【我的日記】一個校園小毒拎既奮鬥故事: 從這裏開始
由於我小二已經搬左去馬鞍山住，所以中學打算搵返間近近地既，唔洗咁早起身。我成績唔算特別好，派位派左去一間麻麻既中學。
於是呀媽就帶左我去馬鞍山一間教會學校面試，一來校風幾好；二來同我同年表哥大輝都派左入去，希望有個照應。我個人對自己學業無咩要求，媽媽開心時我又無煩惱，何樂而不為？
就咁，我就考左入去。
大輝係其中一個同我由細玩到大；亦都由細恰我恰到大既親戚，自從佢升中前減肥成功，加上精通各種運動又善談，就搖身一變成為貌似万刀甲既陽光少年。而我，面色蒼白、又矮又瘦、冬菇頭、五官端正，但相比之下，實在係完全兩個世界既人，而慢慢我倆既生活圈子亦都愈走愈遠。
"呀仔！起身啦！今日係你第一日返學，又係編班試，你唔可以遲到?！"
"7點…"
我眼見阿媽早左一個鐘叫醒我，似乎佢對我既中學生涯非常緊張。我"斯斯然"行落碌架床，刷個牙洗個面，換好校服就出左門口，對於一個小五已經識由油麻地返馬鞍山既小朋友黎講，自己過兩個街口返學完全唔係問題。
說時遲那時快，我已經行到去學校門口，抬頭一望八個大字：
馬鞍山聖約畢中學。