愛在宇宙大爆炸前: （七）

籌備兩年既會考，係一個月之內結束。
時間快到好似啱啱先開學，眨吓眼就要行畢業禮咁。
林若妍既《藍色多瑙河》應該練到完美無暇，而我果首…劉老師話對初學者黎講已經好好。

畢業禮當日，林若妍既表演果然一如以往咁出色。
其實我有諗過拎住小提琴衝上台同佢合奏，好彩我冇咁做。

「我聽我阿爸講，每個男人總有一個決勝時刻。我係女仔我唔明呢啲係咩心態，不過我希望你可以好好把握屬於你既果一刻。」我終於明白，點解蔡婉玲同林若妍做到朋友。
「多謝你。」真心既。





畢業禮結束，我地返到班房攞畢業證書之後，同學都開始離開學校。
班房裡面得返我地四個。
我將收係班房角落既琴盒打開，攞起咗個小提琴。
第一粒音都未拉，林若妍已經笑得好甜、好甜。

我全程望住林若妍，望到佢都唔好意思，好幾次迴避我既視線。
我仲瞄到蔡婉玲有啲眼濕濕，同埋林逸峰打咗個喊露。

拉完首歌果刻，我拎咗部相機出黎。
「我想同你補影張合照，要笑得開心啲。」





除咗同林若妍合照，我地四個都影咗好多大合照，係學校每個角落取景。
我地四個係呢間學校相識，成為朋友，其實都係另一種緣份。

當晚，我即刻拎咗張合照去曬，等咗一個鐘終於到手。
我係成疊相當中搵返同林若妍既合照出黎，我地都笑得好燦爛，好開心。

仲有林逸峰個頭攝咗係我地兩個個頭中間。

考完會考既暑假，林若妍搵咗份暑期工係琴行教琴，蔡婉玲同屋企人去旅行，我就同林逸峰兩個去咗台灣慶祝畢業。




再見面已經係放榜。

當日依依不捨，原來連成績最差果個林逸峰都有16分，仲有兩年。
要傷心，都等到中七畢業再算啦。

預科既壓力比會考大得多，淨係應付每日既功課都已經用哂所有時間。
不過我每晚都會打電話比林若妍，閒話家常。

有一晚，林若妍既聲音比平時更認真。

「張浩賢，你有咩打算呀？」
我知道如果我再講無聊野，佢以後都唔會再理我。

不過我真係唔知應該點答。





「其實你啲物理咁好，不如試下讀物理，畢業之後做研究吖？」林若妍將一條好艱巨既路講得好簡單。
「我可以咩？」
「記唔記得果日你問我有咩打算，我答你啲咩呀？」
「你話想做鋼琴家。」
「你聽到我咁講，你有咩感想？」
「我覺得你一定得嫁，你彈琴彈得咁好，而且你有熱誠。」
「如果你同我講你想做研究，我都覺得你一定得嫁。加油呀。」林若妍笑得好溫柔。

因為你第一句加油，我發奮讀書。
因為你第二句加油，我升上中六。
因為你第三句加油，我會成為一個驚天地泣鬼神既科學家！

不過現實啲諗，叻人多的是，幾時論到我吖。
我一邊揭住果本大學課程慨覽，一邊尋找渺茫既機會。