豬籠車內的呂布: 《三》

「嚓 ～ 」一下電子鎖打開嘅聲。


一個披頭散髮、神情恍惚嘅男人，喺左邊道灰色門行出嚟。


「仆街！咁撚臭嘅？」


個男人未行出嚟，離遠已經聞到嗰陣由啤酒加嘔吐物混合埋啲屎尿嘅氣味，難頂程度真係唔知點形容。






「阿東 ～ 嗚嗚嗚 .....」


聽見有人嗌我個名，好自然望淸楚係邊個 .....


「你係呂 ..... 布？」眼前呢個散發屎臭味嘅男人竟然就係呂布，WTF ～ 唔怪得知打電話嚟嗰個阿蛇叫我帶定套衫褲嚟啦！






「布，你搞乜輪啊？」


「嗚嗚嗚 ～」男兒有淚不輕彈，呂布望見我就好似決堤一樣，一發不可收拾，連隨一個獅子撲兔，一嘢攬埋嚟。


「OMG ～ 我件衫新買㗎 ..... 」






雖然我好想一嘢推開條仆街，但見到佢咁，我又於心不忍，算啦！前世欠你嘅。


我拍一拍呂布嘅膊頭，細細聲講


「布，我哋走，唔好望番轉頭。」


就咁我同呂布就離開警署，打的落元朗離開呢個傷心地 ......


喺的士入面，呂布一粒聲都冇出，淨係望住窗外嘅風景，見佢咁，我都冇即時問佢究竟發生咩事，原本死寂嘅環境，被一下重 dup 所打破。






「仆你個街，真係頂唔順，兩位阿生，唔好介意我得罪講句，你哋係咪跌咗落屎坑啊？咁撚臭嘅！」


畀司機大佬咁問，一時之間我都唔知點答好，因為我真係唔知點解呂布咁撚臭。


「呢二十零蚊我唔收喇！唔該你哋落車吖！」司機大佬鍊住個鼻咁講。


「吓！未到喎，司機大佬，呢度朗屏咋喎。」


「當我求你哋嘞，再揸落去，我唔擔保你哋可以安全去到㗎。」






「點解啊？」


「一隻手點揸棍波車啊！藤原托海呀？我保你哋大喇！我仲要洗車㗎，兩位大佬」


不得不承認，呂布依家真係好撚臭，雖然拒載係犯法，但係人哋都係打份工啫，無謂難為人吖，始終都可以話係我哋唔啱，正當我諗住開門嗰陣 ...