《我可以做你的樹洞嗎?》: 9.男神女神也有心事

「果然咩都避唔過你既法眼？」曉凝苦笑一下。

「唔洗問，又係佢啦？」

我口中所講既佢，就係同曉凝拍左拖三年幾既男朋友，雋瑋。

一直以黎，佢地兩個係好多人眼中都覺得係模範情侶。甜蜜到一個點係連中學老師都講笑咁問佢地幾時結婚。

係架，本身佢地真係咁親密登對，直至中學畢業後曉凝向我傾訴我先至完全改觀。





中學畢業後，雋瑋馬上就考入大學，而曉凝就做左自修生。

兩人分隔左條地鐵線，各有各忙。雖然親密程度好似一般拍得耐拖既情侶一樣減退，但未至於分手。

直至今年，分左好多好多次手。

* * *

曉凝俾我講中之後，只係低下頭深思。





「冇事既......」我差啲就講埋「希望在明天丫嘛！」：「你地天生一對架喎！」

其實，我知，曉凝知，雋瑋都可能知。只不過現實實在殘酷，殘酷到我地都唔敢講真相。

「我真係好赲啦......只係得我一個人，真係好難維持到呢段關係......」

其實，曉凝係真真正正愛情既奴隸。每一次見面，都係曉凝約；每一個電話，都係曉凝打；每一個短訊，都係曉凝send。

就算曉凝幾心灰意冷都好，只要雋瑋主動少少搵佢一次，哪怕只係whatsapp曉凝一個表情符號，都足以令曉凝開心到訓唔著。





人生若只如初見，何事秋風悲畫扇？

「最多我借個膊頭俾你啦！」一個強壯既膊頭應該係呢家我可以為曉凝提供既唯一幫助？

「唔洗啦！」點知曉凝一下推開我：「廢事俾你抽水啦，咸濕仔。」

「......好囉，你要果陣唔好求我喎！」

點知，曉凝一下撲落我到。

* * *

自果次活動之後，唔知點解雯凱係我面前冇乜點出現過。平時上lecture我同佢一齊坐架嘛，但呢家上lecture時都冇乜點見過佢。

我曾經擔心過佢唔知出左咩事，搞到成日走堂。於是whatsapp同打電話搵過佢。





但係，雯凱只係一直話冇事，唔肯同我講佢究竟面對緊啲咩。

我係個冇咩耐性既人。係連番追問下都問唔到結果底下，我決定都係唔好煩住雯凱，俾佢一個人靜下，自己諗下點解決佢面對緊既問題。或者佢諗通左之後，會主動搵返我幫手。


* * *

上到大學後既呢一年幾黎，我既字典多左好多唔同既terms。例如獸父組媽、用黎報感情狀況，最稀有既清泉A0，或者係身經百戰既A380空中巴士。

而出現率最高既，莫過於女神同埋男神。

由周星馳主演既食神入面，有一句台詞：「根本就冇食神，或者人人都係食神。老豆老母，呀哥細佬，條女條仔，只要用心，人人都可以係食神。」

而我就話：「根本就冇咩男神女神，或者所有雄性都係男神，所有雌性都係女神。」





我唔知係咪呢個世代興啦，只要一個女仔或者男仔，係面書、ig呢啲社交網站貼出有佢地個樣既相，例如soc相同自拍咁啦。就一定會有成堆人湧出黎讚好同留言:「男神呀! 女神呀!(心心眼) j die me la！」 個個人都進入無人之境，完全唔需要理會其他人或者post相果位既感受。

又或者俾人叫做男神同女神既，真係以為自己係神。

我冇試過打呢啲咁虛偽既野，一向低調既我只不過係呢個風氣上扮演住花生友。而今日我就係canteen入面，同樣扮演住花生友一角。

* * *

事緣今日我dayoff，而且又唔洗返part time。於是我訓到三點幾先起身，然後落canteen食tea。

一落到canteen，居然出奇地多人。買完野食之後，都要搵一陣先搵到位。

而坐係我隔離枱既，係女神Suki，同佢一眾觀音兵。





向來我對日譯英文名好反感。Suki?邊度su邊度ki呀?但係個名係呢度唔係重點，重點係Suki姐同兵仔們之間發生既事。

* * *

「Suki呀，你要既梳屎我幫你整理好哂啦。」一號兵仔遞上一疊幾cm厚既A4紙。

「哦。」Suki依舊禁緊佢部唉瘋，應該係同緊佢既男神whatsapp緊。

「Suki呀，我買左你最鐘意食既洋腸炒飯呀！」另一位觀音兵拿完野食後行到Suki對面。

「好呀放低啦。」Suki依然冇停過手，雙眼同時目不轉晴咁望住部唉瘋。

而佢身邊既幾隻兵仔，就一碌木咁坐係到，唔敢出聲，只敢等候觀音娘娘既下個指令。

觀音娘娘一直whatsapp，心情就變得越黎越眉飛色舞，而兵仔就越黎越悶悶不樂。





直到過多三四分鐘後，娘娘終於放低手機，俾佢班兵一睹佢既正面。

「唔該哂你啲梳屎呀Ken。」Suki露出佢既笑容以示感謝，同時將疊紙放入手袋。

「......唔洗客氣，下次有咩都要搵我幫手喎。」呀Ken r住頭咁答。

正當大家都排住隊，等Suki派軍糧既時候，佢既手機又響起。

「唔好意思呀，我要走先啦。」Suki望完手機後，尷尷尬尬咁向兵仔道別。

道別後，現場就只係剩返原封不動既洋腸炒飯，同埋一堆無所適從既兵仔。

「唉......」呀Ken係Suki走左之後率先訴苦:「Suki唔係第一次叫錯我個名架啦。」

「你咪算好囉，起碼女神會同你講下野。」另一隻兵仔又開始講:「我有得見下佢已經好心滿意足架啦......」

「唉......」幾隻兵仔異口同聲咁唉聲嘆氣。

佢地嘆氣嘆到我終於忍唔住。

我一手掉走枱上岩岩食到一半既花生，然後一下衝埋去果班兵仔到。

「由你將條女定義為你女神果一刻開始，你就已經輸撚左!」我向住果班兵仔吶喊。

「你幾撚時見過女神會同個自己都認為自己卑微既人拍拖呀? 你幾條仆街唔好話追女啦，連男人都不如呀!」

只見佢地俾我罵到低哂頭，變哂死狗咁。雖然佢地的確係冇可能反駁到我，但係佢地連試下反駁都冇。

面對住呢幾條廢柴，我實在嬲到核爆。

「係男人既就要追到你地女神上手，唔撚好成碌鳩咁乜都唔做剩係識得等，然後等到自己女神俾mk仔玩弄先黎後悔！」

呢班兵仔終於俾我激發起鬥志。雙眼中好似有團火咁，然後一齊衝出canteen門口。

當然，以上純為ff。現實中既我，只敢獨自一邊食住個豆腐火腩飯，一邊暗底裡恥笑佢地。