《我可以做你的樹洞嗎?》: 22.失蹤

佛洛伊德講過：「夢可以反映人既潛意識。」

例如，當你好掛住某個人時，你會係夢中見到佢，彌補現實見唔到佢既遺憾。

同曉凝分開既呢三個月黎，佢出現既次數都算唔少。

不只兩年感情，果六七年既友情一樣重要。

而其他人都有出現過，嘉渝、雯凱、駿耀......





同完嘉渝去玩之後，佢隔幾日就飛返返去。臨走前仲whatsapp多謝我花時間開解佢。不過我今次冇送佢機，因為怕。

雯凱？自佢拉我出lecture hall深情剖白之後就再冇聽聞過佢既消息。有人話佢轉左系，有人話佢退左學，但真相係點冇人知。

而駿耀，經歷過追唔到曉凝呢件事之後反而變得更積極，轉死性走去做義工，仲俾佢識左個真女神級既女朋友。

今日駿耀就一個電話打過黎嘈醒我。

「做乜？」我睡眼惺忪地問。





「你仲未醒？兩點啦。」

我打了個呵欠，冇回答駿耀。

「之前你同曉凝參加果個攝影比賽贏左亞軍呀，今日頒獎呀。」

曉凝呢個名，已經好耐冇聽過。

「佢自己攞咪得囉。」





雖說口是心非係女人既天性，但唔代表男人唔可以。

「你唔記得比賽主題係「雙雙」？內容要表達到主題，連攞獎都要。」駿耀繼續講:「要一雙一對咁攞獎。」

* * *

我去到頒獎場地，雖然只係一間房，但房既前面搭左個台同佈景版，簡單得來又帶點莊重。

而到場既只有小貓三四隻，睇黎對攝影有興趣既同學唔多。

我自己坐係最後排既角落位，等待頒獎禮既開始。

仲有你既出現。

時間一分一秒咁過去，到場既人亦都愈黎愈多。





但係冇一個係曉凝。

「而亞軍，就係凌佑霖同林曉凝。」突然主持將三魂唔見七魄既我召喚返黎。

曉凝依然未到。

我一個人匆匆忙忙咁走上台攞獎，仲差啲跌倒。

「......不如講下你既得獎感受?」主持見曉凝冇黎到，但我又上左台，猶疑幾秒後講。

原來要講得獎感受? 我咩都冇準備。

不過即場爆肚係我專長。





台下數十對眼睛望著我，等待我發言。

「um…...呢個比賽係曉凝叫我同佢一齊參加，所以贏左我好多謝佢。曉凝係一個對我好重要既人。識左佢都十幾年，我地大家都係彼此既樹洞，知道對方好多好多秘密。

直到一次意外，我地係埋一齊。

由友情變成愛情，轉變梗係大。由以前無需要顧忌，鐘意點揶揄對方就點揶揄對方；變到每步都小心謹慎，好似唔敢得罪對方咁。

一齊之後我地就差唔多冇再嘈過交，因為我地實在知道對方太多野，知道對方點諗，知道自己應該講啲咩做啲咩。

我地既關係好似變成一條公式咁，只要將啲數sub返入條式到，就所有野都可以解答到。

但係，我後來發覺愛情唔應該係咁架，應該喜怒哀樂丶事無大小都同對方分享。愛情唔係一條公式，愛情係愛情本身。

但係，到我發現時已經太遲啦。」





台下既人目無表情。

「不過，我始終都要多謝佢。多謝佢付出過既一切。」

講完之後我就返落台下，主持亦開始係台上播出得獎既相片。

睇住果啲我地一齊影既相，百般滋味在心頭。

明明係我地一齊完成呢個壯舉，但係最後點解只係得返我一個人行。

我無意望到其中一張相，係佢係我唔為意既時候，用低炒既角度同我自拍，背景係一座摩天輪。

陽光從右邊照耀在曉凝既臉上，顯出一份青春既氣息。





我望住曉凝莞爾一笑，好自然好靚。點解果日佢會提起想同我分手既藉口？

望住曉凝出自真心既笑容，我好想知道佢究竟點諗。

曉凝既笑容係假裝出黎既?

所有野都只係我自以為了解佢?

但係恐怕答案只有曉凝先答得到我。

頒獎禮過後，我試過搵曉凝，問下佢幾時得閒出黎攞返個獎，當係我可以再見佢一面既藉口。

Whatsapp、facebook、ig、email、打電話、上門拍門，什至寄信。所有方法我都試哂。

但係，曉凝音訊全無，好似人間蒸發左咁。

到final year，我什至去佢要上既中文堂sit堂，嘗試打聽佢既消息。

雖然曉凝好受歡迎，但係連同佢平時一齊玩開既同學都唔知佢去左邊。

一個人可以心思細密到咩程度，先可以令所有人都唔知佢既去向？

但係，就算你走盡所有堂去避開我，果一日你始終會出現。

考試當日，我去到曉凝既考場等佢。