於這個Wtsapp群組中輸入名字，他就死路一條: 《最終章》陸－釋放的心靈
《最終章》陸－釋放的心靈
https://www.youtube.com/watch?v=67oaNZYGmuA
(Open Music Pls)
「嗯…唔…」我張開眼睛，只覺陽光十分刺眼。
全身肌肉乏力，不知過了多少時光。
喉嚨的部位痛楚依然，但對比起吳芯琪說話的衝擊，實在是小巫見大巫。
究竟在這白色房間外，還有人嗎？
抑或已在當晚直播後，已經因《寂默》的關係死清光？
「喂！你醒咗啦？」一把很甜的女聲迎風而過。
有了這把聲音，至少世界上不只得我。
在眼睛半開半合間，僅僅看見梁一懿正在準備不同的生果。
「放心啦，你一定唔會死，所以大家都好放心！記唔記得自己上救護車嘅時候講過咩呀？」她裝出了一個鬼臉。
我用盡全力：「講…過..啲咩呀？」
她拍拍我：「你喊住咁話，未來就交俾你啦！哈哈！你喊個樣超得意。」
聽見她這樣說，我略猜到一二：「一懿。大..大家都決..定..係你啦係咪？」
這一句話後，她收得了笑容，釋放出止微的不安..
「係呀..阿空姐姐，樂平哥哥同陳仔都決定咗..會喺下一次按『N』，近依十四日嘅『亡選』都係由我負責。」
想不到自己竟然趟了兩星期之多…那時我想起一個大問題：「《寂默》…嘅情況點？」
一懿說：「司同你朋友都未有事…上次直播件事司總算用最亂嚟嘅武力搞惦咗..不過《寂默》閒時總係有人走漏風聲，所以KEEP住每日都有人要死...」
我摸摸她的頭：「會擔心嘛？」
一懿眼紅紅：「我只係唔想以後見唔到你哋，我知道七日後，你哋幾個就要去唔知邊度過隱居生活，到時唔知仲見唔見到，咁《亡選》就得返我一個。」
我安慰她：「司哥哥..好..可靠係咪？我朋友…阿強都..都會睇住你，佢好打我好多架。加上世界有上網，我哋…日..日傾計..都得啦。」
她甩開我的手：「呃人！根本上人一分開咗兩個地方，就會愈來愈生疏！頭一星期咪日日搵囉！之後變一個月一次！慢慢就無交流。」
其推斷很正常，這是社會的寫照，只是我仍要鼓勵她：「一懿，所以要靠你改變依種人情冷漠嘅年代。」
此時，樂平到了。
他向一懿說：「一懿，唔好鬧細路仔脾氣啦，我有啲嘢要同懷禮講，你出去搵阿空先啦。」
只見一懿露出厭惡的表情，跑出病房。
「使唔使睇下佢呀？」我苦笑說。
在這塊白牆壁下，樂平搖搖頭：「俾佢自己諗下嘢啦，突然要擔起一個宇宙嘅存亡，咩人都情緒失控啦。」
眼前的樂平比之前瘦削了一點，我笑說：「我只係估唔到…連你都放得低。」
他雙手架在下巴：
「你指俾一懿成為《亡選》嘅話事人？坦誠講，聽完吳芯琪嘅說話，我之後嘅生活係點已經唔重要，反正我哋只係咁渺小。加上大人有一個壞處，唔可以做一個忠於自己，做純粹嘅決定。所以，亦只有一懿做得到。
結果係點，無人怪佢，都無人後悔。」
我抬高頭，望上天：「原來藍天白雲，只不過係大腦皮層，真係..唔慣。喂，有幾樣..嘢我好想知，首先，嗰時道具部，點解你咁遲先出嚟？」
樂平哈哈大笑：「頂仲好講，你哋幾個都喪喪哋，人哋叫你去就真係走入去。十條命都唔夠死啦，我同一懿阿空講，你哋試下就咁入去，但手機俾我。而我就由外牆爬上四樓，諗住由上而下突擊嘛！
果然條友原來裝哂閉路，你哋行入去嗰下佢已經知。我爬牆雖然花時間，但佢唔知，加上佢從來唔知道『樂平』依個人存在，等你哋出現哂，就輕敵咗。
我都估唔到道具部分兩層。我入到去，發現無數呻吟聲，即時拉燈制，之後見到你同佢對峙，就直接拎槍射佢背隻囉。」
他這人心思確是細密：「唔怪得啦，咁個直播呢？最後點。」
樂平再解釋：「司依個人真係有潛質玩恐怖襲擊，佢首先同幾十個細嘅搶槍，破爆哂Outdoor嘅電視，等三色台總部附近嘅人睇唔到，之後一路人馬搵直播室，另一路切斷三色台嘅對外network。」
「仲未止，全港幾十個發射站，司都派咗人去破壞…真係想全港無人睇到電視，無人上到My3Color.com..最後播咗一陣，佢哋已經搵到個小型直播室，結果唔使講啦。」
所以有司幫助一懿，我大底是放心的。
「最後，我哋點走架？個個都開哂槍喎？」我的最終疑問。
他慢慢坐下，舉起左手，說：「真理之外，一切虛無。係咪？我知你入過真理之外，咁其他幾個都得係咪？我嗰日都參透到。所以將應該不在場嘅人變成不在場，將你變成受害者，就係咁簡單囉。」
我笑說：「享唔享受？」
他回答：「覺得恐怖多啲，嘗試過嗰個空間，就知道餘生都無咩意義。」
「喂，順..順帶一問，你唔..唔係醫生，啱唔啱？」我望著這個身世成謎的男人。
他眼睛碌了一下，似是默認，再說：「重要咩？」
「哈，我知答案啦，好。最後一個問題，你有咩要單獨同我講？」我慢慢坐起身。
樂平低下頭，再昂首：「要你有一個心理準備。當我哋決定退出時，有咩後果。」
探病的花束在陽光的折射下展示出豔麗的一面，在不同花香與光線的映照下，我開口說了一句：「我已經準備好了。」