深缺: 深缺-Part7

不經不覺， 攝影班已經上到第三堂。 

到左落堂前， 李sir同我地講: 

"提提大家一樣野， 記得第六堂係户外實習， 上堂日期會改後一日， 即係星期六， 時間係上午十點到下午六點。 麻煩咁多位同學記住帶相機同腳架。 另外如果可以的話， 拎多一塊CPL 鏡片*。"

 * CPL鏡片常用於風景攝影，用來消除掉不必要的偏振光/反光，讓整體的畫面更清澈，更有通透的感覺* 

此時課室內傳出多個聲音。 





"我啱啱買左塊德國造嘅CPL, 差唔多千五蚊，實掂啦" 講緊野係亞叔。 表面上佢係同佢朋友講緊， 但事實上， 由佢提高聲線呢個舉動就可以知道佢想話比全班人知佢買左塊靚（貴） CPL。。。 

"我地無wor。 Amy你有無CPL呀？" 

原來"靚女" 叫Amy, 另外問緊Amy 就係果兩男兩女其中一個女仔。 

"我都無吖， 點算？" Amy 答佢話。

 "一係搵日一齊去買？" 





"都好吖" Amy 講完就同佢地一行人離開課室。

 "亞的， 安仔， 你地有無CPL?" John 少問我地。   

＂都叫做有嘅， N年前買落， 要搵下。＂ 令我諗起多年前買落果塊CPL。  

＂唔駛預我， 我果日外母係加拿大返黎， 去唔到。＂安仔呢個答案真係出人意表， 不過都啱， 萬大事都梗係招呼左外母先。  

＂噢！ 咁無計啦。 ＂我同John 少同時比一模一樣嘅反應安仔。 





落左堂， 同佢地兩個分別後， 亦係我同亞cat 講完電話嘅同時， 我係地鐵入面見到一張我熟悉的臉。。。