【精神異常短篇】(1)(2)(3)(4)(5)(6)(7)(8): 【精神異常短篇8】你又再一次係鏡裡面見到自己
【精神異常短篇8】你又再一次係鏡裡面見到自己
你又再一次係鏡裡面見到自己
今晚已經係第十七次
你發現鏡裡面出現嘅係另一個人
雖然外表同你一模一樣
但係你肯定個個唔係你
你開始覺得驚，覺得恐怖
你直接望住我嘅同時
我亦都一直望住你
你覺得我嘅眼神非常唔友善
甚至乎覺得我想害你
時間啱啱過咗半夜十二點
屋裡面只有你一個
廁所天花板嘅燈突然變得好刺眼
光好似將周圍嘅嘢全部都吞晒入去咁
呢個空間就只係得返我同你
你舉高手，我就跟住你舉手
你眨眼，我就跟住你眨眼
但係你開始發現當中有一啲嘢唔妥
我嘅動作似乎比你慢……
只係好少嘅分別
唔到零點一秒嘅延遲
但係你已經發現到當中嘅差別
你再一次舉手……
的而且確，我嘅動作比你慢
你以為自己只係因為太攰而開始胡思亂想
你合埋眼，擰一擰頭
想將心裡面嘅不安感清除
但係當你再打開眼嘅時侯
你就發現鏡裡面嘅我正對住你係到笑
又或者係鏡外面嘅你正對住我係到笑
你覺得廁所裡面嘅空氣愈來愈焗
你覺得透唔到氣
你開始流汗
你想盡快逃離呢個空間
但係你發現廁所嘅門冇辦法打開
有人一直係外面拉實你道門
你嘅背脊一直流緊汗
你開始疑神疑鬼覺得後面有人望住你
當你慢慢咁擰轉頭
你發覺望住你嘅人就只有我
從來就只有我係你嘅朋友
你笑，我就陪住你笑
你喊，我就陪住你喊
我一直都留係你身邊
從來都冇離開過半步
你聽完我咁講開始發狂咁亂叫
將廁所裡面嘅嘢通通掃晒落地
下一刻又突然係度傻笑
你用手將你塊面扭埋一舊
你嘅樣睇起嚟非常古怪
你發現已經唔記得你原本嘅樣
你一直望住鏡裡面嘅我
用一種好奇怪嘅眼神望住我
心裡面重覆咁問住同一個問題︰
「你係邊個？……」
我冇答你
我只係對你報上一個微笑
你突然覺得有一股恐怖感散播你全身
你覺得自己嘅身體並唔係由你自己控制
一直係到控制你個個人係我
留係鏡裡面嘅我
你又再一次發狂大叫
你身體裡面湧起一股衝動
想要破壞晒呢個世界上嘅所有嘢
你同自己講，你想要殺死一個人
又或者係殺死你自己都無所謂
你再一次對住鏡裡面嘅我問︰
「你係邊個？……你究竟你邊個？」
你把聲聽起上嚟已經唔再屬於你
係另外一把陌生人嘅聲
你覺得個把聲係屬於我
你嘅內心已經出現咗一道裂痕
我就一直係度等呢一個機會……
當你發狂用拳頭去打碎塊鏡嘅時候
我隨住玻璃碎開嘅裂縫
慢慢潛入你嘅空間
你覺得我好似輕飄飄好似一陣煙
我慢慢將你包圍住
開頭你覺得軟綿綿暖暖咁好舒服
然後你開始覺得唔妥
全身好似畀一道無形嘅力壓迫住
你突然反胃想嘔
覺得心口裡面嘅所有嘢都係到攪碎緊
你將自己嘅內臟殘渣係口裡面噴出嚟
但係當接觸到空氣嘅時候
突然就被割成一條條細絲
係空氣裡面飄浮
你以為呢啲全部都係你嘅幻覺
我借住呢個機會偷偷地潛入你身體裡面
填補你內臟嘅空缺
同時將你嘅意識扭成一條細長嘅繩
再接駁去鏡嘅裂縫個到
你覺得自己一路係到縮細
變成輕飄飄好似一陣煙
沿住細繩被吸入去鏡嘅裂縫中間
你嘅身體仲一路留係外面嘅世界
但係意識已經被傳送咗去另一個空間
個邊係一個完全寂靜嘅世界
你唔會再聽見外面任何嘅聲音
從今以後就只有你自己孤獨一個
只有當我出現係鏡面前
又或者企係反射物前面
你先有機會係狹窄嘅視野
去偷窺原來屬於你嘅世界
我將會取代你
成為真正、真實嘅你
你嘅身體從今以後就係屬於我
我拉開廁所門
操作住唔熟悉嘅身體慢慢行出去
你嘅屋企人啱啱係呢個時候返嚟
我偽裝成你嘅笑容同佢地有講有笑
完全冇人察覺到
你已經唔再存在係呢個容器入面
而家就只要等你屋企人瞓晒覺
我就會靜靜咁幫你完成你想要做嘅事……
【……】
深夜嘅便利店零零丁丁只有幾個人
我代替你企咗係門口已經接近半個鐘
煙駁煙咁一路等落去
計埋啱啱入去嘅阿叔
裡面而家大概有十幾個人
我代你將煙頭踩熄
然後抆出收係後腰嘅孖人牌切肉刀
一面用封箱膠紙一層又一層紮實係你手上面
我一直向住便利店走過去
玻璃上面正反映出你
我知道你而家正係另一個空間
一直睇住外面發生嘅一切
我快步走向一個啱啱買完嘢出嚟嘅男人
直至貼近到聽到佢呼吸嘅程度
右手就向住佢心口捅落去
刀「嗦」一聲好似畀佢吸咗入去咁
我覺得佢身體裡面好似有一種吸力
一直咬住我把刀唔放
我用力將手腕一扭，同時向後一拉
「嗞」一聲
一行血就黏住刀鋒扯咗出嚟
「唦啦唦啦」咁潑咗係我後面地下
個男人兩隻眼珠凸晒出嚟
連叫出聲都未嚟得切
我一下刀已經再次插入佢心口裡面
然後再一刀……
再一刀……
便利店裡面有人聽見出面有動靜
一直係玻璃後面裝出嚟兩頭望
但係角度所限，佢地乜都見唔到
個男人挨住玻璃慢慢跣落去
滿口都係血
佢一直用怨毒嘅眼光望住我
呢個人，係今晚第一個……
我望住玻璃反映裡面嘅你
心裡面靜靜咁同你講︰
「跟住落嚟嘅所有嘢，都係為你而做……你記住留心睇清楚……」
我用衛衣抹乾淨刀背上面嘅血
就向住便利店門口行入去……
。
。
。
This is a work of fiction.