《藝文青》Vol.15: 【生活隨筆】旮旯《錯字》

旮旯/《錯字》

最近成日聽到有同事、朋友讀錯字或者寫（打）錯字，今日想分享下自己嘅見聞，嘗試糾正一下。

讀錯字方面，先講下最常見嘅懶音，好似「你」（讀：nei5）同「里」（讀：lei5）咁，「你」係有鼻音嘅，「里」則冇。

然後開始出現啲講錯完對方又真係可以聽錯嘅錯字，例如「江」（讀：gong1）同「光」（讀：gwong1），如果咁唔好彩係人名，叫錯幾尷尬呢！

當然仲有好多，舉兩多個例：「講」（讀：gong2）同「廣」（讀：gwong2）；「角」（讀：gok3）同「國」（讀：gwok3），同上面一樣都係差個w音，已經係另一隻字喇！





寫錯字方面，其實大部分都係同音不同義嘅「通假字」，最常見被稱為「火星文」，非「吾」同「唔」莫屬（同樣讀：ng4）。「吾」有「我」嘅釋義，如「吾等」即「我們」；「唔」則廣東話常講「唔係」、「唔錯」，即「不是」、「不錯」之意。

另一方面，就係字形相近，但完全唔一樣既「錯別字」。例如「辨」（讀：bin6）同「辦」（讀：bann6），「辨」則分辨、辨別；「辦」則辦事、創辦。中學老師傳授筆者嘅記法係：「辦」字間沒「力」即「辦事不力」。

最後，就係真真正正嘅「錯字」。「關」字有人「簡寫」作「門」內有「关」──「関」，呢個係日本漢字，如日本地方名「関西」，並唔係中文字，至於簡體字，WFC！