細細個見到嘅靈異事件勿語: （十三）中學 - 倒豎葱

（十三）中學 - 倒豎葱

你地有無聽過倒豎葱？

即係你擘開隻腳，然後彎低身，
個頭倒豎葱咁由褲浪底望過去。

睇戲都有講，呢個方法係最易見到果d嘢嘅。

我讀中學果時，都一直盛傳，呢個「方法」。 




只要你懷疑果到有d唔妥，而你又夠膽嘅話，
你大可用呢個方法去引證一下，萬試萬靈。

學校中有個咁嘅傳聞。

曾經有位女同學響廁所洗手盤附近跌左把梳，
佢彎低身想執嘅時候，突然心血來潮，
貪得意咁試下倒豎葱向後望。

佢慢慢咁從兩隻腳中間倒後望出去，




眼前所有景物都上下掉轉曬咁。

佢左望望右望望，
望住空無一人嘅廁所，
毫無異樣。 

「哈，無聊。」

她笑笑，執返起把梳。
正當要挻返起身嘅時候，




佢好似見到有d嘢響廁格門下面。

企返直之後，周圍望望，又望望廁格門底，無野喎。

咁…好奇心作祟，佢打算倒豎葱再睇多次…

佢慢慢咁彎腰，望落去。

隻眼留意住條廁格門底…

d景物開始倒轉…

三。

二。

一。 

「嘩！」 阿鋒大大聲「嘩」左一下，嚇倒隔離兩位聽故嘅女同學彈起。 

「哈哈哈！」阿鋒大笑，對於自己能成功咁嚇倒圍內聽眾，非常滿意。

「cher，咁你夠唔夠膽試下先？」其中一位女同學問阿鋒。 

「哈，我實夠膽架，妳係咪黎先？」 

「唔好預我！你話夠膽你去啦！」 

「係啦係啦，話俾我地知係咪真係見到嘢嘛！」旁聽的另一男生插咀講。

突然，群眾們起哄。

「試下！試下！試下！試下！」

「唔係淆底呀嘛？」 

「超！講就叻！」

「呃…」 俾著我，一定認衰仔，直認淆底就算。
坐響隔離暗暗聽住嘅我係咁樣認為。

結果，臉子大於一切，
阿鋒在群眾壓力下，無可奈何下咁答允。
大顆兒浩浩蕩蕩走左去傳聞中「猛」嘅頂樓女廁。

阿鋒入左去，即時快手做左個倒豎葱嘅姿勢，向廁格底望去。 

「哈哈，搞掂！乜都無！」 

「喂喂！唔得！奸賴呀！邊有咁快架！再做再做！」
阿鋒唯有再從自己褲浪底望出去。 

「ok啦？滿意啦！」阿鋒維持住倒豎葱個姿勢，一面問。 

「望多陣！望多陣！」同學吶喊。

「累喇累喇，暈喇。」 無事，阿鋒企返直。 

「cher，都唔好玩嘅。」有女同學話。

然後，大家正想收隊離開嘅同時，
廁所裡面嘅人，都一齊聽到有腳步跑過嘅聲響。

就響廁所嘅天花角落位置。

「咩聲？」 

「好似有人大力跑過咁嘅聲。」

「頂樓黎架喎，天台有人？」 

「依！走喇走喇！唔好講喇！」 大家議論紛紛。

「陳永鋒，你睇下啦！」

「頂你啦！唔睇！」 

「淆鋒呀！淆鋒呀！」

「咩喎，頭先咪睇左囉！想點呀！」

「睇下個角落頭啦！頭先都未得。」 

「倒豎葱！倒豎葱！陳永鋒！倒豎葱！」
阿鋒騎虎難下，唯有徇眾要求，

再黎一次。 

「好！好！好！黎咪黎，Last一次。」

「殊～」 眾人屏息靜氣，在等待答案揭曉的一刻。

女廁內突然變得異常的寧靜。

阿鋒眼望着前方大門，慢慢彎下身體，
準備從褲浪底望向後邊嘅天花板角落位置。

踏踏踏踏…

幾下零碎嘅腳步聲再度從天花板上邊響起。

眾人望向阿鋒，幾位女生早已經被呢刻嘅詭異氣氛嚇得摟作一團。

阿鋒腰彎得好低好低，從兩腳之間，望去後面…

眼珠慢慢移上去天花板角落位置... 

三。

二。

一。

嘩呀！

阿鋒「嘩」一聲大叫左出黎，成個人率先跌低。
紅筋滿佈眼睛，眼珠睜得好大，一直望住天花板角落，
結結巴巴，成身抖震，
神情驚恐得似係三魂唔見七魄，一句說話都講唔出，
突然，自己一個衝出左女廁。

同學們對於佢咁突如奇來嘅舉動都黎唔切反應，大家你眼望我眼，
有好幾個同學都已經嚷住要走人離開。

然而，有一個同學仔自告奮勇。 

「有無咁誇張呀？」 

佢一講完，即刻從兩腳之間彎身黎個倒豎葱，眼，望向天花板角落。

景物開始倒轉…

三。

二。

一。

你估…

佢見到咩野？ 

「嘩！」 肥華大大聲「嘩」左一下，嚇倒隔離三位聽故嘅女同學彈起。 

「哈哈哈！」肥華大笑，對於自己能成功咁嚇倒圍內聽眾，非常滿意。 

「cher，咁你夠唔夠膽試下先？」 …

呢個校內傳聞一直就好似咒怨咁，

一個傳一個，方法講左出黎，總有人想去求證，總有人要去試。

而今次，我無打算再跟肥華大顆兒去湊熱鬧。

上次，經果位自告奮勇嘅勇士講返，
當時，佢一倒豎葱，從褲浪底望向天花角落，
成個世界都好似掉轉左咁樣，唯獨係…

有一個，全身呈灰白色，上身赤裸，長頭髮，
全身濕透嘅男人，踩住天花板腳向天，
頭向地，成個人倒豎葱，
企左響到，面目猙獰咁望住佢。

兩個人…

倒豎葱咁對望。

你…夠膽試下嗎？

方法，真係好簡單。




倒豎葱　　參考圖片