[家庭]係我屋企入面,我只係一個配角,一個可有可無既人: 妹妹

我妹妹係一個好外向既女仔,打籃球,排球,田徑樣樣精通 

曬得一身健康膚色,加上樣子甜美,聽細佬講妹妹係學校入面都算係風頭躉 

由四年班開始,妹妹既獎杯,獎牌放到一屋都係 

從開始每次次妹妹拎到獎都會落街食飯興祝 

到宜家全屋人都不以為意,妹妹拎獎就如呼吸般正常 





爸爸從不管教妹妹,妹妹由媽媽直屬管教 

先前都講過啦,媽媽好恨生女,所以媽媽特別關心妹妹 

佢地兩個放假會一齊行街,妹妹比賽只要有時間都會去睇,有時又會一齊去美容 

總之妹妹就係阿媽第一位 

係我上緊數學堂既時侯,我收到妹妹既短訊 





『二哥,唔好嬲爸爸啦,爸爸都係一時火遮眼姐』 

『知道啦,上緊堂呀,你唔洗上堂咩』我靜靜咁逃過李sir既法眼,係櫃筒回覆妹妹 

『我打學界呀,你快d應承我先啦,應承我唔準嬲爸爸,唔準再離家出走』 

『知道啦,我應承你啦,唔講住喇,一陣比收電話,你都加油啦』 

『haaaaa咁就乖喇』 





我妹妹就係一個咁可愛既人 

放學之後,我就去補習社報名,我專登唔報細佬妹補果間,去左另一間報名 

『嘩..三百二蚊一堂』好彩阿哥比夠錢我,報左十五堂,希望今次對會考成績真係有幫助 

報完名之後,我諗住打電話比大哥交代一聲,點知我再次收到妹妹既短訊 

『二哥,我輸左』 

我即刻打比妹妹 

『do....do.....do.....do......你所打既電話暫時未能接通..』 

『搞錯呀,做咩唔聽電話』 





於是我打左電話去妹妹既學校,表示自己係家屬,想知道妹妹今日係邊到打學界 

『哦..彩虹道運動場...ok..ok..唔該你』 

我馬上衝上的士,報完名仲有百幾蚊淨,可以搭的士過去 

落車之後,我周圍搵妹妹,結果都比我係公園到見到妹妹 

『杜家琪你做咩唔聽電話呀!』 

『我扭親隻腳,所以輸左呀..嗚...』妹妹咬著下唇,望住我喊,我望一望佢左腳,腫左成個橙咁大 

『乖..乖...無事無事..二哥同你去睇鐵打』 





『好痛呀隻腳,行唔到呀』 

『黎,我孭你』 

『二哥,家姐』細佬竟然出現 

『點解你係到架』 

『我今朝聽家姐講係彩虹道打學界,頭先咪打比佢問下佢走得未囉,佢又唔聽電話我咪行落黎囉』 

『細佬,我輸左呀』家琪又喊 

『你都成日贏架啦,輸返次有咩所謂呀』細佬一語中的 

『家宇你幫家姐拎住個袋,我孭你你家姐去睇鐵打』 





『不如返去搵左阿媽先啦』 

『唔得!比阿媽知道我要睇鐵打,以後都唔會比我打波』 

『你地夠唔夠錢睇架』細佬打開銀包『我仲有一百,二哥你有幾多』 

『廿蚊,阿妹你有幾多』 

『嗚..嗚..我無錢呀』阿妹又喊過

『okok無錢咪無錢囉,唔好喊,乖』 

我孭住妹妹行返去屋企樓下既鐵打醫館,而細佬就打比大哥叫佢黎埋單 





半個鐘之後大哥就黎到,孭妹妹返屋企既責任就交返比高大威猛既大哥 

結果我地四兄弟姊妹就一齊返屋企 


睇過鐵打都知,果陣藥材味真係對面街都聞到,又點逃得過阿媽既法眼 

但經過大哥,爸爸既求情,妹妹休息左2個月後又再打返波,已經完全忘記左輸波宜件事 

而我亦都遵守左對大哥同細妹既承諾返屋企 





四兄弟姊妹一齊返屋企