細細個見到嘅靈異事件勿語: （九）中學 - 有個影

（九）中學 - 有個影

每間中學都總會有傳聞，校舍前身係亂葬崗、曾經有MISS自殺過、
廁所有一格永遠上鎖、門口銅像個樣貌在特定時間識笑，或流淚等等。

我地都唔例外。

D高form師兄總係會無啦啦唔覺意滲d滲d咁話比我地d「新丁」知，
d女生又再你傳下我傳下，搞到大家都唔敢去廁所呀，
跟住又有d大膽仔揚言要探險等等。





我，其實一聽到佢地開講呢個話題，都會儘量避之則吉，閃先。

因為以我自己見到嘅經驗黎講，好多時當一班人圍埋講鬼故，都會聚「佢地」過黎。

所以如果你地講鬼故，總係覺得沾寒沾凍，背脊有人望住你咁，
恭喜你，係你講得太吸引嚕。

順帶一提，自己一個對住電腦聽收音機都會引到嘅，呢個之後再分享。





一班人圍埋講鬼故，總係有d時候避無可避。話說果次，做中史group project，
我地group五個人就放學後留係校內操場d長檯到做project。
天色漸晚，除左我地，校內都無剩低幾多個人。
「係最啱講鬼故嘅時候。」其中一個同學就話。

我即刻：「咪啦，做唔切架喇份project…搞掂先啦。」 即刻引黎眾人恥笑我淆底嘅聲音。

然後，大家就已經進入聽鬼故mode喇。

咁個同學就講喇： 「聞說，四樓女廁入面最角落一定有把掃把棟起咁擺，即係掃把頭朝天，無人會郁佢。




話曾經有人拎左黎掃地，就咁隨手放係度，就響塊鏡到見到一個好高嘅男人企響廁格入面，
果種身高，係高過成個廁格屏風果種。」 大家連抖氣都唔敢咁大聲。

繼續。

而一邊聽，一邊驚嘅我，突然眼尾瞄到隔離另一張長檯到，坐左一個人。

我地基本上由四點半坐到而家將近七點，夜媽媽，
如果有人行過黎我地張檯附近，係一定會見到嘅。
而且，坐響到果個人衣著有d奇怪。
唔係而家呢個年代d衣著咁，似係七十年代果d中年男人打扮。

非常實體咁坐響隔離檯。

離我地其實五步之內。





我心諗，大鑊。

我望望大家有無異樣，大家仍然津津樂道咁聽緊鬼故。

一路講。

佢就一路坐左響到，岳高頭，似係望住一d嘢。

我就從佢望緊果個方向望上去。

個男人望住嘅係，校舍嘅天台。

我望上去，見到一個黑影企左响上面，然後，無聲咁，跌左落黎。





好快。

我即刻合埋眼，一打開，乜野都無。

同學繼續講佢嘅校院鬼故事，我自己已經打曬冷震。

我回頭再睇下隔離張檯，個男人已經唔見左。

之後，學校要鎖門，我地走喇。
當我地出左校門，一齊行落去巴士站果陣，
我再次響出邊d圍柵到望返入學校裡面，
操場雖然熄曬燈，好黑，
但我仍清楚見返頭先個男人，再次坐響果個位到，
但係今次，唔係望住頂樓天台，係望住我地前邊個段路。





我唔敢再回頭望落去，只管同同學一直行，一直扮無野咁傾下計。

呢段路夜晚呢d時候無乜人無乜車，只係得幾支昏黃色街燈，好靜。

望住前方，行呀行，我見到，前面盞街燈，
有一個好黑好高嘅人影，姿勢好似埃住條燈柱咁。

而高度，差不多係一條燈柱咁高。

一步一步，當大家行過條燈柱嘅時候，大家都無為意，
而我，當然已經心寒至極。只想儘快搭巴士離開。

行過燈柱幾步後，講鬼故既同學突然同我地講：

「唔...頭先你地發唔發現到，地下有六個人個影，係你同你嘅中間，多左一個。」佢指住其中兩位女同學。





女同學即刻「嘩」一聲叫出黎。

「哈哈，嚇你咋！」

「妖！」

然後，我地本能咁一齊擰去後面望下地下個影。

一，二，三，四，五... 無錯。

只不過，講鬼故同學個影，

好長好長... 一直... 我地無人夠膽望去影嘅盡頭，大家即刻面向前方，急步走去巴士站。

直到上巴士一刻，無人夠膽多出一句聲。

自此，都無拎出黎提過。

有個影    參考圖片