豬籠車內的呂布: 《十四》

「屎我係一督屎，命比蟻便宜，你坐Benz我挖鼻屎，自知死也再難移 ... 」


此地不留人，自有留人處，我一邊唱住呢首歌，一邊離開街市，真係咩都唔想諗，唔想理喇，淨係想飲，飲死擺就嗰隻，於是我就行咗入七仔，拉開雪櫃，不停咁將啲啤酒攞去收銀處，十罐、二十罐，嗰刻，我完全唔知自己其實有幾咁on9，隔離有百雞超市唔撚去，竟然on撚9到去七仔畀多一倍，可想而知，我當時係幾咁迷茫吖！


言歸正傳，我攞咗幾袋啤酒行返屋企，沿途繼續唱歌，啲途人見我周身爛臭再加個生意失敗look，好啲嘅就當見我唔到，仆街啲嘅就係咁指手劃腳，細聲講大聲笑，我都費撚事理佢哋，個心淨係想返屋企，飲醉就瞓，瞓醒又飲，一醉解千仇，已經冇嘢再可以刺激我。


一返到屋企，我就成堆爛泥咁攤喺張梳化度，隨手攞起一罐啤酒，一口飲晒，一而再，再而三，直至飲到郁都唔郁為止，合埋雙眼就瞓著咗，唔知過咗幾耐，當我有番意識嗰陣，成屋已經漆黑一片，我喺褲袋摷出部手機，一睇，原來已經成十點幾，我摸摸個頭，痛到不得之了，幾經辛苦撐咗起身，行去廁所。






痾咗督好黃又濁嘅尿，開番著廳燈，又再攤番落梳化，長長咁嘆咗一聲，攞起罐啤酒又嚟過，飲咗兩、三罐，我畀一樣嘢刺激到，隨即起身，將件嘢完全摧毀。


呢件嘢就係價值三千八百八十八嘅玲玲合家剷。


「屌你個嘴！又話可以剷走啲小人，仆你個街，仲話乜撚嘢開咗光，收三千幾，根本呃鳩我，吔 ～」






地上面散播晒大大小小嘅合家剷碎片，但都唔能夠令我平靜落嚟，正所謂「好事成雙」，個合家剷唔可以留低，本運程書都一撚樣。


我一跌一仆咁行去書櫃度搵，雖然有啲醉意，但都畀我搵到，正當我雙手運勁變形俠醫上身之際，無意畀我發現到一樣嘢，起初我都以為眼花睇錯，邊有可能喺本書嘅封面上，「乜玲玲羊年運程書」個「乜」字會多咗一筆，我捽一捽，個「乜」字竟然係個「也」字，乜撚嘢「也玲玲羊年運程書」，做乜鳩「乜玲玲」多咗支嘢㗎？發生咩樹啊？


我連隨揭去簡介嗰版，「也玲玲師傅，男性，台山人，熱愛籃球運動，創出籃球加玄學，於瓦努亞圖極受歡迎，當年曾經為飛人佐敦預測會喺六十歳時復出，而聞名於世。」






呢本乜撚嘢嚟㗎！？