《我可以做你的樹洞嗎?》: 7.樹洞崩潰

「我從來未遇過一個好似你咁好既人，咁關心別人，會收埋悲傷獨自承受，又對個ex咁長情專一既人。」雯凱低住頭講，然後又突然抬起頭:「我知道我呢家向你表白，你一定唔會say yes，但係......但係我會一直等你，等你接受我。」

我先考慮既唔係佢對我既情感。而係，點解佢知道我咁多野?

「係曉凝同你講既?」我暫時按捺住我既怒氣。

「下? 係呀。」雯覺得莫名其妙:「起初我以為你地係一對，但原來你地只係朋友。佢仲好支持我。」

後知後覺既我，到呢一刻先知呢個活動對我既意義係邊。





我拋低雯凱一人，獨自一個人跑去個亭到搵曉凝。

「你做咩爆唒我啲秘密俾雯凱知？」我衝入人群怒轟曉凝。

然後成班人一齊望實我。

曉凝尷尷尬尬咁拉我埋一邊。

「發咩花癲呀你？」曉凝不知悔改咁講：「岩岩好多人係度架！」





「你講呀！」我已經嬲到口震：「點解要呃我黎呢度？點解要講我啲秘密俾佢知？」

「我冇呃你黎呀，我都唔知黎參加既係一對對既情侶。咁岩雯凱又一個人黎姐，我都唔知架。」曉凝個樣表現到真係咩都唔知咁。

「我當你真係唔知啦。咁你爆我啲秘密俾佢知又點計呀？」

「講你既性格俾人知都叫做爆你既秘密？」

我一時真係唔知點答。





又或者，自細至呢家同曉凝罵交，我已經注定係輸果一個。

「我都係為左你好姐......？」沉默過後，曉凝首先出聲：「雯凱係個好女仔黎，你知架？」

我一早已經知。

我依舊唔出聲，只係呆左係度，望向遠方既一座山。

「都過左咁耐啦......」曉凝移過佢個身，迫我望向佢雙眼：「你仲係放唔低佢？」

係呢個情況下，我終於忍唔住。

我撲向曉凝，緊緊咁攬實佢。然後好大聲，好大聲咁喊出黎。

腦海入面回憶返以前，同嘉渝之間既一點一滴。





我同嘉渝去海旁既觀景台，我坐左邊佢坐右邊，一齊望海望足一個下晝。

我同嘉渝去樓下既糖水鋪，我地一齊食糖不甩，輪流餵對方食食足一晚。

我同嘉渝去尖沙咀既倒數，我地一齊攬實對方，講過每年都要同對方過。

我同嘉渝係機場上既別離，佢話以後唔好聯絡，佢走左之後要快啲忘記......

「樹洞呀樹洞！」我既雙眼已經被淚水掩蓋：「我想講個秘密你知呀：我仲好掛住嘉渝呀！」

樹洞曉凝摸摸我個頭，一言不發。

等到我喊完之後，曉凝再次摸摸我個頭，然後繼續講。





「樹洞呀樹洞！我都想講個秘密你知呀：就係佑霖一定可以忘記嘉渝，然後搵到個好好，好似我咁好既女仔。」

我俾曉凝最後搞笑果句tum到笑返。抹乾眼淚之後，睇見休息時間都差唔多完，於是就準備起行。

點知我見到企係我面前，雙眼通紅流緊眼淚既雯凱。