《我炒咗車之後入廠訓咗四年覺》: 飯後活動
食完飯之後，我同咗晴晴去佢屋企…
個廚房幫手洗碗啫。唔好以為我去做果啲嘢。
我：係呢，晴晴啊？
晴晴：嗯？
我：你而家咁靚多…喺學校應該好多男仔追你喇？
晴晴：喂！咁即係話我以前唔靚啦？！
我：唔…唔係！…你以前都靚，不過而家嘅你仲靚之嘛！
晴晴：哈…玩語言藝術喎！
我：(苦笑)
晴晴笑話：而家又真係多男仔追嘅…
我：嗯…咁有冇拍拖吖？
晴晴：冇啊！
我笑問：點解嘅？啲仔唔啱你咩？
晴晴：嗯…仲有個好朋友，放唔低。由此至終我都好鐘意佢，不過佢之後有幾年時間就消失咗，係最近先撞返佢…
我：佢消失咗呢幾年之間，你都係對佢念念不忘？
晴晴：係…我仲對佢有感覺…
我：咁你而家仲同唔同到佢聯絡？
晴晴：同到啊！
我：既然仲揾到佢嘅，咁就要把握機會約佢出嚟喇！
晴晴：嗯…
我：我覺得呢…如果係真係有心追人嘅，你就好主動啲，唔好等佢主動喇！主動呢啲冇分男女，反而如果你仲未出擊果陣，人地或者你嘅情敵就出咗擊先，咁你就後悔都冇用喇…
晴晴：嗯…
過咗一段時間，我地都已經洗好碗喇。
晴晴：喂…你跟住有冇嘢做？
我：冇啊…咪又係搞吓啲模型囉…都唔知今日有咩車好影…
晴晴：我都好耐冇玩過你屋企啲遙控車喇…不如…捏返場？
我：好呀…反正咁耐都冇掂過，攞嚟過吓手癮都好。
我帶晴晴返過我屋企果邊，入我間雜物房開返塵封咗四年嘅大櫃。
全靠個玻璃閂得夠密，啲模型過咗咁耐都仲係一塵不染。
晴晴：我要呢架！
佢竟然搶先我一步揀咗我原本想要嘅AE86！
唉…就讓比佢玩啦…
咁我都唔好輸蝕，揾返架靚車先…
好…就用呢架啦…
紅van一架！
話時話…AE86同埋紅van好似真係未鬥過喎…
期待！期待！
晴晴：我一定唔會輸比你嫁！
我：睇下點！
鏡頭一轉，已經係屋企樓下條路。
"預備…3！2！1！"
我：呀！！
晴晴：哈哈！！
晴晴隻衰嘢，一下揸住我個遙控！！
可惡！我一定會追到你嘅！
我地control住架車一直沿住小路，轉左直行再轉右，好快就去咗馬路邊果段行人路。
頭搖又尾擺~飄移境界~~
，一齊揸住架遙控車左轉右轉，咪話唔爽！ 沿馬路邊向右掟個靚彎，話咁快就經過一個公園仔…
好啦！抄小路！
臨過哂成個路口咁濟，我使一招直角假身，咁就撇甩咗晴晴架AE86！
話咁快咁就喺公園另一邊出返嚟！咁就爬埋頭，真係輕輕鬆鬆鄧梓峰！
晴晴：咁都比你快過我！正衰人！！
我：嘻嘻！
之後我地一直沿路行、上天橋、圍住停車場同巴士廠就原路返歸，就咁樣一直大戰300回合…
冇…玩到黃昏啫。
最後？梗係我架紅van贏啦！
紅van以勝利者嘅資態，帶住失敗者去到一張長櫈隔嚟。而佢地嘅"司機"就一下大字形坐落去。
我：哈哈…好耐冇試過一齊陪玩得咁顛喇…！
晴晴：係呀…
我：晴晴…我而家…就得返你一個陪我玩喇…
晴晴：嗯？
我：我阿爸阿媽已經…
晴晴即刻稍稍坐正。
我苦笑一下：已經喺天堂永遠幸福快樂咁生活落去。
晴晴：…
我：…
向一個最親密嘅朋友吐咗件令到自已唔開心嘅事，內心當堂輕咗一截。
晴晴：唔緊要嫁…你唔係得返自已一個嫁，你仲有我，我一直都當你係我屋企人…以後我一直都會陪住你…
晴晴雙手已經捉住我隻手。
喺果一下，我反而覺得個心好溫暖…
亦都或者因為我地已經一齊玩咗咁多年，大家都已經唔再介意有啲咩身體接觸。