《結婚，從來都唔係兩個人嘅事》: 01

一個月前。

「媽咪，我諗住同阿晴結婚。」

阿媽望咗我一眼﹕「你係咪比人迫婚呀﹖」

我搖頭﹕「唔係呀。」

阿媽好明顯無理到我講緊咩，轉咗做教訓mode繼續講﹕「我一早就同你講㗎啦，叫咗你唔好揀個年紀大過你嘅，你又唔聽阿媽講(老媽子，戀愛嘅嘢，你識條鐵咩)。你話你呀，你而家先得25，佢就已經27 ，女人過咗30歲就好易老㗎啦，而家咪比人迫婚囉，啲女人個個都想30歲前嫁得出㗎啦(而家係你個仔想同人結婚呀！唔關個女仔事㗎！)。而且佢又好快做高齡產婦喎(喂喂喂，老老竇竇，我同佢都無諗過生囉，係你想生咋喎，唔好屈我哋喎)。佢又生得矮，生出嚟嘅都唔知會唔會好似佢咁矮(咁唔生就得啦)。仲有呀，你咪話佢老豆中風去咗嘅，呢啲病都唔知會唔會遺傳(喂你唔好自己以為係就當真啦，我無聽過中風係遺傳病囉)。」





當然以上嘅嘢我都剩係喺心裏面諗，講咗出嚟，仲唔即刻炒大鑊咩﹖

呢啲嘢其實由佢第一日見到阿晴已經同我講過，於是我維持之前比佢嘅反應﹕「哦...哦......哦......」其實就係無反應。

阿媽又繼續返頭先個問題﹕「你其實係咪比佢迫婚啫﹖定係佢屋企人比壓力你﹖」

我開始唔耐煩﹕「無呀，真係無呀，係我想同佢結婚咋。」阿晴同我一齊咁耐從來都無提過結緍嘅嘢，亦都無迫過我做任何事。加上佢又識煮飯，又識打理家頭細務，完全係賢妻良母。最重要係完全唔介意我搵幾多，亦都唔會好似啲港女咁要買乜買物。我帶佢食麥記又好，譚仔又好，茶記都好，就算係留喺屋企煮個麵都完全唔會咋我型。床事又滿足到我，我想點佢都盡量配合。身材樣貌仲要唔差。你話喇，呢啲女仲可以喺邊度搵呀﹖

老實講，娶老婆娶到呢啲，真係夫復何求﹖阿媽你到底明唔明呀﹖





阿媽靜咗一靜，又繼續教訓我﹕「阿仔你話哂都大學畢業呀，點解你唔搵個好啲啫，駛唔駛我介紹啲比你呀﹖」

好明顯阿媽真係唔明，佢都唔知我呢啲喺香港濕鳩大學出嚟嘅，一個招牌跌落嚟都可以砸死幾件。搵錢又唔係多，職位又唔係高，前途又唔係特別好，個樣又唔係好靚仔，難得有個咁好嘅女仔肯陪我過下半世，舊飯就算食咗落肚消化埋都即刻?返出嚟應咗佢啦，唉......

我即刻落閘閂咗個對話窗框，而且回絕老媽子的「好意」﹕「得！唔駛！我哋唔講呢個話題啦！」



 
當時我心諗，結婚係我哋兩個嘅事啫，就算而家阿媽喺度依依哦哦，到時我哋搞好哂啲嘢，佢都無得say no㗎啦。





之後我就無理到阿媽，繼續我嘅求婚大作戰，而一個月後亦都好順利咁求婚成功，阿晴正式成為我嘅未婚妻。