於這個Wtsapp群組中輸入名字，他就死路一條: 其之十二

其之十二)
 
一大早我致電到不少「電話推銷員」的招聘電話，很快就有「試工」的回音，始終我手握大學學歷，廣東話與英語溝通暢通無阻，是一大賣點。
 
而昨晚的挑選結果，阿偉有填寫死因，類似是先拍一段Video上傳到Youtube再自盡之類，連短片的主題都寫好，可惜今朝查看下，於Youtube並找不到這段片。
似乎《亡選》不能控制死亡方法？要待幾天結果去查證。
 
在這稍為平靜的時刻，我到達「天又藍紀念中學」，決定觀察一個人－梁一懿，即是「2號」就讀的中學。
 
梁一懿，作為殺掉陸百九與曾正恩的「元凶」，她在過著怎樣的生活？




 
差不多04:00pm，雖然我在她的Facebook看過大量相片，可是世間充斥著「美圖獸獸」這類軟件，與真人差天共地毫不奇怪。
 
幸好20分鐘後，我認出她的身影。與其說我認得，不如說她霸氣外露。她雖然是個高約156cm的小個子女生，紮馬尾、眼神充滿靈氣，只是皮膚有點粗糙。
但在一個七人集團內她站在中央位置，是話題中心。
 
隨著人們向著不同方向走，七人集團變成三人集團，梁一懿連同兩個女孩邊行邊聊，算得上寫意，看她神色自若，就像《亡選》對其生活並無影響一樣。
 
這三個女孩隨即進入了一所咖啡店，由於店內人群湧湧，我的存在不大礙眼。
我簡單點了一杯咖啡坐在她們後面，從微量的聲線中推測她們是高中生，正準備公開考試，口中說來道去不是鄰校男生就是老師壞話。




 
咖啡店的時光無聲消逝，一小時後她的兩位同學相繼離去，她開始翻開書本，用心細味。
 
我心想：「佢真係一般到唔一般…睇黎依個女仔都無咩特別，《亡選》對佢嚟講只係打機咁，佢根本意識唔到件事有幾嚴重…都唔知佢想坐幾耐，都係走人先。」
 
正當我拉開椅子時，梁一懿卻說了一句：「怕羞哥哥，咩咁快走呀？」
「被發現了？」我裝作聽不懂她的話，徑自離開，可是她再說：「定應該叫你阿和呢？」
 
這一次，我知再無去路。
「2號小女孩，你都好聰明呀。」既然被她發現，我也大方坐她旁邊，反正我知道她的名字，相對下依然有利。




「係你蠢啫。」梁一懿嘴裡不繞人。
 
我乾笑一聲：「咁你點發現我？」
她大笑一番：「你要怪陳仔啦？」
聽到第三方的名字，我立時緊張起來。
 
她續說：「陳仔佢尋日都係等我放學，不過佢真係成碌竹咁企響到等，到我出黎時就跟住我行，太明顯所以俾校工捉住，以為佢係跟蹤狂！哈哈，佢即時淆哂底話自己就係陳仔，只係想同我打聲招呼，之後急急腳走咗。你算高明嘅，係學校外圍來回走動，不過因為尋日發生咁嘅事，校工都注意到你，同咗我講小心啲。加上要行去依間咖啡店，正常唔會揀依條路，更唔會途經我學校。另外就係下午4點到6點，依度有Tea Set，淨係買杯咖啡嘅人太奇怪啦。」
 
真是慚愧，原來一開始我就被發現了。
「細路女，你都幾聰明。」我也拿出半點風度。
她揮揮手：「主場之利啫，不過你同陳仔都查到我邊間中學，睇黎我叫咩名，你都一清二楚啦。唉，都係Facebook惹嘅禍。」
 
我有點好奇：「明知會俾Facebook出賣，點解唔小心啲？而且作為頭兩個Msg嘅輸入者，你未必太冷靜啦掛。」
 
她的回應令我出乎意料：「因為我覺得，你哋應該無必要殺我呀，雖然我Sd咗頭兩個Msg，但我覺得自己無做錯呀，既然無做錯，就唔使咁婆媽啦。當有一日我哋7個人互相殘殺，我諗就算唔用《亡選》嘅力量，你哋都會拎把刀捅死我。既然係咁，叫咩名，係邊度返學等等…既來之即安之啦。」




 
我想她與我們唯一的分別，就是單純吧？還是我們太複雜了？
「咁點解你覺得我唔係阿偉？或者我可能係其他人派黎呢？」我再問。
 
她稍稍思考：「尋日見過陳仔，如果係阿偉嘅我覺得佢會直接同我Say Hi囉，所以男子組就得返你啦，哈哈哈哈。」
 
看來我的形象也活像一個跟蹤狂…
之後我與她再閒聊一會，與她的聊天時間，好像可以放下所有計算步驟，感覺蠻舒服的。
 
最後她說了一句：「個天選擇得我哋，應該有佢嘅原因。其實如果大家想嘅，我都想同你哋做朋友。反正我哋之間已經存在一種羈絆。」
 
與梁一懿見面之後，我更加困惑，群內7人應該是敵是友？
 
只是當日23:50pm，發生了一件意外。
 




《亡選(貳)》中，管理員發出一則短訊：
「尚有10分鐘，請輸入名字連同一個可供識認的象徵。」
 
可是阿偉已在00:00am輸入了恐怖份子的名字，難度我們在甚麼地方出錯了？
這是管理員第二次發言。