[舊文重修] 假如蝙蝠俠想做的，其實是小丑。: 2.

凌晨兩點，街上只有一個人影。
包租婆。
呢區治安一向唔好，夜晚好少人會一個人落街。條八婆夠膽一個人係度行，仲要變態到凌晨兩點上門拍醒人黎收租，有乜起事上黎，個個都會覺得佢抵死。
我就係想咁。
我跟住佢，已經行左半個鐘。
你會問：咁點解仲叫「只有一個人影」？
因為我呢家既一身衣著，你好難會發現到我呢一個「人」。
 
我戴住啱啱完成既黑色美國隊長面罩，身穿一件全黑連帽風褸、黑色手套、黑色運動長褲同全黑波鞋，完全係電視劇入面既所謂「黑衣人」。
雖然偶有夜風，但係夏天要我著成咁真係好熱好難頂。




不過就算幾熱都好，我連風褸頂帽都載埋，我要自己有幾黑得幾黑，愈能夠隱藏係黑暗裡面就愈好。
因為我絕對唔可以比人知道我身份，絕對唔可以失敗。
我呢家係為左我既人生而拚命！
 
記得細個個陣，阿媽成日屌鬼我行路冇聲嚇親佢。
估唔到我呢個習慣，今日竟然幫左我一個大忙。
我跟左佢咁耐，佢竟然冇發現過我。
加上我左避下右避下，十足特工片入面既跟蹤技術，條八婆都幾難見到我。
我選擇今晚落手，係因為我知佢除左收我租之外，今晚仲會去其他屋收租，收完就會返屋企數錢。
而我就係要打劫個皮幾野租金！




一諗到用打劫佢得返黎既錢，愛黎交租比佢，心裡面真係爽過可以大戰法拉。
 
佢行左入後巷。
你睇下佢幾戇鳩，咁既時間咁既地方仲要入後巷，唔郁手真係對唔住我列袓列宗。
望住佢個已經成五張幾野，但依然毫無廉恥地左右擺動既屎忽，除左忍住個陣吐意之外，我仲決定左一陣打劫之餘，仲要打鑊佢。
 
我加快腳步，手中亮出一把刀仔，準備從後打佢老劫。
 
我以為我既人生會由呢刻開始轉變。
我會成為第二個葉繼歡，用一支AK47開拓我既夢想。




希望就係我前面。
人生的確轉變了。
 
「八婆，打劫！」
後巷響起呢句說話，嚇到包租婆尖叫起黎。
不過，句「打劫」並唔係由我講。
 
包租婆前面突然彈出一個中年男人，同樣手入面有把刀仔，刀尖指住包租婆個喉嚨。
「救命呀！救命呀！」
「屌你咪撚嘈！再叫多聲我一刀捅死你！」
「求下你！劫財好喇，唔好劫色！」
 
如果係平時，我會答佢一句「你好安全」。
但係我已經諗唔到野，呢刻我真係好撚嬲！平生第一次咁憤怒！
點解？點解個天要咁玩我？




我人生從來冇成功過，不論讀書、愛情、做野，全部都係失敗收場。
點解到左絕路，淪落到做賊，都要咁樣比人截糊？
點解！點解呀！我屌你老母！
 
我失去理智。
唔知點解我掉開把刀，係包租婆身後衝左上去。
可能我呢刻已經唔想生存，心裡面乜野都冇，只剩一團虛無般既怒火，同對呢個世界既強烈控訴。
賊佬比我嚇左一嚇，我一個手刀打甩左佢把刀。
頂，隻手好痛。
可能我突然既出現，加上我一身打扮，令到尖叫既唔再係個八婆，而係賊佬。
我一手禁低佢落地，用全盡身既力，一拳一拳鋤落佢塊面度，好快佢就爆晒缸，暈左。
我從來唔知自己咁好打，我唔知係咪怒火令我既腎上腺素急升，我乜都唔知。
我企起身，望住訓係地下既賊佬，靜左一陣，靜到連風聲都聽到。
屌。
 




突然，我見到包租婆既身後出現兩個人影跑過黎。
仆街，警察。
平時又唔見會有警察行咇，今晚做野先黎浦頭。
我心諗，一切都玩完。
我閉起雙眼。
「咪郁！差人！」
「太太！冇事丫嘛？係咪你叫救命？」
「係呀！打劫呀！」
「係咪佢？」
「唔係，佢救左我！」
咩話？
我張開眼，見到佢地三個難以置信既表情，心裡面一片空白。
仲有一個字：走。
我唔知點解自己要走，我咩都唔想諗唔想面對。
我立即執返地下我掉個把刀，轉個身跑走，唔理啲警察既阻止，離開呢條後巷。




 
人生的確轉變了。