【微甜】點解有五條女同我一齊?: 7-三人同眠- 「修正版」
好在之前同啊柔傾過下計，得知佢讀hku，如果唔係又好似之前咁周圍亂搵一通。
之後我又諗起啊柔話全日都上堂，所以我都搭火車去hku。
我一到火車站，就見到啊柔出閘。
我就大叫:「喂，呀柔，我係度呀。」
望左一望，啊柔隔離果然有一個男仔。
啊柔見到我就走左過黎。
「依，點解你會係度既？」啊柔問。
點解可以你可以咁冷靜？唔通係我多心？定其實你無嬲我？
之後個男仔好似怒睥住我咁。
我望一望佢一身既打扮，一睇就知係一個mk仔。
呢個mk仔手上拎住一袋二袋，好似好辛苦咁。
「仲以為你打機唔應我whatsapp添。」啊柔望住我笑。
「梗係無啦邊會呢。」我當然要講下大話。
啊柔望住我:「我同你介紹呀，呢個係我大學同學，叫啊傑呀。」
啊柔望住佢講:「呢個係我男朋友，叫啊龍呀。」
「你好呀，你叫啊傑呀阿，唔該哂你喎。」我就好有禮貌咁講。
「哇，啊柔，呢個係你條仔？咁柒既。」佢個樣好似睇我唔撚順咁喎。
屌你咩，識唔撚識禮貌呀？
你係邊個呀，你係啊柔隻兵渣，我假假地都係將軍黎，分下軍階好喎。
「唔係呀，個樣唔算係好差呀，而且份人好好架，我唔覺得有咩問題喎。」啊柔講。
雖然啊柔係幫我解圍，但係唔知點解我對個樣唔算差呢句好似踩緊我多啲咁，唔理啦，都係幫我姐。
我就用勝利既眼光，叫個mk仔比果幾袋野我拎，然後就無你既事，可以跪安啦。
我拎左一陣，隻手痺哂，幾袋野重撚到呀，好似托緊幾包米咁。
不過我都一路托一路行返去，一路諗個mk仔都幾好力喎，唔怪得叫佢拎。
「洗唔洗休息一陣呀?」啊柔睇到我咁樣，啊柔真係好。
「好呀。」我就話。
我地就咁行左去啲街櫈度坐左陣，係坐果陣我問啊柔呢幾袋野係咩黎，佢就望住我笑，然後話:「你咪理啦。」
我一向都唔逼人，所以亦無追問落去，不過呢幾袋野真係好重。
坐左好耐，我地都傾左唔少計，佢講下啲生活趣事比我聽，我都一路係度笑。
突然諗起啱啱啊柔同mk仔既對話，我就開口問左一句:「其實你中意我啲咩？」
「做咩咁問？」啊柔望住我問。
「問下姐，當我無問過啦」我就笑住咁同佢講。
啊柔就望左我一望，再望住個天。
「同你一齊我會好開心。有一種就算幾唔開心都好，係你身邊就唔會唔開心既感覺，總之就......唔識講呀。」講到呢度啊柔塊面紅哂。
「唔講呢啲啦，仲有一半路要行，我休息夠啦，可以行得。」我都唔知點答好。
其實我feel到個心呯呯咁跳，我都唔敢直望啊柔。
「喂，啊龍！」突然行左一陣，我一把熟識既女仔聲傳過黎我度。
之後我同啊柔周圍望，四周都望哂，
無個係我地識既，姐係幻聽，好！走得。
「喂，係呢度呀，啊龍！」呢把女仔聲一定係啊情。
我又周圍望，終於望到，原來唔係邊度就係對面馬路。
原來啱啱有架巴士遮住左佢，所以我諗應該係啱啱落車。
之後啊情行左過黎，我望到佢一身既打扮.....
只係淡淡地既妝，服裝都係平平無奇既有件褸加T-shit連熱褲。
原來平時返工都著熱褲，真係日日都比麻甩佬睇哂條長腿。
啊情開口話:「屌，盲左咩你地。」
「做咩你係度架？」我問。
「乜你唔想我係度咩？」啊情扮嬲。
「咁又唔係....」我話。
「今晚我唔返屋企訓，去你度訓，好唔好?」啊情問。
「你都黎到嘞，仲要問我，我屋企不嬲都無所謂既。」其實我咁講好似好唔情願咁。
但係無計啦，口快快咁講左出黎，但其實實質真係無所謂既。
「唔得咩？」啊情問。
「不過首先要放左我手上啲野去啊柔到先。」因為真係好撚重，唔講以為係裝鐵。
啊柔笑笑口咁話:「啊情，我要借你男友一用，等陣比返你呀。」
哇，當我咩呀，話比就比，不過算啦，女友們大哂既。
「咁呀.......一齊呀，橫掂都得閒」啊情話。
我心諗，屌你地咩，兩個女仔咩都唔拎，就係睇住我拎幾袋好撚重既野，都唔幫手。
啊情就一路禁電話，禁禁下突然望住我講。
「係喎，啊龍你whatsapp果度話搵到工，係唔係真架？」
「係呀，有人介紹咪試下做囉。」我答。
「咁咪好囉，唔洗日日無野做。」啊柔望住我笑，講真啊柔笑起黎真係幾甜。
但係我攰到做唔到表情咁望住啊柔。
「唔好講呢啲住，好重，到左你屋企再講啦。」
「一係比啲我拎啦？好冇呀？」啊柔望到我好似好辛苦咁，都想幫下手。
但係邊有男人要女人幫手拎重野，所以我一口拒絕。
男人真係難做，太重既話又要想搵人幫手，但係身邊得女人又唔可以比女人做粗重野。
我係一個都幾瘦既人，邊有咁多力去拎，所以都係博老命去拎，真係有苦自己知。
因為我第一次去啊柔屋企，所以唔識路，唔敢行太前。
行左無幾耐，到左啊柔屋企，原來啊柔屋企就係我屋企既隔離村。
係呀，佢果棟叫咩龍咩鳳，又咩門咩軒咁，一望就知私人樓。
唉，望住自己係住緊咩村，就知係公屋啦。
令我諗起公屋居屋私人樓果段youtube片，搞到我又想吐嘈一下個社會。
話返轉頭，啊柔到屋企門口就話等佢一陣，我心諗搞咩呀？
之後啊柔拎左果幾袋野就入左去，大約我同啊情都等左5分鐘左右，佢出左黎。
「行得啦！」啊柔講完之後就cool實我隻手。
唔係掛？我無估錯既話，你唔係又黎我度訓呀？
不過我都要問問佢，確定一下我係唔係諗得啱，所以我問啊柔:「去邊呀？」
「去你屋企訓囉。」啊柔答。
「啊柔驚我食左你呀。」啊情笑笑口咁同我講。
我就唯有拖住兩條女返屋企，返到屋企先記得，原來我出去之前，電腦係無熄過。