細細個見到嘅靈異事件勿語: （三十二） 收曬工喇喎

（三十二） 收曬工喇喎

有次係公司開OT，一路等緊個客，佢話收工過黎睇睇個單位。

我公司地方都算幾大，格局都係一般地產鋪咁一張一張工作檯排落去。

當時大約八點零左右，全公司得返我一個，為左省電，後排d燈都關左一半。

我就响其中一位同事張枱到幫佢整緊部電腦，應承左話幫佢整返好個webcam。
（見佢份人平時無乜點，又係新人，又肯學，同埋係女，咪幫下人囉。）

我download返d update file然後抆抆插插過後，好快隻webcam 就著燈用得返。

搞L掂，螢幕有返嘢睇。

我郁郁隻webcam 個角度，影住自己，
又試下係前面揮下手睇下鏡頭清唔清。ok喎。
我仲撥撥頭髪，左照照右照照單下眼整下鬼臉咁，
雖然我唔係女，但係自己一個對住個自拍mode真係會自戀返兩嘢。

Set完，諗住交义左個版面果下，咦喂，畫面右手面好似有d嘢。

我定一定神，再睇…

我見到webcam影住我嘅畫面裡面，係我身嘅右後邊，後排位置⋯

企．左．個．人。

一個長頭髮上左年紀嘅女人，上身有件長袍，
好似面壁咁對住幅牆，貼得好近好近。

果下我本能反應就即刻向後望過去！

屌！

唔見有嘢，乜都無。

眼前只有黑媽媽嘅一張張寫字枱，同幅灰白色嘅牆。

眼花啫⋯

但當我再次擰返個頭過黎望住個mon嘅時候，我就知道，

奶嘢。

我清楚見到螢幕裡面果個女人仍然企係我嘅右後方，有少少唔同嘅就係，

佢家下唔係向住幅牆企，而係微微轉左過黎，即係好似想行過黎我呢邊嘅方向。

唔係化⋯

我用力眨眨眼⋯

無野嘅無野嘅，我極力咁游說自己。

再睇，果個女人，企嘅位置愈黎愈接近我！

我望住螢幕中嘅自己係到喘氣，大力吞口水，又唔敢擰過去再double confirm…

淨係望住右後方果個女人，佢郁都無郁，淨係垂住頭，企係到。

我托住額頭，扮曬嘢咁用眼尾微微向後哨多次過去⋯

無嘢喎。

只有空空如也嘅office啫。

但係當我再望返個mon嘅時候，我真係嘩一聲嗌左出黎！

佢．就．企．左．係．我．後．面！

因為鏡頭角度有限，我見到嘅只係漆黑一片類似佢長袍嘅下半部份，見唔到佢樣貌輪廓。

我啪啪啪起勢亂噤個 mouse！終於關左個視窗，眼前回復返windows的一片藍。

我成個人仍然驚魂未定，手都仲震緊，深呼吸一啖氣，打算擰轉頭確認一下。

鏡頭反光啫…應該無事嘅。我同自己咁講，仲扮曬無事無事咁哼下歌仔出黎壯壯膽舒緩氣氛。

然後⋯

屏息靜氣⋯

向後面幅牆嘅位置再望過去⋯

無嘢嘅無嘢嘅⋯

鈴鈴鈴！

表！auntie 吖！真係拍戲都無咁岩，
我放响枱面部電話呢個時候岩岩響起，嚇得我呢。

我拎起手機，係個客阿莊生打黎：

「喂，我搵緊位泊車，十分鐘到，直接係乜乜閣樓下等啦。
喂喂喂！幫我買杯熱檸水過黎。快，唔好要我等。」 

客戶永遠是對的，我只能「哦哦哦」咁應機。

電話掛斷，我又再度落入一個人的office寂靜當中。

我望望後面幅牆又望望螢幕，人類真係按捺唔到好奇嘅動物，
我果下竟然膽粗粗咁行去後面，諗住過去牆身探一探究竟，
望一眼就走。我離開左個位，一步步行埋去，好靜，
周圍幾乎浄係得我對皮鞋同我自己急促嘅抖氣聲... 

我企响幅牆前邊，就好似頭先我見到有個女人企响呢到個姿勢咁樣，
我哄低少少個身，望去牆後面... 

哈哈，無嘢。

都話太大壓力太累啫！眼花啫！

我轉身，返轉頭，行埋位⋯

呃⋯

個webcam⋯

著左。

我呆L曬咁望住個電腦螢幕，個錄影視窗唔知幾時自己彈左出黎⋯

而我頭先，明明就肯定已經交义左⋯

呃⋯

我望住螢幕中嘅自己一步步咁行返埋個位，望住後排中黑媽媽嘅寫字枱⋯

好彩⋯乜都見唔到。

我唔知點解個webcam會自己boot起左，亦無打算深究，淨係知道快手熄機走人為妙。

第朝阿同事亦都用得好開心無乜異樣，我當然都無講d乜嘢啦。

只係，自此以後，我都儘量唔會用個d即時視像通話程式。

近年睇樓，興起左用facetime睇，個客唔上黎，叫我地上去影住realtime俾佢睇⋯

重申！我係無呢隻服務架！

因為⋯

我總係凝住，如果有一日，對面個客同我傾傾下，
讚我地公司幾好喎咁夜都仲有咁多同事上黎幫手做嘢，
都唔知點答您好⋯ 

「呃…個單位得我一個係度咋⋯」 

「收曬工喇喎⋯」 。

Tag 成日一個自己OT開夜，Tag Long D 戀人，成日要用webcam視像通話嘅frd入。

收曬工喇喎   參考圖片



IG : donotsayhello
http://www.facebook.com/donotsayhello