血色迪士尼: chapter 22
22 )
德伯突然出現在我們的面前，而辛巴看到德伯後也變得不敢輕舉妄動，剎那間德伯迅速縱身一躍，人已經落到了辛巴身後，接著更出力橫踢向辛巴的腹部，辛巴被德伯突如其來的重踢隨即跌落到地上。
雖說突然被德伯踢倒，但辛巴落到地上時已急速轉身四肢著地，更兇惡地凝視著小屋上的德伯。
「上黎啦。」德伯伸手向辛巴示意。
莫名其妙的被踢倒，辛巴立即發出咆哮，接著猛力一躍，整個身軀已跳到德伯的頭上，而德伯就好像知道辛巴會出現在自己上空，他也隨即跳到半空，用手上的木杖打擊到辛巴的頭上。
「個呀伯咁鬼勁嘅？」Jenny看見德伯的神勇出奇地向我問道。
「我都係而家先知。」說實在，我一直見到的德伯也是逃跑的多，從未見過他與怪物戰鬥。
乒磅！
巨響在我們身旁傳來，這時辛巴已被德伯的木杖重擊得再次蹤到地上，而且還久久不能站起。
「走開d，唔好阻住我！」德伯像風一般快速跳到我們身邊並道。
我與Jenny聽罷德伯的說話後退了幾步，而辛巴也慢慢站立起來，德伯把手中的木杖旋轉了幾下後，立即衝到辛巴面前，用木杖連環作用攻擊，辛巴不斷地德伯擊得退後，最後敗退跳回小屋上頭。
「個呀德有無咁勁呀？」阿輝被德伯的舉動嚇得目瞪口呆。
「佢仲勁過Jenny！」阿濤也不禁地道。
「個呀伯點會無啦啦幫我地？」Jenny感到出奇地問我。
「我都唔知。」德伯這刻的出現的確令我們覺得奇怪。
在小屋上的辛巴稍為回氣後立即向德伯展開攻擊，看著牠前臂一揮，一雙鐮刀立即從臂上脫出飛向德伯，但德伯卻氣定神閒，輕輕地左閃右避就避開了辛巴的鐮刀攻擊，這一刻令到小屋上的辛巴充氣怒氣。
當那雙鐮刀飛回到辛巴雙臂後，辛巴立即發力躍前，並借助跳淮的衝力令身軀向前旋轉，而牠尾部的利齒大鋸瞬間變成了攻擊武器，辛巴的來勢洶洶，德伯隨即運勁戒備，當辛巴衝到德伯面前的一刻，德伯立即使用了一招空手入白刃。
辛巴的攻勢不單只被德伯化解了，而且更被德伯踢出的一記朝天腳飛到半空，這時德伯奮力向上一躍，再高舉手杖並加以自身旋轉，似是想向辛巴以其人之道還治其人之身。
一聲劃破天際的哀鳴聲傳來，辛巴的身軀被德伯刺穿了，那隻兇猛的辛巴竟然被德伯痛打得沒有還手之力，這一刻我們都感到喜出望外。
看到了辛巴的屍首從天而降，我隨即走到辛巴旁邊，準備沾上辛巴的血，希望能令自己的作戰能力提升，這時候，德伯卻朝我大聲喝止。
「唔好亂咁掂d血！」
雖然德伯向我喝止，但我的手已經沾到了辛巴灑滿在地上的血液，而德伯看到我的舉動已衝向我並把我推開。
「唉，太遲喇。」德伯把我推開後搖搖頭說。
我被德伯推得跌在地上︰「你做乜野呀？」
「細路，你唔應該去掂d血呀。」德伯走到我面前把我扶起。
看著面前的德伯，我突然覺得他變得判若兩人︰「我知道掂到d血會變成點。」
德伯聽到我的說話雙眼睜得很大︰「唔通你已經掂過其他怪物d血？」
德伯的問題令我更覺得奇怪，因為最初是他幫我的雙手回復原狀︰「之前我雙手變左彈弓係你幫我復原架！」
「係我？唔通......」德伯凝視著我欲言又止。
「唔通乜野？」我感到出奇地問德伯。
「你之前有見過我？」德伯打量著我問道。
「德伯你唔認得我？」我對德伯的問題大感不惑。
「我話你知我叫德伯？」德伯聽到我的說話後反應很大。
