百靈鳥: 第四回

 百靈鳥 四

「拿，前面三集我就睇左啦，用左我足足四十五分鐘。不如你寫多三篇，中間夾埋啲飲水位廁所位，夠去紅館開個Show叫楝篤唔笑，讀返呢六篇野出黎，有人有反應就回水，做返十零廿場，至少夠首期買樓。」你睇下佢把口幾毒。

「喂你睇完唔比意見重鬧人，呢方面我面皮好薄架渣，我鬧你唱歌唔好聽得唔得丫？」

「抽下水姐，咁唔講得笑。叫你開個Page叫人留言你咪要跳樓？實有人鬧架喎。」

「……」





「醒少少啦！起碼都要寫返幾句咩咩經過五十萬光年也要年年和你渡過溫馨浪漫情人節，我捧著花你抱住我，皺晒皮都好似廿五歲岩岩見咁……大概係咁啦，嗰啲你識過我啦！自己發揮下！」

「有諗過呀！不如話經過五十年都會年年清明重陽去拜佢，唔怕喺下面無錢洗。」

「……大佬，你知唔知咩叫浪漫。」

「講真架，自己一個人，無任何Motivation，年年都記得同一件事，唔會好浪漫咩？十年生死兩茫茫，有無聽過？」

「頂，梗係聽過啦，水調歌頭嘛！我好鍾意王菲啲歌架，明月幾時有～」





「咪唱住先！澄清返樣野，光年係計算距離既單位。」

「你再打斷我，我就喺青衣城對面海座山幫你揀個示範單位，將來年年都捧著花黎同你浪漫浪漫……」葵青區真係地靈人傑，居民急才都好啲。

然後，我想像歌聲依然在那被切開的月底悠揚，你等我鼓掌，卻沒有發現自己只搞對了詞人。演唱會繼續的開，廢青依然的廢，每晚依然睡得很少。但那終歸沒有變成事實，如同大多數網上交友的例子一樣，忽然間就沒有聯絡了，或者生命中每個人總會在某時間點開始逐漸淡出你的生命，而你永遠只在對方完全離開了，才猛然驚覺，故事完的很突然。

起承轉合，那是小說故事，更多的是從來沒有高低起伏，在渾渾噩噩間，便甚麼都完了。

人生宛若一輪遙遠而漫長的航行，水流緩急，來者何人，甚至路程長短，都不由得你選擇。誰都知道，沒有人可以永遠地陪著另一個人，法律之下，每人大概有一個配額可以選對象互相陪伴更長的時間，某些多情的，暗裡可以有三五百個。





但無可否認的是，任何一個人，在整個航程裡面， 大多數時間，只有自己孤單的坐在船頭，迎向那全人類都要面對的，那個唯一而悲傷的結局。

人生是寂寞的，所以對酒當歌，人生幾何，譬如朝露，去日苦多。
人生是寂寞的，所以杜康解憂，喝多了，對影可以成三人。
今夕是何年？過了二十多年，能看見整個月亮的日子數來不過二十次。香港是不夜城，亮得連影子都死掉，沒有月亮，三人又變回了一人，拿著手機，想變多幾百人陪伴自己，卻更形寂寞。

這是一個沒有愛情的故事。

只是，在屬於我那死寂而幽暗的船途上，當時偶爾飛來一隻小鳥停在船頭，用她平凡卻充滿堅毅的歌聲把我喚醒，叫我更加有勇氣，做自己認為擅長的事。鳥曰百靈，來去不留風聲，卻令我心境澄明。

衷心希望她活得好。
現在，將來，永遠。