《我老婆教我追女仔》: 第二十三章
就是這樣，不記得過了多久，就在Rachel又喝了數杯(對不起，有一半是我輸的)，差不多站不穩，他們終於收手放過我們(他們的目的好像就是要灌醉我們，但現在是Rachel醉倒而我沒醉，不過好像也達成了他們的目的)。
Tina提議道﹕「差唔多啦喎，我哋轉場囉。」
我心裏一突﹕『唔係飲得差唔多啦咩?仲轉場?』
Tina好像看穿我的心意﹕「唔駛驚，無你份呀，你同我哋送Rachel返屋企啦。佢企都企唔穩啦。」
Benny搭著Alex跟Carter的膊頭﹕「鬆啲吻，Let's go！」
Queenie與Stephanie扶著Rachel離開，Tina在外面截的士。
的士到來，Queenie與Stephanie七手八腳的將Rachel塞進的士裏，就拍拍屁股去下場了。
我突然醒起一件事，向她們大喊﹕「喂喂！Rachel佢住邊㗎?」
Stephanie回過頭﹕「我哋剩係知佢住青衣嗰邊咋，詳細地址你自己問佢啦。」
我感到頭有點發大，唯有先坐進的士再說。
「司機大佬，唔該去青衣方向先。」車子隨即發動。
我俯身替Rachel拉過安全帶想替她扣好時，Rachel垂下的長髮撩動著我的腮邊，淡淡酒氣混著少女獨有的幽香進攻著我的嗅覺，看著她紅撲撲的俏臉，一連串的刺激令我不期然產生生理反應。
啪啪啪啪啪......
『冷靜！冷靜！陳洛鋒你有小惠啦，小惠仲等緊你搵佢㗎！』
我用雙手拍著臉，令自己清醒一點。
「先生，請問去青衣邊度?」
對了，還是先解決Rachel地址的問題。
「Rachel，Rachel，你住邊度呀?」我輕拍她的臉龐問。
「嗯...我幫Samuel頂......」這個傻丫頭還在想著幫我頂酒，不禁令我有些感動......
努力了一會，她除了發出嗯嗯的聲音外，就問不出甚麼來了。我嘗試找了找她的手袋，除了電話銀包鑰匙和化妝袋外，就找不到其他東西了。看看手錶，現在是半夜二時半。我想了想，將她放在時鐘酒店嗎?雖則我沒有企圖，但心裏總覺得半夜帶著一個醉醺醺的美女到時鐘酒店是件很尷尬的事，這不是對周圍的人說我是禽獸，現在就要開餐嗎?
還是......回我家嗎?
「司機，唔該改去荃灣。」
還是回家吧，反正我可以睡沙發，還可以照顧著Rachel。
下車後，我揹著Rachel。在電梯大堂等候升降機時，看更劉伯看著我曖昧一笑。我不想解釋甚麼，只是尷尬的點點頭當做打招呼。
回到家門口，艱難的從褲袋拿出鑰匙打開門。
「喵！喵！~」
家中的兩隻貓在呼喚我。
「殊！有客人嚟咗，靜啲。」我小聲說。
兩隻傢伙靜靜的跟在我旁邊，我慢慢走到沙發前，再輕輕的將Rachel放下。然後到廚房倒了杯水。
「呼~」我喝了口水，再大呼一口氣。
放下水杯走出廳，Rachel已經倒在沙發上，兩隻傢伙跳上沙發在舔Rachel的臉。好像因為痕癢的關係，Rachel身體不斷在扭來扭去。
「呢兩隻嘢，唔係當咗Rachel係小惠呀？」我不禁失笑。
「嘔......嘔...」「喵嗚！喵！」
Rachel突然翻身作嘔，貓兒被她的大動作嚇得跳到地上，抬頭看著她。
『嘩！仆街，咪嘔住呀！』我見狀大驚，火速拉起Rachel到廁所......
