[情人節限定短篇] 餐肉煎蛋飯，毒撚既午餐: 第十章：十全沒十美

第二朝起身我依然未收到E小姐回覆，而由於要返工我亦都同自己講會無野既，緊忙既工作反而幫我捱過一日。係收工後我收到一個罕有既whatsapp，因為係由Emma send比我既： 

「對於你同我阿妹既事我都感到好可惜，你暫時唔好搵佢住喇。Take care！」 

哈，我當時真係笑咗一下，之後眼淚就開始流出黎，一個人行咗去屋企附近既公園仔坐埋一邊靜靜地喊。 

我望住電話中一齊影過既相，一齊玩過既game，一個個甜蜜訊息，回想起一幕幕溫馨時光，反而越黎越迷惘。可能，毒撚唔會明白女人，而女人，亦唔會明白毒撚。 

之後慢慢同E小姐回復聯絡，間中都會見面食飯。唔同既係，平時既拖手、間唔中既親吻，偶爾的打情駡俏都不復現，連親暱既稱呼亦變回拍拖前既： 





「喂！毒撚。」 

係果時我真正體會到，既相近又遙遠既距離。 

轉眼黎到臨近情人節既某個下午，岩岩係外面開完會準備返公司時途經某個曾經同E小姐行過既商場。我稍為停一停就決定入去食埋晏先返公司，因為我知入面有果間我以往經常同E小姐一齊去食既連鎖茶記分店。

香港無論咩都迫，搭巴士迫，搭火車迫，搭地鐵迫，間屋迫，食飯座位都迫，真正係生活迫人，但係正苦仲話要迫夠一千萬人。係茶記門口拎完飛之後等，直到個阿姐問搭唔搭枱我先回魂，搭枱咪搭枱，反正都係一個人。 

阿姐指咗我去一個雙人卡位，明明張枱得單人size都夾硬做成雙人枱，卡位既另一邊坐咗位西裝友，當時飯已經食咗一半。我一坐底已經叫阿姐落單： 





「餐肉煎蛋飯，熱鴦。」 

食緊紅酒汁牛扒意既西裝友聽到我點呢個飯，臉上掠過一抹不屑既表情，之後捉緊機會同阿姐講： 

「麻煩你上埋杯即磨咖啡。」 

挑！佢以為飲杯咖啡，啊，OK，高級少少，即磨咖啡，就真係會同財爺所講咁變成中產咩？我邊等飯到既時侯，又拎出部電話做低頭族，起碼唔使用同E小姐食飯既近距離望住個西裝友咁gay。 

身為an俠既我開始掃瑩幕搵app，突然發覺部機有少少窒，但an機越用越窒是常識吧。於是我打算清app希望改善下，一入到個apps list，就見到一個個跟廠出又無得delete既癈apps，我同E小姐共同擁有既apps，幾年來同佢一齊玩過既games…我其實次次想清apps時都唔捨得delete。唔捨得既唔係咩罕有道具，咩高level角色，咩唔root機就唔backup到既save，而係一段段珍貴回憶。

突然阿姐丟底我碟飯同西裝友杯即磨咖啡時先打斷我既回憶，於是我開始專心食我既餐肉煎蛋飯。依然煎得帶點脆的數片厚切餐肉，加上兩隻脆邊既太陽蛋，我打圈咁淋上甜豉油，用枝匙羹整穿個蛋黃之後開始撈飯食，咦？


點解明明係甜豉油，會有咸味？一路係度繼續扒飯，一路覺得碟飯仲帶有少少苦澀味，正覺得奇怪時，對面個西裝友突然趕住咁飲晒杯咖啡跟手急急忙忙咁起身去埋單，到果時先發覺，我兩行淚痕一路流過咀角，同滴埋落碟飯度，唔怪之得碟飯咁既味，而條西裝友又比我個樣嚇到趕住走。


我抹一抹眼淚，深呼吸一下之後繼續食埋碟飯，之後慢慢飲我杯熱鴦。係呢個時侯我見到一個身位之隔既隔離枱有對情侶坐底，之後個男既拎起本menu比女伴問：


「你想食咩呀？」


我突然之間好似有所領悟，每次同E小姐黎呢間茶記食晏，佢都唔使問我食咩，但係如果問我佢想食咩，我真係答唔出。






可能有時有?野係整定，或者一早已經有跡可尋… 


而宜家，係呢間茶記常伴我既，只剩下碟餐肉煎蛋飯，同腦海中既一首歌…

https://www.youtube.com/watch?v=y7o7mkluepE

全文完