「算係，但你同我講你叫德仔。」我面帶苦笑回應。
「唔怪得知啦。」德伯的表情也嚴肅起來。
「唔怪得知？」我好奇地反問。
「你所見到嘅德仔唔係真正嘅我。」德伯眉頭深鎖的向我說。
阿輝聽到德伯所說，立即衝口問道︰「你有個孖生兄弟？」
德伯瞪眼看著阿輝︰「No！」
「咁點解你咁講？」我被德伯的說話弄得頭昏腦脹。
「你口中所講嘅德仔，係沾上左怪物d血嘅我。」德伯向我徐徐道出。
「異變左嘅你？異變會出現雙重人格？」Jenny聽罷也不禁問道。
「唔係，而妳所講嘅異變，其實係叫做融合形態。」德伯倒抽了一口氣後道。
「融合形態？」我們無一不被德伯的說話令到震驚。
「簡單咁講，你地隻手掂到d血，咁隻手就會變成融合形態。」德伯看著我的雙手說道。
「果d怪物嘅血咁得人驚架？」阿輝聽罷打了一個冷顫。
「錯，唔係怪物d血，係佢地本身。」德伯再凝視著地上辛巴的屍體道。
「乜野佢地本身呀？講清楚d啦！」阿輝顯得有點不耐煩。
「Blood！」德伯喉頭咕嚕了一下後再道︰「佢地嘅名叫做Blood！」
「Blood？血？」我驚訝地問。
「無錯，你地所見到嘅怪物，全部都係由Blood產生出黎。」德伯點點頭回應。
「即係辛巴果d唔係真正嘅怪物，而Blood先係？」我繼續追問。
「錯，Blood並唔係怪物！」德伯聽到我的提問突然表情大變︰「Blood係地球上所有生物嘅起源！」
聽到德伯的說話我感到非常天方夜譚，我沒有再追問下去，只是凝視著德伯希望他繼續講解下去。
「你地知唔知人類係點黎？」德伯突然間向我們問道。
「進化囉，達爾文d書我有睇過下架。」阿輝搶先作答。
「咁係由乜野進化？」德伯續問。
「猩猩丫麻，果套來自猩猩的你講人類進化我都有睇架。」阿輝開始說得眉飛色舞。
「咁猩猩又邊到黎？」德伯再向阿輝問。
「猩猩？」阿輝想了一想後︰「鬼知咁多咩，你估我參加校際常識問答比賽丫？」
「咁呢個世界上所有嘅生物係邊到黎？」德伯仍是繼續問。
「上帝！我知你想講世上萬物都係由上帝創造！」阿濤好像知道德伯的提問。
「錯！呢個世界所有生物都係由Blood而生，Blood係我地祖先，亦都係萬物之源！」德伯言之鑿鑿地道。
「Blood係我地嘅祖先？呀伯你唔好講得就講喎！」阿輝聽到德伯的答案覺得不可置信。
「我所講嘅全部都係事實，世界上所有生物都有血，全因最初係由Blood嘅進化，再經過接觸唔同物體而賦予生命俾佢地，令到生命體得以再進化，Blood嘅細胞慢慢形成左腦部，繼而識得思考，之後再形成心臟，令到血液可以運行全身，因為Blood同我個腦融合左，呢d全部都係Blood嘅記憶，我無需要呃你地。」德伯嚴肅地道。
「同個腦融合？」Jenny聽到德伯的說話覺得出奇。
「嗯，我個頭曾經掂到Blood，而且係主體嘅Blood。」德伯的神色一下子變得慘痛。
「主體？」我不禁問道。
「嗯，同我個腦融合嘅係主體，而你地出現變化嘅融合形係Type A。」德伯說罷後表情突然變得奇怪。
「乜野係Type A？」我很想問過明白。
「唔好問，講你都唔明！」這時候德伯變得嘻皮笑臉地向我道。
聽著德伯的說話再加上這一種表情，德伯像是變了我最初見到的那一個，當我還想繼續追問下去時，德伯向我做了一個鬼臉，之後突然轉身跳到小屋上，一瞬間，德伯的身影就消失在我們面前。