薛可正作品 - 回到過去，星晴擱淺，說好的幸福呢？: 06

06.

看著杰寧的表情，我的腦袋很快的轉了幾圈。她一直都是好意，到底我自己在亂想什麼？根本就沒有什麼事情要發生。

「但我要去荃灣喎。」我回答杰寧

「上車啦，唔緊要。」杰寧把車門推開。我跳上車，基於內心有點擔心媽的情況。我坐上車後，氣氛有點尷尬，杰寧不知為何一下子停下了所有話題。

我看一看她，她也看著我傻笑，這時我聽到另外一把聲音。





「歌神你好，我叫潘靜雅。」

我如夢初醒的看看前座，發覺除了司機還有另外一個女孩。我認得出她，是跟我們同一間學校的同級高材生。每間學校的每個級別都基本有兩個生態，高材生跟分數低收入人士。

「妳好，我叫葉青倫。」我禮貌的說

「我知啦，聽過你唱歌添啦，哈哈。」潘靜雅大笑，那失態的表情令我知道她很熟悉杰寧的生活範圍，因為如不是閨密的話，在人家的車子內這樣人仰馬翻，應該是智商有問題。

「潘靜雅妳好嘈呀。」杰寧拍拍前座的潘靜雅，又回頭跟我說：「唔好理佢，佢差唔多日日坐我車都係咁。係呢，你要去荃灣邊度？」





「二坡坊。」

「得，冇問題。」司機叔叔禮貌的說

「咁得意嘅個名。」杰寧問我

「荃灣有大二三四坡坊，係四個唔同地方嚟。」我回答。

「咁有啲咩睇？咁似啲古代地方名嘅？」潘靜雅又搭訕。杰寧這時好奇的和應：「係啦係啦，有咩睇呀嗰度？」





「其實……冇咩……都係啲好舊嘅橫街窄巷嚟。」我不曉得怎麼說，難道我告訴她們那裡有一間叫戴麟趾的康復中心，每天都會派發一些美沙酮，所以門口長期聚集著一班癮君子。

「其實妳車到我去地鐵站都得，妳住九龍塘都唔順路。」我說。

「唔使啦，靜雅都要去葵芳補習，有車一次車埋咪得囉。」杰寧拍拍我的手背說，前座的潘靜雅又猛力點頭。

我不再勉強，就這樣緊張的一直到達荃灣。

「前面得喇，唔該哂。」我在幾個街口之外叫停，打算自己跑回去就可以。

「未到喎。」司機叔叔好心的說，我連忙解釋：「我要買嘢呀，得喇唔該哂。」

潘靜雅在我到荃灣之前已經下車了，所以我跟杰寧和司機揮揮手，便轉頭離去。我拔足便跑，拐過了幾個彎後才來到媽的店。

「媽，冇事嘛？」我看見媽便立刻問。





「冇事…唔知係咪今朝食咗啲隔夜餸，作佢個死個胃抽住抽住咁痛，食完藥都好返小小。」媽看見我，笑笑的說。

「我咪話咗唔好食囉，我今朝唔記得倒，妳又轉頭走去食，唔係隔夜，係隔咗三個夜喇媽。」我生氣地說，同時也自責自己的大意。

「邊有事，阿媽食咁多年又咪係咁。」

「總之唔好食，妳再係咁，啲飯餸我一晚都唔俾妳留。」我有點生氣，但媽的反應卻顯得愈來愈開心。

「我個仔大個仔囉，識管阿媽。」

「妳休息陣，我幫妳睇多陣舖。」我邊說邊看店內還有什麼地方要執拾，不想媽又操勞。突然，我想起有一些學校津貼的東西要媽幫我簽署，便立即從錢包拿出來辦好。

我摸摸褲子，赫然發現：





「咦，我個銀包呢？」剛發現丟了錢包的離心力，是可媲美主題公園的海盜船的。

「咁論盡呀你？你坐巴士定地鐵呀？快啲跑返去搵啦。」

「咁我好快返。」我轉身準備離開，卻看見杰寧站在不遠處，微微笑的看著我。

手上，還拿著我的錢包。