《血洗禮賓府》: 第十二章 《網絡大戰》
第十二章 《網絡大戰》
我帶家柔回到我的家裡，拿出了那兩部穿梭儀放在她面前：「呢兩部就係帶我由未來返到黎呢個時代既載具。」
家柔把一具穿梭儀放到手上，用好奇的眼光大量著這個似是用鋁合金鑄造的小盒：「你係無印良品買返黎咖？」
我當然知道無印良品是甚麼，我笑了笑：「呢度係未來的印度總統寫給印度總統的親筆信。」 這句說話有點古怪。
她邊看著信，我開始說著我的故事。
待我說完了所有經過之後，家柔已急不及待問道：「沈婷呢？究竟沈婷去左邊？」
女性對於【前度】的敏感度，無論在哪一個時代都是一樣。「我諗佢應該去左2047年，佢拎住總統既親筆信，我諗佢應該過得唔錯。」
「咁你有無掛住佢，你隨時都可以返去搵佢咖喎。」家柔一邊說，一邊揮動著那個刻著2047的穿梭儀向我示威。
「無，因為我唔想再一次被出賣。」 雖說她向我示威，但她聽過我的故事之後，氣氛緩和了不少。
「你呢句說話似乎衝著我而講喎。」她作了一個俏皮的鬼臉。「好丫，我依家走就賣你。」她一手按下那個穿梭儀的按鈕！
「唔好呀！」
「哈哈哈哈，我先無你咁蠢呀，如果照你咁講，我依家撳呢笠制去到2047咪去做奴隸？」
真的被她嚇得半死，說真的，我不能夠承受被出賣兩次。
「依家我地都同做奴隸無咩分別啦，只係時間問題。」
「你過黎丫，我俾d野你睇下。」 她似乎又有甚麼鬼主意。
她打開電腦登入到Facebook網站：「我開左幾個Facebook Page，你睇下幾快有幾多人like！兩萬個喇！」
「阿思？阿思製作？香港人不是中國人？ 呢幾個page你整咖？你幾時識改咁多圖？」 我望著家柔，簡直難以置信。
「嘻，好易之嘛，求其搵張圖跟住係上面貼d字。你睇下咁核突就知啦。我發覺如果咁樣張d文字貼落張圖到，傳播速度快過你打一篇文好多好多，仲有大把人幫你share。 拿，你睇下，話咁快就有人轉貼左去時事臺，仲有5版討論添。」
「喂喂喂你睇下，呢個巴打話你d圖核突呀。」
「超，佢咪又係睇緊，核突唔緊要咖，最緊要多人睇到裡面既內容，等佢地知道香港同中國係唔可以走得太近。」 家柔一副神氣的樣子。
「你真係好叻呀，只係靠facebook就已經可以吸引到幾萬人關心呢個議題。」沒想到她只是簡簡單單的幾張圖，已經有兩萬個讚好。
家柔拍了我頭一下：「哼，等你仲話我會出賣你！ 自己又衝動，走去六四搞搞震。喂，你快d login like 同share啦。我地一人負責一個page！」
「好好好，依家就like。 咦，點解呢個陳教授add左我既？」
「係喎，仲有個inbox message添既？你快d開黎睇下啦。」
『後生仔， 我認同你既想法， 但係你似乎用錯了方法。 要是老夫出手， 一掌就打曬班共產黨落地獄， 然後捉班賣港賊去紐倫堡大審判喇。 哈哈哈。』
我望向家柔， 二人異口同聲：「癡線佬！」
「喂， 原來呢個陳教授拍低左你呀～」 家柔搶去我手中的滑鼠， 打開我在晚會上的講話。
『要救中國， 我地必先自救！我地香港人唔可以相信綠色既政黨......』「嘩， 好多人鬧你呀。 」
「隨便， 佢地只係暫時未醒覺者， 到佢地醒覺， 就會明白我今晚講既一切。 」 我翹著手放在後腦， 一副不在意的樣子。 但其實我心裏十分在意， 為何人們還是不懂。
「喂， 你睇下， 時事臺d人除左鬧你， 同時又有好多人問你支旗係邊度買喎。」
「你幫我答佢地， 係重慶大廈有得賣， 果度有個專賣國旗既印度伯伯。 」
家柔又忽然拍了我一下：「喂我諗到樣野， 我地係高登賣旗啦， 又可以賺錢。」
「我都唔等錢駛。」她不知道， 我戶口裏面有總統先生給我的幾千萬港幣。
「死蠢， 係make noise呀， 你可以一路搞團購， 一路灌輸你既睇法， 起碼有人會理你聽你講丫。」
我發覺， 家柔真係網絡社交同策劃的天才！
於是之後的數天，家柔繼續她的改圖，我就準備搞我的香港旗團購。
團購的反應比我們預期的還要好，50支旗在一天之內全部售罄。
「 d旗去得好快， 話咁快就有超過50個巴打話要買喇， 依家要搞第二波。 」我興奮得從家柔得頸背後緊緊箍住。
「嘻嘻， 我個facebook page都已經超過五千人讚好喇。日日都有人轉貼我地d圖。」家柔拉緊我手臂。
「只要我地一直咁搞落去， 我相信好快就會引起市民關注。 」
往後的幾次遊行活動， 那些時事臺的網民自發性的帶著那面藍色香港旗遊行， 瞬間成為大眾以至傳媒的焦點。 在傳媒的報導跟家柔的改圖引導下， 他們開始想著一個問題， 這面旗幟究竟背後蘊含著甚麼的故事， 又帶著多少人快樂的集體回憶。
當這面旗的意義開始有著不同的詮釋， 引起迴響之際， 親中的媒體已經急不及待的進行各式各樣的打壓。 他們天真的以為將這面背負著歷史的藍色旗， 冠以港獨這個不義之名， 就可以把正在萌芽的各種思想打壓。
然而， 本來毫無市場的港獨意識， 經過一輪炒作之後， 反而將這個連香港人自身想都不敢想的議題一次過釋放。 加上一連串中港矛盾逐漸浮現， 恰恰給各種主張添上了養份， 一時之間， 港獨、城邦自治、反中、反共、脫中的主張每天都沒完沒了的出現在那個時事臺上， 從而引申到市民的生活裏。
這個喋喋不休的現象就一直維持著， 進入了一種拉鋸的局面。 市民逐漸意識到平日本以為微不足道的瑣事事， 原來都被中共牢牢控制著。
除著我和家柔的幾個Facebook page和藍色香港旗的出現， 有人東施效顰般經營著一些以【愛港】為題的fan page， 這個和我們唱反調的組織無疑成為撕裂社群的催化劑。 在網絡上幾乎每天都爆發輿論大戰、改圖大戰。
除了網上， 更加令世界摸不著頭腦的事還在現實中上演。 那個組織【自發】地組織支持政府施政的遊行集會， 這幾乎是在文明社會絕無僅有的滑稽事情， 竟然日復日的在香港上演。