[家庭]係我屋企入面,我只係一個配角,一個可有可無既人: 校服

去到八月尾,我剛剛完成左我既小學生涯,準備上中學,而我就派左去以前哥哥讀過既中學 

『你試下你阿哥套校服仲岩唔岩著』阿媽唔知係邊到巢返阿哥以前套校服出黎 

『阿哥咁高我點著呀』 

『改短咪岩你著囉,唔洗買都得喇,買冬季啦淨係,我巢唔到你阿哥d冬季擺左去邊』 

如是者,九月一號我就著住阿哥既舊校服,拖住兩個著住全新校服,書包,筆袋,乜都係新既 
細佬妹返學 





當我送完細佬妹返學,我行返自己學校 

行緊既時侯,我發覺自己同其他既同校生好唔同 

『點解,我條褲唔同色既』 

入到學校,我就好似一隻去左雞蛋群既奇異果咁 

『同學你企係到』有個老師叫停左我 





『係』 

『同學你套校服係邊到買架?』 

『我哥係舊生,套校服係佢既』我講得好細聲,希望唔想比其他同學聽到我要著阿哥既二手校服 

『下?套校服你阿哥架?佢讀完幾耐呀,我地前年已經轉左顏色喇』我唔知個老師係有心要我難過,定係睇得TVB太多,演員要將電話所聽到既野一字不漏咁大聲讀出黎,驚死d低能觀眾唔知發生咩事咁 

『哈哈哈,二手校服』 





『有無八手校服架?』 

『哈哈,咁窮既』 

同學們開始恥笑 

結果奇異果就係雞蛋群到生活左一日 

放學後我狗衝返屋企,同阿媽講左咩事,就同阿媽落左九龍城買校服 

『阿仔,係咪淨係得褲要買』 

『衫都要啦』 





『衫有改到咩?』 

『我比人笑我著二手校服呀!!』 

『車,你去返學姐,你去登台咩』 

『咁我比人笑..』 

『笑下姐,洗死咩』 

『咁點解細佬妹既校服係新既?』 

『乜你有舊既比佢著咩?』 

『................』 





『怕左你喇買兩件啦,一陣又話比人笑喇』 

『點解』 

『咩點解呀又』 

『點解阿哥細佬妹要乜就有乜,唯獨是係我,我有野想要永遠都要求你地先有,有時仲要求完都無..』 

『你食屋企既著屋企既,你仲想要乜呀』我阿媽開始扯火 

『唔係呀,呀媽你聽我講啦...』 

『講講講有咩好講姐,成日都拎d細佬妹黎講,叫你就下佢地都唔得呀?比d好少少既野細佬妹你個心都唔舒服?』 





『唔係呀呀媽...我唔係咁既意思呀..只係...』 

『好喇夠喇,唔好講』 

『點解你地一定要咁偏心...』 

我阿媽一聽到偏心兩個字,就一巴打落我到 

偏心宜兩個字,我講過兩次,兩次都比人打 

一次係爸爸,一次係媽媽 

『細佬妹細佬妹,我夠係人地細佬....』