《我竟然對個夜歸女……！！》: 《我竟然對個夜歸女……！！》

《我竟然對個夜歸女……！！》

是咁的，我岩岩練完拳番屋企。時間差唔多十二點，番到屋企附近。咁我就見到前面有個女仔背影都幾靚，身材好似幾好，肯定至少係個背多fun。

行到馬路燈前，佢埃左落最左手邊條柱到。咁我就行去最右邊禁燈制，順便偷望過去睇睇個女仔咩樣啦。

點知！！佢突然蹲左係地下，然後我就聽到嚎叫聲！！咁夜黑媽媽睇唔清楚，所以我直頭成個人轉過去望住佢。

我冇睇錯，佢真係蹲左係地下嚎哭。嘩！不得了！作為一個男人，睇見個靚女喊到「fee li 啡呢」點都要做d野掛。





我諗緊好唔好比張紙巾佢，呢個時候腦海突然閃出個女仔會捉住我嚎哭得更厲害，又或者自此我地會做左朋友……

嘩！阿明又突然截住我既ff︰好心你幾廿歲人就唔好咁多幻想啦……

係既，我真係一心想幫下個女仔啫，我並冇任何不軌企圖。唔應該幻想太多。

但我又諗，我冇不軌企圖啫，點知人地點諗？個女仔點諗，街上既人點諗？

好快又有兩個男仔行埋黎過馬路。兩條友都只係望下望下，並冇任何行動。呢個時候，我覺得我地好似個d街頭實驗咁，睇下有幾多男士會主動幫女士。結果冇……





不過老實講，我毒男一個、笨頭笨腦，不解溫柔，就算我想幫都冇乜可以做到啦……

等左陣轉燈，佢有佢企番起身，喊住咁打斜行去斜對面，我有我打直行去對面。

結果，我竟然對一個嚎哭緊既夜歸女無動於衷……

唉……男人wo……