《我可以做你的樹洞嗎?》: 12.你愛我嗎

自曉凝同雋瑋分左手之後，為左令佢快啲好返，我經常同佢一齊食飯丶溫書丶打波丶跑步。

時光好似倒退到高中同小學果時，我倆形形不離，卻樂此不疲。

我地兩個之間感情本身已經好好，但係經過呢一段日子之後，感情好似昇華左去另一個層次咁。

友達之上，戀人未滿，差半步就可以係埋一齊既層次。

而今日，係我地一齊參加渣打馬拉松既日子。





曉凝一大清早就已經出發左，而我就因為想訓耐啲所以遲啲先去。

一到達城市花園既時候，就見到一大堆人熱身準備緊......

「佑霖！」離遠就見到曉凝企係石壆上向我招手：「快啲熱身啦！」話口未完，曉凝就將隻腳浪上石壆開始拉筋，仲要拉到一字馬咁濟。

我慢慢行過去，一幅美景映入眼簾。

曉凝扎住馬尾，著住黑色既運動tee，大顯佢玲瓏浮突既身材，再加上一條粉紅色運動熱褲，露出佢果對四十寸長腿。雖然冇四十二寸，但都足夠令人大開眼界。





身為一個男人，如果我冇怦然心動就假......

「望咩呀望？快啲拉筋啦！一陣整親唔鬼理你架！」曉凝講野既時候，同時發現附近既男性都對佢對美腿虎視眈眈，於是曉凝行開左。

雖然，今次只係跑十公里，但係我都有啲擔心......因為曉凝話想跑步去分心，令自己盡快忘記雋瑋，所以我先至陪左曉凝跑幾次。雖然中學時我都算係運動健將姐，但係上到大學後一早懶到出汁。

做足熱身後，我同曉凝一齊踏上起跑線上......

「嗶！」槍聲響起，各位跑手隨聲起跑。





於是，我同曉凝並排住咁跑。

就好似前幾次陪曉凝一齊跑咁，我同佢都帶上耳機......

「只要伸出我的手
總會找到活的理由
只要抬起我的頭
總會看到天的庇佑......」

一直跑一直跑，唔知關唔關我平時跑開夜晚事，我漸漸落後曉凝。

而從後望向曉凝，加上前面陽光既配襯，我終於明白點解啲人叫曉凝做女神。

「是否約好一起走
會否永遠一起飄流




太少理想依舊 太多青春生鏽
我不懂 什麼叫成熟
最好 最後 我愛 我恨 我有......」

跑到筲箕灣，我漸漸雙腳無力，而且個心口好痛......

......

......

......

「我係邊度？」

我望望周圍，一片空白。





然後有個人從我身後拍我膊頭。

「咦？」化住淡妝，著住連身白裙既妙齡女子同我講：「居然黎左呢度？」

我一頭霧水。

「返返去啦！」佢舉住手行埋黎，好似想推走我咁。

「喂咪住！」我開始醒起，我訓低之前係跑緊步，換言之......

「我呢家係天堂？」

果位女子圍繞住我行左幾個圈，冇講野。





「你可唔可以答我一條問題？」

「見你誤打誤撞上到黎，我就答你一題咁多啦。反正，我所有野都知。」

佢俾我一種感覺，佢就係真神。但我勢估唔到，佢居然係一名女子。

早知，我就唔話靜係問一條問題啦。只要我問哂佢科學上仲未解決到既難題，即係好似宇宙起源同點樣將量子力學同廣義相義論合併，咁我都應該攞得Nobel Prize。

但係，呢家係我心目中只有一條最想問既問題。

「我會唔會同曉凝係埋一齊？」

佢皺一皺眉，然後又笑一笑。

「我都答你唔到喎。」





「咁你又話你所有野都知?」

「咁你當我講錯囉!」佢叉住雙手，用完全錯哂既語氣黎認錯。

估唔到神都只不過係個港女。

* * *

朦朧間，我感覺到個頭好痛，聽到周圍既人係到講:「幫佢做人工呼吸啦!」

下?

我嘗試微微張開雙眼，發現曉凝嘴左我一啖。

曉凝濕潤既嘴唇，帶有士多啤梨味。

好甜......

然後佢將氣呼入我個口入面。

「你捨得起身啦咩......」曉凝一邊喊，一邊講:「你知唔知我以為你會死呀?」

經過曉凝幫我做人工呼吸之後，我終於有氣力起返身。

望住因為我而喊既曉凝，我二話不說就攬實佢。

「對唔住......」曉凝什至搞到連我都喊埋:「我以後都唔會令你擔心架啦!」

有句古老說話叫做「珍惜眼前人」。字面解個個都識，但唔係個個都做得到。

而呢一刻我先知道，我要珍惜既眼前人係邊個。

由細細個我地已經係彼此既樹洞，最熟悉對方既人。

升到中學，即使初中時你讀精英班，我讀其他班，但係升到高中我地終能重逄，依舊好似小學時咁兩小無猜。

即使我地曾經反面丶分隔左一年，但係升到大學我地都能夠冰釋前嫌。

呢一切一切，一定係天意。

係個天要我地係埋一齊。

「曉凝。」我鼓出我最大既勇氣:「做我女朋友!」