我最錯，在鬼節遊船河: 第十五節

張開雙眼，是白色的天花。
 
「仔！你醒啦！」
 
「老豆？」
 
我看看四周，發現自己現正身處醫院和躺在病床上。想起自己暈倒前被女鬼穿透自己身體的一幕，不安感強烈湧現，我立刻起床看看有否紅衣女鬼的蹤跡。
 
沒有！
 




「做咩呀你？望咩呀？」阿爸亦跟著我四處張望。
 
「我啲朋友呢？佢地有冇事呀！」
 
「有冇事？你地幾個搞咩呀？點解會搞到有人跳樓架！你地係咪食毒品？」老豆反過來責罵我說。
 
「冇呀！我冇食毒品呀！」
 
「食毒品會累死你架！記住唔好食呀！食左呢碗中藥先啦，把過你脈，氣虛脾弱，你搞咩黎呀！」老豆把一早弄好的中藥倒在碗上。
 




「知啦！我冇食毒品，我有食既話，你一把脈就知啦！」我把老豆的中藥徐徐灌下。老豆是一個有名的中醫，香港有很多富豪也請老豆為他們看診，所以由小時候開始我便只吃中藥，因老豆說西藥會傷肝腎，只是現在要找一些優質藥材並不容易。
 
「咁點解你個同學會突然之間跳樓死架？警察話要黎搵你落口供呀！」
 
「我………真係唔知呀！」我撒了個謊，跟他說卓盈之死是因為被鬼上身會有人信嗎？說出來只會讓阿爸認為我吸食毒品而遇上幻覺，又或者被警察和在場醫生覺得我有精神病而把我拘留，我續問：「老豆，我部電話呢？我想打電話俾我啲朋友呀！」
 
阿爸輕蔑了我一下，把電話遞給我說：「唔好講咁耐！我而家問下醫生你出得院未。」
 
我立刻致電子嫣，一來想知道當晚我暈倒後的事態發展，二來我擔心子嫣，想知道她現況如何。
 




「喂！藍楠你醒返啦！你有冇事呀？」聽到子嫣的聲音，我的內心才稍為踏實下來。
 
「我冇事呀！你呢？」
 
「唔好講咁多啦，今次到細輝出事，你而家快啲過黎急症室啦！細輝有事，啱啱俾人送左入院呀！」子嫣焦慮的說著。
 
「咩話？細輝有事？你等我，我而家即刻過黎！」
 
我立刻更換了原擺放在儲物櫃的衣服後，便立刻跑往急症室。
 
剛抵達急症室，只見子嫣雙眼通紅並慌亂的在按動著細輝的手機，我見狀立刻跑往子嫣的身邊：「細輝咩事呀？點解佢會入左院架！？」
 
「我唔知！我唔知！警察打俾我話細輝響我地之前去過既沙灘度出左事，叫我即刻黎醫院，之後佢地又叫我通知細輝屋企人，但係我又唔知細輝屋企人電話號碼，嗚～」說到這裡，子嫣哭起來。
 
我把電話接過，並立刻致電細輝的父母。




 
我扶著子嫣回到急症室的位置等候，希望醫生可以盡快告訴我細輝的最新消息。子嫣還是失控的嚎哭著，的確接連間自己的朋友發生意外，正常人又如何承受得了？
 
正如我自己，現在的我亦是六神無主，失去方寸，只是我知道現在的我必須要鎮定，好讓作為男人的我可以成為子嫣的依靠。
 
通知了細輝的父母，我和子嫣在急症室的座位就坐。醫院燈火通明，感覺不到一絲恐懼，可是只要想起每日在醫院內有人因為各種原因而死去，內心便感到有點不是味兒，我也很佩服那些日本AV竟然夠膽在醫院拍攝，他們難道不怕褻瀆了剛去世的人嗎？
「踏！踏！」一下下急速的腳步聲從遠至近傳來。
 
我回頭一看，原來是細輝的父母。
 
「世伯，伯母！」我走前去迎接他們，我內心有點緊張，對於他們的事我應該從何說起？
 
「藍楠！發生咩事呀！做咩輝仔會無拿拿出事架！」輝媽緊張的捉著我說。
 
「係囉！咁輝仔而家點呀？」輝爸接著說。




 
「其實我都唔太知發生咩事，警察話細輝響西貢沙灘發生意外，其實我都係啱啱到，醫生而家搶救緊細輝，不如你地坐低等下先，而家我地都做唔到啲咩。」我指著附近的空坐椅說。
 
氣氛變得有點沉寂，我也不知道說些什麼可以安慰到他們，只見醫院裡的護士和醫生在急步的走來走去，我幾可聯想到情況其實不太樂觀。
 
「唐鍚輝既屋企人響度嗎？」一個戴著眼鏡，樣似吳啟華的醫生說。
 
「喺度！」我們快步的往醫生的方向走過去。
 
「你地係唐鍚輝既屋企人？」醫生說。
 
「係呀，我係佢阿媽，我個仔點呀？」輝媽說。
 
醫生低頭無奈的說：「唐鍚輝佢突發性心臟病發，經搶救無效，你地入去見佢最後一面啦！」
 




聽到這個消息後，輝媽突然間情緒失控，捉著醫生的手說：「點解會咁架！點解會咁架！醫生！救下我個仔啦，佢本來好好地，點解會突然間心臟病發架！嗚呀！」
 
擾攘一會後，輝媽突然間暈倒在地。
 
場面有一點混亂，醫生立刻安排護士到場協助。