黎既。
我：「喂，你又話同我一樣大既？但點解你靚仔過我同高過我架？」
K：「咁係正常既，因為基本上，你既缺點同弱項，都會完全相反變成我優點......」
我：「哦......原來係咁，但你Killer都串錯......會唔會蠢左少少呀？」
K：「NO，呢個係我出賽用既名，我特登的，因為Killer真係周街都係，但熟我既人都叫我K，唔會叫我Q。」
我：「下，出咩賽呀？IQ大賽用架？」
K：「你唔知都正常，你打LOL同信長係咪好廢架？」
我：「我係完全唔識玩，連輸100場都試過，但你又知既？唔通你係果個世界入面係電競選手......」
K：「又蠢唔晒，我的確係電競選手，係Dota 2既世界大賽入面，我係帶領我果隊贏過世界冠軍，不過險勝黎。」
我：「咦，Dota 2都係電競類遊戲黎，咁你咪LOL都係世界冠軍？又幾勁喎！」
K：「哼，呢個就係我今次黎搵你既目的，我諗你廢極都知LOL係要5個人一隊架啦，我既隊友根本捉唔到我下一步想點，咁樣我真係好驚攞唔到冠軍。」
我：「唔通你想搵齊另外4個自己一齊出賽？咁你咪知自己下一步想知囉，哈哈～但我打LOL好廢，應該幫你唔到啦。」
K：「其實你勁定廢都唔關我事，我只係需要你既身體就夠，鬼叫複製人技術仲未完善，唯有去唔同既平行時空果到搵另一個自己啦。」
我：「咪住先，即係我會暫時失去知覺再比你操縱住之類咁樣去出戰？」
K：「哈......你又幾好笑，咁我都唔兜圈，其實我會利用精神同步系統黎一打五咁樣出賽，只要我望住個地圖，我就可以決定到三路應該點樣進攻同防守，不過精神同步系統需要一個DNA一致既肉身先同步到，原本呢個系統係比啲孖生兄弟用既，但因為潛在性太過危險，所以禁止左......」
我：「你意思係......你要殺左我？」
K：「邊算係殺呢？我只係消滅你既靈魂，你既肉體一定會完整無缺既，哈哈哈哈......其實，都唔需要分「你」同「我」啦！」
我：「哇，救命呀！我都係想返屋企先！」
K：「停～見你咁可憐，我當然想打算你黎場遊戲先再決定攞唔攞你肉體啦，始終平行時空有無數個既。」
我：「唔係怕你呀！我係怕果班MK呀！佢地其中一個以前日日都打我架，希望佢地認唔到我啦......」
K：「你行埋一二邊睇下我既實力啦，場遊戲，一星期後開始，你搵多4個朋友黎同我玩。」
我：「喂喂，人地個個有刀係身......仲咁疊馬......」
K：「哦，廿幾條友，算少，你話我知邊個以前成日打你一身啦，我要洗黑呀。」
我：「拿，果個踩住部橙色既單車個頭剷青既，好似叫丘仔，佢以前成日踩住部自稱烈火戰車既單車黎碌我......」
K：「得啦，等我用粒石仔同佢地打個招呼啦！」
我行到離佢地好遠咁樣食花生，我原本以為佢用黎石仔掉佢個頭之後跑走，點知佢真係好爆......
待續。