豬籠車內的呂布: 《十六》

多得兩位慈母對我不離不棄，當我有番記憶嗰陣，發現自己戇居居咁坐緊喺一架開往天水圍警署嘅豬籠車入面，當時我第一個反應係好驚，知道自己酒後一定玩大咗，然後覺得好撚臭，雖然架警車已經開晒窗，但係混合咗屎、尿、菜、魚同啲嘔吐物嘅空氣不斷流動，嗰種氣味真係非筆墨所能形容。


望見車入面啲母親個個戴晒口罩，一致向窗，不發一言，知道自己闖咗禍，緊係連隨道歉扮死狗啦，除咗坐我右邊嗰位慈母之外，其餘人都費撚事理我。


「阿生，你醒番啲就好喇！依家我哋你，頭先你喺天睡商場破壞中銀部提款機，公眾地方行為不檢，刑事毀壞同襲警，家陣唔係事必要你講，你明唔明白？」


「我明，但阿蛇，我頭先只係醉後一時失控啫，可唔可以就咁算啊，我保證冇下次。」






「算？中國銀行就有排同你算喇！你休息陣啦，轉埋個彎就到警署，到時你再諗下點算。」


———————————————————————————————————————————


「東，成件事嘅始末就係咁，原本我只係諗住撳錢，去桑拿度沖走啲衰氣啫，又點會諗到錢撳唔到之餘，卡又食埋，冇得食海南雞已經夠慘㗎啦，最後仲畀人拉撚埋，你講吖，我究竟做錯咗啲乜，我唔想做人喇，嗚嗚嗚 .....」






見阿布搞成咁，我心頭不禁一酸，大家都係男人，我好明白佢呢刻嘅感受，雖然我冇食海南雞飯嘅經驗，但我清楚明白到一個男人遇到一連串不幸遭遇，係幾咁失落同冇助。


我拍一拍正在飲泣嘅呂布，然後情深款款咁講


「I know that feel Bro.」






呂布抬頭望一望我，好快咁回咗我一句


「咁快撚啲借住幾K嚟，我遲啲一定還畀你，Bro。」


做兄弟嘅有今生冇來世，兄弟有難撐到一定撐，食完呢餐之後，我就同呂布去咗撳機，雖然已經差唔多天光，但條仆街仔話點都要去桑拿度開心下，仲話請埋我咁話（大家記住佢係係用我啲錢嚟請我），我堅決拒絕話唔駛喇，佢見我咁堅持都冇迫我，自己一丁友搭的出咗佐敦。


人去樓空，淨番我一個人喺元朗大馬路度行番屋企，天漸光，身心俱疲，搞咗成晚都唔知搞咗啲乜，聽完個死仔講完一輪故仔，我唔知道當中有幾多成真，幾多成假，亦冇諗住深究落去，因為做得兄弟嘅，講嘅就係一個「信」字。


自嗰日之後，我工作方面忙到甩轆，有好一段時間冇搵呂布，聽啲朋友講佢冇再喺天睡街市度賣豬肉，同佢個紅顏知己阿蟬喺旺角開咗檔「貂呂有冇豬扒包」，大受年輕男女歡迎，做兄弟嘅都好戥佢開心。






件事發展到咁，係時間告一段落 ～


咪住！仲有個好重要嘅post未出，「尋人」


「呂布你條仆街，新年就到，你好快很啲還番嗰幾K畀我喇，見字速速聯絡，自動自覺，否則後果自負。」


— 全文完 —