《結婚，從來都唔係兩個人嘅事》: 10
「嘩！好多人呀老公！」阿晴同我入到會展後見到人頭湧湧，忍唔住講咗句。
我都唔明白，呢啲咩婚禮展銷差唔多每個月都搞一次，但次次都好以人山人海咁，唔通香港真係有咁多人結婚﹖唔係話有好多剩男剩女咩﹖
「係喎，咁Q多人嘅。」我拖住阿晴不斷避開迎面走過嚟嘅情侶。
「老公，我哋睇啲咩先呀﹖」
「去買咗餅卡先囉。」
喺去搵餅卡嘅時候，我八卦問咗阿晴一個問題﹕「老婆，嗰日Bonny話同你揀婚紗時領教過Chrissie啲衰嘢，到底嗰日發生咩事呀﹖」
阿晴嘆咗口氣﹕「唉......嗰日我搵哂佢哋嚟幫吓眼揀衫，咁呀Chrissie就提議我話要搞返接新娘呀，玩新郎呀咁，話會熱鬧啲開心啲喎，又會同你有多個回憶。(原來係Chrissie呢條八婆提議嘅！)咁我諗一諗又係喎，咁我咪無問你就應承咗佢囉......你唔會嬲我個呵，老公...」佢講完就用一個好可憐嘅眼神望住我。
我都無佢咁好氣，搣住佢臉豬登講﹕「係啦係啦，我點捨得嬲我嘅老婆大人呀！」
阿晴回咗我一個好甜嘅笑容，繼續講﹕「然後佢又話要做伴娘喎，咁我心諗小惠同Bonny都結咗婚，好似唔做得伴娘，佩妍又無乜所謂，咁我咪話好囉......」
屌！伴娘呢個咁重要嘅職位比呢條八婆做，到時一定搞到一鑊粥。我都係諗定個plan B先得。
「咁好啦，我哋揀咗一輪終於都揀到婚紗同姊妹裙，我試完無問題就到佢哋試囉喎。之後佢哋個個都換好哂之後，Chrissie就話著咗上身先覺得唔靚，又話唔襯，話點都要換裙款喎。咁我諗住呢款裙係大家一齊決定㗎嘛，咁緊係要問吓小惠佢哋先啦，但佢哋個個都話無問題喎。」
「跟住呢，Chrissie就係咁話佩妍唔靚，話佢著得唔好睇，又話佢好肥，係咁慫恿佢換裙款。唉...你都唔知，佩妍讀書嗰陣因為身形成日比人笑，搞到佢有心理陰影㗎......比Chrissie講多兩講都差啲喊咁滯。」
我回想起印象中嘅佩妍，佢都唔算係好肥啫，只係個樣唔靚，皮膚唔多好，矮咗啲啲同埋有啲baby fat啫。係...我認第一眼見到佢張相就話佢係豬扒，但係識咗之後，就算佢真係豬扒都係一塊善良嘅豬扒，絕對可以食用。點都好過Chrissie同Jessica呢兩條八婆啦！不過我利申咗先，我已經有阿晴啦，就算塊豬扒幾咁善良都好，我都唔會掂㗎！
「嘩！乜Chrissie把口咁賤㗎！好心你就同佢絕交啦！」
阿晴好無奈咁講﹕「咁話哂都由細識到大......」
唉......阿晴就係咁，真係人善被人欺，馬善被人騎。
我無繼續叫佢同Chrissie割席，繼續問﹕「咁跟住點呀﹖」
「咁我無辦法，咪話你自己想要咩款就咩款啦，同色就得喇。」阿晴停一停，又講﹕「點知佢就話呢，見過朋友嘅姊妹團著哂金色系嘅姊妹裝覺得好靚，仲話係個新娘贊助啲姊妹去訂造嘅，話只係around 700蚊一個人......」
嘩屌！姊妹裝咋喎，著一次唔著個囉喎！你要我哋專登做條裙比你﹖仲要成七舊水﹖
「Bonny聽到就話喇﹕『其實我覺得呢套紫色已經幾好呀，阿佩妍都著得好好睇呀，同埋我覺得金色唔襯我哋囉，又太搶眼，搶埋晴晴鏡。』其實我覺得佢咁講係因為想錫住我荷包啫，佢同小惠著咩色衫都襯㗎啦。」
我點頭大表同感，但我同時都笑笑口講﹕「咁我老婆仔都係啫，佢都係著咩都咁靚！」
阿晴冧滋滋咁篤咗我塊面一下﹕「口甜舌滑！」
阿晴繼續講﹕「Chrissie就話Bonny唔識嘢啦，又同我講話嗰件姊妹衫好靚呀咁......」
「之後又點﹖」雖然我知道最後都係揀咗紫色嗰套，但我都好想知道阿晴點樣ban咗Chrissie。
「跟住小惠就話﹕『既然姊妹裙係大家都要著，咁不如投票啦，晴晴你係新娘所以無得投。』」
我問﹕「最後3比2﹖所以套裙變返做紫色﹖」
阿晴搖搖頭﹕「係3比1先啱，小惠，Bonny同佩妍都揀咗紫色，得Chrissie揀金色。」
「咦﹖Jessica呢﹖佢唔係應該會支持Chrissie咩﹖」Jessica同Chrissie聽聞都幾好姊妹，果然係臭味相投嘅八婆。
「Jessica嗰日臨時有事嚟唔到。」
原來係咁，唔怪得啦。不過放人飛機對佢嚟講根本係家常便飯。
「就係咁所以Bonny咁唔鐘意佢﹖」直覺上我覺得唔係咁簡單。
「老公你嗰日都聽到㗎啦，佢咪介紹咗個明星化妝師比我嘅，佢想叫我搵呢個然後順便幫佢化埋......」
順便﹖你去送殯叫個死人化妝師順便幫你化埋呀笨！
「咁我一早諗住叫Bonny幫我哋化㗎嘛，反正都係要比錢，比街外人賺不如比自己friend賺啦。」
「咁又係呀，雖然我哋夜晚同長輩食飯求其都得，但係起碼都要請半日化妝師啦，呢度都唔少錢......係呢，Bonny真係唔肯收錢呀﹖」
阿晴點點頭﹕「係呀，我都覺得唔俾返錢佢唔好意思，但佢又唔肯收喎，話當係送比我嘅結婚禮物喎。」
呢啲咪就係真正朋友囉！
「咁我到時封大封啲姊妹利是比佢啦！」
阿晴笑道﹕「好呀！」跟住又講﹕「咁我咪話嗰日Bonny會幫我哋化妝。咁Chrissie就細細聲話﹕『吓佢呀﹖得唔得㗎﹖』，我諗係呢句比Bonny聽到啩。」
原來如此！唔怪得嗰日Bonny見到Chrissie出現之後好似面色唔多好咁啦。
我即刻話﹕「超！就算比個星級化妝師佢都救唔返啦，搵個整容醫生比佢就差唔多。」
阿晴「咭」一聲笑咗出嚟﹕「老公你咪咁衰啦。」
行吓笑吓，好快我哋已經買好餅卡，又訂咗花球同襟花，連證婚律師都搵埋。係搵攝影師嗰度有啲煩，左睇右睇終於都搵到間肯做半日嘅，可以比到1p1v(一個影相，一個拍片)，睇過啲相都算合格，希望無咩問題啦。