「嘔...嘔......」Rachel對著坐廁吐得七葷八素。
『呼......好彩嚟得切......』
我輕輕拍著Rachel背脊﹕「無事呀嘛？嘔哂出嚟就舒服啦。」我有點內疚，畢竟她是因為幫我頂酒才會喝這麼多。
「咳......唔...我...我好好多啦......」Rachel臉色有點難看。
我從鏡櫃拿了一條新的毛巾，又拿了一隻杯子給她﹕「你面青青咁，快啲洗個面浪個口先啦。」
「唔該你......」Rachel有點靦腆的接過。
「我去斟杯水比你。」說罷我走到厨房倒了杯水。
「唔...唔該你呀，Samuel。」Rachel梳洗完，喝了一口水道。
我搖了搖頭，笑道﹕「傻啦！你係因為幫我頂酒先會咁咋嘛。應該講唔該嗰個人係我先啱。」
Rachel笑了笑﹕「好...好小事啫。」
我們接著都沒有說話，四周彌漫著尷尬的氣氛，我有點受不了，打破沉默﹕「係呀，其實我本來想送你返你屋企嘅，但佢哋剩係知你住青衣，又唔知你實際地址喎。咁喺的士度又叫你唔醒，所以咪唯有帶咗你上嚟我度囉。」
Rachel有點不知所措﹕「呀...我...咁我唔阻你啦，我走先啦！」說罷慌張的走到大門口想穿鞋離開。
「喂！手袋都唔要啦？」我拿著她的手袋，笑著對她說。
「呀......sor...sorry......」說罷又想走過來拿手袋。
我搖了搖頭，將手袋放在枱上﹕「而家三點幾啦，夜麻麻你一個女仔好危險呀，你留喺度瞓一晚啦！」
Rachel的耳根發紅，遲疑道﹕「但...但係......」
我裝作不懷好意，踏前一步邪笑﹕「定係你覺得留喺度仲危險呀?嘿嘿......」
Rachel給我嚇得退了一步﹕「唔...唔係呀......我驚你唔方便咋......」
我哈哈一笑﹕「今晚你瞓我房啦，我一陣換過啲新被鋪比你，我瞓廳得啦。」
Rachel暗地鬆了一口氣，又好像有點失望。
接著我走到房間將我的被鋪拿到沙發，再在衣櫃找新的鋪在床上。
鋪床後，想起Rachel還是一身套裝，就拿了小惠的T-shirt短褲出去。
對了，小惠留在宿舍的東西，之後都被我搬回家了。現在就跟著我放在這個家裏。
「你去沖個涼先瞓啦！嗱！」我將替換衣服遞給她。
Rachel有點疑惑的看著手上的細碼T-shirt和女裝短褲。
我笑道﹕「放心，我無易服僻，啲衫我個妹㗎，佢有時會上嚟捉我做白老鼠，要我食佢啲新菜式。」我隨便編了個理由，免得要解釋這些衣服的女主人。
Rachel噗嗤一笑﹕「你妹妹又對你幾好喎！佢煮嘢一定好好食喇！」
Rachel這句說話，將我拉到回憶當中......
「嘩！你用鹽嚟煎蛋㗎?咁Q咸嘅？」我咬了一口雞蛋後說道。
「咩啫！我點知要落幾多鹽喎！我平時食蛋都唔落鹽嘅。」小惠辯駁。
「煎隻蛋落幾多鹽都唔知？有無搞錯呀！你點做人老婆㗎？」我大聲道。
「咩啫咩啫！平時都係老公煮嘅，我剩係負責食咋嘛~」小惠囂張道。
我大受打擊，雙手抱頭哀號﹕「咩話?仲要我煮比你食?我點解會娶個咁嘅老婆㗎?天呀！我上一世究竟做錯咗啲咩呀?祢要咁對我！」
小惠走過來扭著我耳朵，嗔道﹕「講咩呀你?比機會你服侍本小姐已經三生有幸啦！老公不知幾enjoy煮嘢比我食呀！佢又咩都識整，又煮得好食喎！住家飯又得，pasta又得，pizza又得，甜品又得，蛋糕又得，麵包又得......(下刪一萬字)」
想起了小惠，心裏甜甜的，再想起了她的廚藝，又不禁苦笑起來。
「哈哈......你以為啦，佢整啲嘢真係難食到呀...」我苦笑著搖頭。
Rachel微笑道﹕「唔好咁啦，人哋煮埋比你食仲咁多要求。」
『所以我而家咪自己煮比自己食囉！』
小惠離開之後，我努力鑽研廚藝，希望可以做到她口中的我。慢慢的，我發現自己對下廚真的很有興趣，而且很有天份，嚐過我廚藝的都讚不絕口。
「好啦好啦，仲講就天光啦，快啲去沖涼然後瞓覺啦！」我將Rachel推進浴室。
潺潺水聲從浴室傳出，令我有點想入非非。我過去沙發和兩隻傢伙玩耍，希望分心藉以驅走腦中的歪念，但好像不太成功，腦中翻來覆去都是一些色色的畫面。
「Samuel，請問你有無風筒呀?」不知過了多久，Rachel一身T-shirt短褲，側著頭，邊用毛巾抺著頭髮邊走過來。
我看著她暴露在短褲外的大腿，咕嚕的吞著口水﹕「喺...喺你前面鞋櫃右手面個櫃桶。」
「哦。」Rachel好像沒有發現我的醜態，逕自走向鞋櫃。
「呀！......」Rachel踏到地上的水漬，滑了一滑，向前仆來......
