過時短談《來自星星的你》

Old news is so 唔識串
今日我想講下《來自星星的你》

較早之前呢套野都hit左一排，而加先講好似好old news咁，但係我都係而加先得閒睇嘛......冇所謂啦CCTVB都係呢排先播啫。

雖然好多人都話套野比人神化得好緊要，未睇可以唔洗睇。但佢能夠令到咁多人都short晒上腦，一定係有D原因既。我作為一個讀電視電影既學生(又吹=.=)，點可以唔借機會(煲劇)探究下套野有乜咁特別呢？

我開著左「學術mode」，試圖用學術既角度黎睇套劇。結果我用左三日睇晒21集，然後發現，套野的確比人神化得好緊要。完。

講笑啫，(扮)學術野點會咁快講完。冇錯，《來》如果同CCTVB既劇集黎比，的確技高幾籌。首先演員方面已經係冇得頂，主角金秀賢雖然有D小白臉(講完我可能會有生命危險=.=)，但都係高大有型。佢可以做到文質彬彬，多才多識既模樣。而全智賢就更加唔洗講，靚！氣質！ 你話CCTVB邊個花旦有咁既條件？？搵第二個做千頌伊真係輸得。千頌伊咁既角色設定如果比其他人做，就會係無知、白痴，港女。但比全智賢做就會係好pure好true好可愛。 要將一個樣靚無腦既角色演到咁可愛咁令人中意，真係唔係真正樣靚無腦既港女可以做到。 (外國月亮特別......)





其餘既配角都係一般老掉牙設定，演員又安份做好個角色，冇乜特別出位，所以唔講啦。

咁劇本方面呢，頭半套劇我都睇得幾開心。的確係幾吸引觀眾繼續睇落去，不知不覺我慢慢由「學術mode」變成「娛樂mode」咁睇。感覺就好似比人洗左腦咁，變左煲劇腦。其實都幾恐怖，情況有D似搭車睇roadshow咁，明明佢就係嘈住你搭車休息，但唔知點解個頭又會自己擰過去睇。

《來》用一個完美外星人同美絕大明星既愛情故事做膽，拖殺人兇案，搭富二代家族爭勢，加明星爭名，四穿一。呢條四穿一度得好呀，乜鬼元素都加晒落去，目不暇給黎個大雜燴。樣樣都可以獨立做一套劇，而加撈埋一齊睇落好似豐富D，多野睇D。

但其實......咪又係黎黎去去都係個D野......最簡單，咩都唔洗講，主角一定係有錢或者靚，最好兩樣都齊，咁先入到屋(老師教既)。不過失望既係，去到後半部，成個節奏都慢晒落黎，都教授同千頌伊既拉拉扯扯都可以拉到咁多集。完全浪費晒上半部營造既浪漫氣氛。原本覺得浪漫，慢慢就覺會得煩。而且之前做到李載經幾咁神通廣大，但咁輕易就比佢細佬同都教授KO左，好似好兒戲。(仲有好多問題唔講啦，套野都成過去，好快就唔hit啦......)

我覺得真係做得幾好既係佢D剪接。好多時佢將一D事情既過程剪開左，碎上，然後又東貼西拼咁砌番出黎。雖然唔算得係咩高級技巧，但睇慣CCTVB既話就會覺得CCTVB既直白真係白到離晒譜，而《來》就恰到好處，唔太複雜，又唔會太白。尤其佢片尾既片段用黎解番之前留白既地方，而唔會覺得太多太白，只會覺得錦上添花。





總括黎講，有時間咪睇下LO，都幾好睇。但少睇韓劇既真係要小心，好易比佢洗腦。滿腦都係韓國既靚仔靚女，又有錢又有樣又有超能力，近乎完美。好容易會令人產生超現實情懷，導致精神失常，無法在現實「正常」生活。

以上，全是個人觀感，不代表阿明立場。阿明是誰？重睇我所有post啦！！