羊生與羊太的日常軼事: 放屁

跟羊太吃飯的時候，不知道談甚麼談到了放屁。

羊太﹕「原來啲屁呢，係分咗兩種㗎。」

我口中吃著燒肉，模糊道﹕「係邊兩種呀﹖臭同唔臭呀﹖」

羊太馬上點頭﹕「係呀係呀！」

我笑道﹕「咁應該分做四種喎，有響嘅臭屁啦，唔響嘅臭屁啦......」





我還沒有說完，羊太已經嗔道﹕「唔係呀！得臭同唔臭咋！」

我道﹕「邊度講㗎﹖」

羊太﹕「係有個電視節目講㗎。佢話呢食啲咩咩咩放嘅屁就會臭，食啲咩咩咩放嘅屁就唔臭。」她明顯忘記了那些「咩咩咩」是甚麼食物。

我調侃她﹕「真係唔該哂喎，真係非常清楚食啲咩先唔會放臭屁，THANK YOU VERY MUCH！」

羊太紅著臉嗔道﹕「咩啫咩啫！佢一輪嘴咁講出嚟我點記得咁多啫！」她頓了頓又道﹕「個節目話，啲屁臭係因為裏面有甲烷，啲屁唔臭呢，係因為裏面有......」





我截住了她，笑道﹕「有咩呀﹖有氧氣呀﹖咁我下次放個唔臭嘅屁比你聞下啦！包保你聞一聞醒腦提神，索一索舒筋活絡！」

羊太笑駡﹕「你自己聞啦！」她又笑道﹕「你叫個救護員比樽純氧你聞啦......」

我笑道﹕「樽純氧都要儲好多人嘅屁先整到喎！」

羊太聞言笑得彎下腰來。