「小心！...」我馬上衝上前，希望可以及時扶住她......
噗！Rachel整個軟綿綿的軀體撲進我懷裏！(讀者甲按﹕嘩！搞撚錯呀啲劇情咁老土㗎！你估你係CCTVB 啲膠劇呀！)
Rachel雙手抱著我，頭枕在我胸口，豐滿的乳房緊壓著我小腹，這個質感......
『嘩頂你！連bra都無戴想點呀?而家啲女仔瞓覺興唔戴bra 㗎?』
鼻端傳來少女沐浴後獨有的香氣，以及小腹感受著軟綿綿的質感，都不繼刺激著我的男性荷爾蒙。理智壓不過身體的原始慾望，老二漸漸舉旗致敬，準備應戰......
Rachel紅暈滿臉的抬起頭，星眸迷濛的看著我，然後雙手掛在我的頸後，將我的頭慢慢拉向她......Rachel踮起雙腳，亦慢慢將蜜桃色的嘴唇湊上來......
『喂等...等等，你唔係酒醒啦咩，點解仲可以借醉行兇㗎?！』
噗嗵..噗嗵..噗嗵......我彷彿只聽到我倆急促的心跳聲......
慢慢的，Rachel的雙唇印上我的唇...嗯...好軟...好香...好甜......
「喵！喵！喵！喵！」
(喂喂喂！醒呀！而家唔係打車輪嘅時候呀！)
我醒了一醒，貓星人的叫聲好像提示著我牠們的女主人不是眼前這個女的。
殘存的理智馬上從腦海深處冒出，與情慾大軍交戰......(讀者乙按﹕屌！係扑嘢就快啦，咁撚多口水，我睇咗十幾萬字都係為呢刻咋！)
『小惠呢?你愛嘅小惠呢?』理智天使道。
『都唔知幾時先見返，而家有嘢食就食咗先啦，你又唔係坐懷不亂嘅柳下惠，食住等都得嘅啫！』情慾魔鬼鬆容的道。
『你唔係話驚到時見返小惠時你又同第二個一齊緊嘅咩?邊可以食住等㗎?』天使反駁。
『唓！到時見返小惠咪飛左手頭嗰個囉，你又唔係同人結婚，怕咩啫！』魔鬼態度輕佻。
『唔得！咁你即係玩人啫！Rachel咁好女仔你唔可以傷害佢！』天使怒道。
『而家係佢自己送上門咋喎，呀鋒又唔係主動嗰個。而且Benny佢哋都話有食唔食，罪大惡極呀！政府都叫人咪做大嘥鬼啦！咁折墜會比人燒春袋㗎！』魔鬼說得頭頭是道。
『而且Rachel咁正！唔食就真係對唔住自己啦，嘿嘿......』魔鬼笑淫淫，嘴角延著唾液。
『呀鋒，你諗番小惠！你諗吓佢喺未來返嚟幫你追Fiona喎，有邊個老婆會愛自己老公愛到咁㗎?你諗吓佢為你做咗幾多嘢?同埋你唔係應承咗Fiona會等小惠㗎咩?』天使聲嘶力竭出了最後一擊。
混沌的大腦頓時清醒過來，我知道我應該怎麼做......
