細細個見到嘅靈異事件勿語: （二十四）隔離有＿

（二十四）隔離有＿

你地行街一定有見過有d人同空氣講野。

有d直頭愈講愈激動，爆埋粗邊行邊屌咁。

通常你地見到都會話：

「嘩，傻佬呀！」、「避開d喇！」、「我諗佢好大壓力吓喎！」之類。





我可以話俾大家知，有八成嘅呢d人，佢地係真係同緊隔離個「人」講緊野，
只不過，你睇唔到咁啫。

你又可能厚多士再問：「你話八成係，咁另外兩成呢？」

表！咪佢地係堅傻，或者係我見唔到囉！

留意下，佢地同空氣講野嘅時候，大多數都係有互動嘅，
直頭係有曬停頓位，接駁位，一句接一句咁，
佢地唔係好戲，而係真係傾緊計，




通常都係自己d親人黎。

有次行過石硤尾，見到有個婆婆一路依依哦哦，又手指指指下前邊咁。
D途人已經響佢身體係咁左閃右避，我向佢前邊望去，
見到有個伯伯一路dup底頭係佢前邊行。
婆婆就一路講講講，我就見唔到伯伯有回頭應機。

不過個伯伯就好真實，同側邊d途人無異，
只不過佢著住嘅係一件黑色壽衣同埋打大赤腳行，
我就feel 到，佢應該係個味野。





你可能話，佢會唔會其實係人黎？

無錯呀！我唔排除有呢個可能性，因為有好多時，
其實你係唔會分到嘅，又唔係做戲咁突然「嘭」一聲跳出黎。

仲有，有次見到個伯伯，
佢係寒背得好嚴重果隻，夜媽媽係樓下個公園到行。
佢直頭係類近90度彎腰望住地下行果種。
我係對面馬路經過，月光映照下，岩岩曬落黎，
我見到有兩個類似小朋友嘅黑影騎住係伯伯背脊上面，
伯伯就咩住佢地一步一步咁向前行。

係，只見到兩個全黑嘅黑影，無輪廓，好似兩個剪影咁，騎住係伯伯背脊到。
我懷疑，唔知係咪佢d孫仔。





所以，今日諗起想提提大家，見到d你以為佢自言自語，
手舞足蹈嘅「傻人」嘅時候，避開一邊就ok 架喇。

千祈唔好亂咁講野，亂咁笑人。

聽過有個小巴司機講過，有日有個哥仔，上小巴俾兩個人錢，
話想要埋隔離個位，即係一個人加一個吉位咁。
咁ok收左錢後，去到一個站，有個肥佬衝上車，問做乜九霸住個位，
司機解釋話佢比左錢，但係肥佬又話趕又發曬爛渣咁，一定要坐落去。

擾嚷完一輪後，個哥仔唯有選擇落車，俾阿肥佬坐曬。

哥仔起身嘅時候，司機仲話清楚聽到佢同隔離個吉位講左句：





「我地下架啦。」

然後就落車。

車繼續開，個肥佬仲係到也文也武乜乜乜：「有錢俾兩個位大曬呀！」

又呢樣又果樣。

車開左無耐，個肥佬出奇咁靜。

司機望一望後鏡，咦喂！個肥佬反曬白眼暈左係個位到！

司機大驚即刻掟彎，個肥佬趕趕趕…

結果係…趕住送佢入院。





第朝睇返新聞，原來係心臟病發，好彩醒得返。
佢唔知究竟算係巧合定咩，
淨係知道有時d人堅持要埋隔離個位，
總有佢嘅原因嘅。

你見唔到，唔代表係唔存在啫。

敬請注意。


隔離有＿      參考圖片