豬籠車內的呂布: 《十》

打開本書，喺目錄度搵番我嘅生肖同年份，不其然想起一段童年回憶 .....


我記得細細個老豆帶我去廟街度睇盲公陳，當時盲公陳摸一摸我隻右手，跟住擘大雙眼同我講，話我骨格精奇，命格屬人中之龍，大個一定非富則貴，佢提醒我生肖屬龍，與豬有著不解之緣，千絲萬縷，同豬有關嘅都百利而無一害。


佢仲同我阿爸講咗一個故事，當時我年紀仲好細唔知佢講乜，佢話曾經有個日本人姓鳥山，同我命格好似，都係與豬有緣，於是叮囑佢多啲留意與豬有關嘅嘢，可能當時個翻譯譯錯少少，以為我講嘅豬係珠，最後嗰個日本人出咗本好出名嘅漫畫，流芳百世，仲發到隻Bear咁。


雖然我依家做緊豬肉佬，但我深信行行出狀元，豬肉界我都算有啲名氣，喺市場個個都哥前哥後咁叫我，富貴榮華嘅嘢，只係時辰未定啫，我嘅第六感話畀我知 ..... 即將就到！






雲遊完太空，從回憶中返到現實，我揭去講屬龍運程嗰頁，細心咁睇吓阿乜玲玲師傅所寫嘅嘢，


「好好好！今年生肖屬龍嘅朋友，運氣好到不得之了，鴻福齊天，大有神阻殺神，佛阻殺佛之勢，如果要用一支NBA球隊嚟比喻，簡直就係當年有佐敦、柏賓、洛文嘅公牛隊啊，八十二場常規賽贏七十二場，氣勢之強，無人能阻，真係前無古人，後未必有來者。


當然間唔中都有可能遇到一啲小人嘅物體，不過唔洗擔心喎，鴻運當頭嘅你一定會有白武士出現，為你解決所有困難，總之一句字講晒啦，阿周電視一日仲喺度，你都一定有運行！」






睇到乜玲玲師傅呢一句，我成個人都輕鬆晒，雖然阿師傅今年嘅用字行文方面有啲怪，但又講出到啲重點所在，阿周電視呢間垃圾成五十幾都仍然屹立不倒，話死話執都幾十次，次次都冇事，下下都有啲貴人出現，生命力強撚過小強，睇個勢分分鐘我死佢都未死，有師傅呢句話，我真係放心晒。


合埋本書，攞起個合家剷，懷住開心嘅心情返屋企，自從條羚羊嚟咗之後，我冇晚瞓得好，失眠咗幾日，呢一晚終於可以瞓覺好嘅，我預料到聽朝起身一定放晴，我嘅江山將會重臨。


眨吓眼就天光，我一早著住預備好嘅戰衣上陣殺敵，觀奇洋服加對人字拖，高貴得嚟又唔失大體，一落街，果然天空萬里無雲，樹上啲雀仔吱吱咁叫為我打氣，街口啲流浪狗對住我不停擺尾，夾道歡迎，一切都美好，活著多好。