就在理智重新控制大腦，打算推開Rachel的時候，她的香舌已經順勢滑進來，當舌尖碰上舌尖時，我腦裏「轟」的一聲斷了線......
小惠...對..對不起......我控制不了自己......
我跟Rachel兩舌交纏，她騰出一隻手遊到我胸口，逐顆逐顆的將恤衫鈕扣解開。我的手也沒有閒著，右手用力將她渾圓的臀部按向我下腹，左手潛到她T-shirt裏頭，溫柔的攀上峰巒，掌心似有還無的挑逗著山峰的頂端。
「嗯...嗯.嗯......嗯......」Rachel被我撩動得全身發熱，臉泛潮紅，更加努力吞吐著我的舌頭。
啪..啪啪啪....啪啪..啪啪啪啪.......(筆者按﹕巴打們著返條褲先，呢個只係一陣風吹起窗簾嘅聲音咋。)
我眼角朝窗邊瞧去，放在窗邊書枱上的相冊被狂風翻開，正好翻到一張我與小惠的合照，她正甜蜜的看著我，臉上溢滿幸福的笑意。一道閃電在我腦海中一劈而下，由頭頂直劈到另一個頭的頭頂，一下子將我的所有情慾打得無影無蹤......
「呀！」我脫離了Rachel的香唇並推開了她。
「............」Rachel眼神茫然若失的看著我。
「對...對..唔住....我...我......」這個時候我不知如何解釋，難道說我是性無能嗎?
我無意識的看了相冊一眼，Rachel好像醒悟過來，隨著我的視線，發現了打開了的相冊。
「佢......佢係...你女朋友?」Rachel語帶不安的問。
我不知如何解釋﹕「.....er.....算是吧......」
Rachel臉色刷白﹐淚水漸漸在大眼睛裏醖釀。
「Rachel，我...」
「唔...唔駛講...我明...係...係我唔好......」眼眶裏的淚水終於失控的流下。
「晚安...」Rachel哽咽的道，然後轉身走進房間並關上了門，留下我呆呆的站在大廳中。
我不敢進房安慰Rachel，怕得來不易的理智又再度失守。我走到書枱前，將相冊收好，再極速洗了個冷水澡冷卻自己，然後就捲縮在沙發上睡著了。
「喵~喵嗚~喵喵~」
怎麼這兩隻東西今天這麼吵?平時不是等我起來才會嚷肚子餓嗎?
我睡眼惺忪的起來，原來Rachel坐在茶几前逗這兩隻傢伙玩耍。
「起身啦?係咪嘈到你呀?」Rachel看了我一眼，繼續逗弄著貓兒。
我看了看鐘，早上十一時。
「唔係呀，都差唔多起身啦。」我看著Rachel，她好像甚麼事也沒有發生過一樣。
「係呢，佢哋叫咩名呀？」Rachel指了指兩隻傢伙。
「喵喵~」「喵~喵」牠倆就像知道Rachel問牠們的名字一樣，分別回答了她。
Rachel瞪大雙眼驚訝的看著兩隻貓星人，難以至信道﹕「佢哋聽得明我講咩？」
我聳了聳肩﹕「黃色嗰隻叫金仔，白色嗰隻叫小白。」我頓了一頓﹕「其實我都覺得佢哋聽得明我哋講咩，好神奇呀呵? 」
記得那年Year1復活節假期後，有一天我上完課回到宿舍......
咔喳~
我打開房門，將背囊拋到書桌，再一屁股坐在椅子上......
