愛在宇宙大爆炸前: （十四）

當晚，我地約埋去大排檔食飯，抬上放住我地各自既「寶物」。
林若妍因為聽朝就要搭飛機返意大利既關係，坐咗一陣就話要返屋企。
林逸峰同蔡婉玲不斷叫我送林若妍返屋企，甚至推我走，於是我地再次行果條路。

「呢幾年係外國生活慣唔慣呀？」我問。
「唔慣冇咗你地幾個嫁。」
「我地都唔慣冇咗你，有時間返黎探吓我地啦。」其實係我唔慣。
「係喎，之前聽你講話依家係大學做研究，做得慣嗎？」
「還可以啦，每日都有啲新鮮事，啱哂我呢啲怕悶既性格。」





佢冇出聲，我亦都開始詞窮。

我係袋入面拎咗教授早排發表既研究報告出黎，遞比林若妍睇。

「你冇睇錯人呀，呢啲就係證據。」我當然冇講出口。

林若妍拎住本報告，一頁一頁咁揭。

「雖然我睇唔明，不過我知道你做緊你自己想做既野已經足夠喇。」林若妍好認真咁望住本報告。





呢個時候，佢揭到我頭先睇緊果頁。
點解我會記得？因為我插咗張書籤吖嘛！

「勿忘我？」林若妍拎起張書籤。
「係呀，藍色花仔。」
「呢隻花叫勿忘我，你畢業果時我送過比你嫁。」

我唔會同佢講，呢朵花就係你當日送比我果朵。

「原來你真係鍾意勿忘我，即係我果日冇揀錯。」林若妍又笑。





「仲有冇聽周杰倫呀？」我問。
「有呀，《十二新作》吖嘛。」
「不過我都係鍾意佢啲舊歌多啲。」
「嗯，我都係。」

又到咗佢屋企樓下，又係臨別既幾句。

「聽日幾點走呀？」我問。
「朝早六點。」
「一路順風。」
「嗯。」

然後我地再次揮手道別。
佢轉身行大廈，我望住佢既背影越黎越細，直到我再望唔到。





我打咗個電話比林逸峰，原來佢地仲未完場，於是我又返咗去大排檔。

「點呀？有冇講個答案比佢知呀？」蔡婉玲問。

我嗌咗罐啤酒，一啖又一啖咁灌落肚。

「佢有冇同你講啲咩呀？」蔡婉玲又問。

我再飲。

果晚，我打咗電話返學校請第二日假，我地決定飲通宵。凌晨四點，林逸峰已經醉到訓著咗。
係呢個時候，蔡婉玲把握機會又追問我，於是我講哂成晚發生既事比佢聽。

「勿忘我？」佢好訝異。




「係呀，藍色花仔呀。」我已經有啲唔耐煩。

佢拎咗部電話出黎，都唔知做乜。
我再嗌多罐啤酒，希望我快啲好似林逸峰咁訓低，一醉解千愁。

我一拎起罐啤酒，蔡婉玲就質佢個電話去我隻手度。

「你自己睇。」講完，佢叫醒咗林逸峰。

「勿忘我」的花語：不要忘記我，真實的愛。

我擺低咗佢部電話，繼續飲。
我唔想知、唔想理、唔想諗。

「追啦！」林逸峰大嗌。




「唔追。」
「追呀！」蔡婉玲都嗌埋一份。
「唔追。」
「追呀！」
「要追都唔係等到今時今日。」
「追呀！」
「佢既未來係成個地球咁大，我既未來淨係一間實驗室咋！」
「追呀！」
「唔追。」
「追呀！」
「唔追。」…