[情人節限定短篇] 餐肉煎蛋飯，毒撚既午餐: 第三章：毒撚見家長

係大半個鐘之後，又有人黎到，呢次係三男三女，三個男人一袋二袋咁行埋黎，唔使睇都知梗係炭呀，野飲野食果類野，男人注定係要做粗重野架喇。


咦？睇睇下果三位女士，呀唔係，係一位auntie、一位女士同一個細路女先岩。點解好似有少少面熟咁既？


「阿媽阿爸！阿姐！靚妹！」E小姐大聲叫道。


嘩無啦啦成堆屋企人走出黎，我真係比個場面嚇一嚇。話晒第一次工餘時間出黎gathering，就連人地成家都見埋，真係搞到我呢個毒撚尷尷尬尬咁…






「你地叫auntie uncle就得架喇！」E小姐望望佢娘親之後對我地講。

「Hello auntie!！Hello uncle！」我地一一跟住打聲招呼。


「唔。」Auntie笑笑口咁回應我地，之後就坐底同uncle係旁邊睇住個靚妹。感覺上aunite散發出一份霸氣，有一種威嚴，反而uncle係一旁嚴重缺乏存在感，睇死佢都係比人食住果隻款。






「等我黎介紹，呢位係傑傑，呢位係子明，至於另位係我家姐Emma。咁呢位就係毒撚Don喇。」

E小姐大大聲咁介紹道。


「Hi！」我唔係幾好意思咁笑道，個心入面就一直係度屌晒鬼。


之後既流程都係男既去透爐同準備野飲野食，女既係度不斷影相upload facebook，除?uncle係度打機同auntie睇住個靚妹。我一邊同標準高登仔身高既傑傑墊檯同開野食時一邊吹水，先知道原來佢係阿Sue既同事，而子明就係E小姐佢地既，而位細路女就係Emma個女。






當一切野準備好晒燒得野食時，我地就男既女既各坐埋一邊。雖然我同傑傑子明佢地第一次見，不過佢地都好nice，所以我地都好傾得埋。而係燒野食期間，我發現E小姐比Emma更照顧個細路女，而個細路女都好痴佢。


有一次拮野食咁岩得我同E小姐一齊，之後我趁機會問佢姐夫同佢男朋友點解無黎。


「姐夫今日返工，男朋友佢今日唔得閒黎。」佢一臉漫不經心。

「哦。」我亦無再問落去。


我地嘻嘻哈哈咁就完?日，之後一段時間又回復平常日子，都係放工後係whatsapp度傾多一兩句。






直至突然有日返工時收到E小姐whatsapp：


「星期五晚收工後去唱K？？？」