其實我真係好想同你做埋最後一次愛: 笑語

中六級的上學期較短，每當一個學期完結，學校總要求教師呈交學生的功課予校長審視，

但這年不知何故，我的學生到了中六仍是無心上學，缺席率高企，其他科目的老師收集不到全部的課業，

也就如實上報校長，說我班的學生上課紀律鬆散，害我被校長狠狠的痛罵。
 
但到底是哪一科的教師出賣了我，在校長面前打小報告，這就不得而知了，畢竟他們在我面前還是如往事一般的打招呼，一般的說笑。
 
自那次與林Sir吃飯後，我就知道不能再與學生太過親近，也就較少與他同吃午飯，但間中還是有例外的，就如這一天。
 




「喂，做咩咁耐唔搵我丫？」他笑問。
 
「咁老師都有老師既野忙架嘛。」我說。
 
「定係有新歡唔要我啦。」
 
「咩新歡，唔通你係我舊愛？」我笑說。
 
「哈哈，比喻黎姐。」
 




「0分，用錯比喻法，死啦，中六都未識用咁簡單既修辭，點算。」
 
「唔好講呢d住，聽講你最近比人照肺喎。」他裝出一副奸佞的表情。
 
「痴線，點會？」
 
「呃唔到我架喎，聽講校長親自屌你喎。」
 
「喂 ….. 又黎啦，校長點會 …… 」我也說不出校長如何「屌我」。
 




不過他也算消息靈通，竟然連我被校長親自責備的事也知道，又一次證明學校裡是沒有秘密的，以後我還是自求多福好了。
 
「哈哈，收返收返，講錯野。」他一臉傻氣的笑著說。
 
「多得你地囉。」我佯裝生氣。
 
「下？！關我地事架原來？」
 
「你唔知咩？」
 
「哦！即係你認左校長有 …… 你啦」
 
「係啦係啦，無黎正經。」
 
「咁係咩事姐？」




 
「你地班人出席率太低啦，成日唔返學，搞到校長話我囉。」
 
「哦，即係無我份，我好乖仔，日日返齊。」
 
「你係就係日日返齊，但係都日日遲到呢，你有邊日係準時八點見到你架？」
 
「咁我住得遠嘛。」
 
「邊有咁多藉口架，第日返工又同老細講住得遠啦喎。你係男人黎架，要有d責任感，唔可以乜都鍾意點就點架。」
 
「有乜所謂喎。」
 
「咁樣邊有女仔敢同你一齊丫。」
 




「咁係咪如果我個人有責任感d ，Miss你就同我一齊？」他笑問。
 
「又亂講野啦，」我也笑著回答，「不過如果你真係似返個男人會吸引d囉，你睇下你個樣，」

我說著不禁看看他，又不自覺的笑起來，「成個道友咁，塊面白雪雪，成個女仔，把頭髮又唔剪，少少男人味都無，邊有女仔鍾意架。」
 
「哼，我大把女架。」
 
「係呀，小莉丫嘛，你唔鍾意人唔好拖住人添呀，搞到佢無晒心機呢排。」
 
「唔好講佢咁掃興啦。」他說，「咁究竟要點先似返個男人呢？」他滿臉疑問。
 
「um …… 」我也差點被他考倒了，還是不直接答他，用例子好了，「好似林Sir咁咪幾好囉。」
 
「林Sir都好？Miss你d taste真係 …… 」他露出個噁心的樣子。




 
「我打個比喻姐。」
 
他聽後大笑。
 
「你都0分丫，比喻錯晒，林Sir咁扮野，又成日懶型，Chok晒樣，以為自己好有米，

講野寸柒柒，係d無腦港女先鍾意架咋，好似我地班 …… 」他說到這裡突然住口。
 
「我地班d女仔都好鍾意林Sir咩？」我笑問。
 
「係呀，佢又真係幾受歡迎架，點只女仔呀，男仔都鍾意佢添啦，佢打波勁丫嘛，
 
但係我總係睇佢唔順眼咁囉。」
 




「你唔驚我講比林Sir知你講佢壞話咩？」我笑問。
 
「我返左咁耐，知規矩架啦，講得出既野，就實有人知架啦，你咪講比佢知囉，我無所謂既，我係好光明正大咁唔妥佢。」
 
「呢d野同我講好啦，比其他老師聽到唔知點架啦。」我善意叮囑。
 
「知啦，長氣。」
 
「唔爭在長氣多句啦，記得以後準時返學呀。」
 
「我係咁懶架啦，咁多年都係咁，不過如果有人叫我起身就唔同既 …… 」
 
「好！我叫你起身你係咪準時先？」
 
「真架？」他有點喜出望外，「好丫！」又露出他那稚氣的笑。
 
之後他給了我他的電話號碼，自此我每天也充起了他的人肉鬧鐘，這不是我當教師的薪金所包括的職務，

但對著他，我還是很樂意每天早上多撥一通電話。不知怎的，與他吃飯總能輕輕鬆鬆的，不自不覺就渡過了一個下午，

與林Sir則每句對話也為我帶來壓力，要思考如何應對，或許我還真是一個無腦港女，

配不上有學識的男人，但像眼前這個學生般的大男孩，又有多少？