我感到椅子的質感好像有些奇怪，好像有點黏黏搭搭的，又好像有點濕濕的。我心感不妙，馬上站起看著剛坐著的地方。
「嘩屌！」兩條尾指般粗幼的動物糞便，現在已經扁扁的伏屍在椅子上，還有點殘缺不存。
『仆街！乜撚嘢喺我張櫈上面疴屎？』
我憤怒的四處張望，希望找出凶手碎屍萬段以洩我心頭之恨。忽然之間，我看到被子裏好像有些東西在蠕動。我輕輕的走到床前，心中有些忐忑，咕嚕的吞了一下口水，然後手執被子一角，大力一掀！
「喵嗚~」
一黃一白的小貓在我的床上爬來爬去，完全無視我的存在，自顧自的抓癢，打架玩耍。
「盧家惠！！！」我咆哮！
「咩事呀?嘈喧巴閉！」小惠慢條斯理的從廁所走出來。
我怒髮衝冠的指著兩隻小傢伙﹕「呢兩隻咩嚟㗎?唔駛問一定係你執返嚟㗎啦？」對於愛心爆棚，而且極度愛貓的小惠來說，這是毫無懸念的答案。
小惠白了我一眼﹕「呢兩隻咪貓貓囉，你唔係唔知呀？同埋唔好執執聲咁難聽，係佢哋兩個見到我就跟住我咋。」轉頭溫柔的向著貓咪說﹕「係咪呀?」
「喵~」
「喵！」
小傢伙像真的聽懂一樣，一起向小惠叫了聲。
「嘻！你睇吓！佢哋真係識聽我講嘢㗎！」小惠衝過去抱起牠們。
「我理得佢哋識唱歌呀！你睇吓！」我指著椅子以及我褲子上的殘留物。
「小小嘢就大驚小怪，洗咗佢咪得囉！」小惠無視我的投訴，繼續逗弄懷中的貓咪。
「你好快啲的走兩隻嘢啦，第一喺Hall唔比養猫，第二我唔想整到成間房都係屎屎尿尿。」雖然我不討厭貓，但被人發現真的很麻煩，而且屎屎尿尿的確是一個大問題。
小惠將小貓放在床上看著牠們﹕「佢哋又叻又乖，你唔講我唔講又點會比人發現喎，貓咪呵~」
「喵~」小傢伙跟小惠在唱雙簧。
我態度有點軟下來﹕「咁每日啲屎屎尿尿都好大問題喎！」
小惠跑到廁所又跑回來，手上已經多了個修剪過的A4紙箱﹕「我會教佢哋去呢個貓廁所疴㗎啦，唔會搞到周圍都係。」
我沒好氣﹕「咁細隻貓邊教得識呀？你估佢哋真係識聽你講嘢呀﹖」
小惠白了我一眼又向著小傢伙說﹕「佢咁蠢就教唔識！貓咪呵~」
「喵！」牠們一起轉頭看著我叫了一聲。
『嘩屌！有無咁勁呀？唔通佢哋真係外星人？喺地球扮貓然後侵略地球？』我頓時想起周柏豪的《報告總師令》。
小惠逕自走到倚子，用紙巾拿起兩條扁貓糞，放到A4紙箱裏面，而紙箱裏已經有一堆報紙碎墊著。
「貓貓，呢個以後就係你哋嘅廁所啦，唔準再周圍疴啦，知唔知？」小惠將貓咪放在紙箱裏，然後對著牠們訓話。
嗦...嗦......嗦...嗦，小貓們在紙箱內四處探索，又嗅了嗅那兩條扁糞，然後一起抬起頭向小惠叫了一聲。
小惠大喜，撫摸著牠們的頭﹕「乖喇乖喇！」
我心裏大駭﹕『嘩！講一次就識？真係外星人嚟㗎！睇嚟真係要去搵呀雲海嚟收服佢兩隻嘢先得呀！』
小惠眼睛一轉，自言自語﹕「唔...佢哋叫咩名好呢？」
我在清潔椅子，聞言隨口道﹕「黃色嘅就叫呀黃，白色嘅就叫呀白啦！」
小惠白了我一眼﹕「乜你咁求其㗎！」
我鼻孔噴氣﹕「咩求其呀？唔啱你又改嚟聽吓呀?」我轉頭望向小傢伙道﹕「你哋話係唔係呀?呀黃呀白?」心想牠們一定會回應我，怎知牠們看也沒看我，一隻打了一個大大的呵欠，另一隻伸起後腿在舔毛。
「哈哈，佢哋唔理你呀，都話呢兩個名求其㗎啦！」惠惠不屑的道。
她看了看牠們，想了想﹕「唔......你就叫金仔啦！」她指著黃毛的那隻。「而你...就叫小白啦！」她指著另一隻白毛的道。「好！就咁決定！你哋鐘唔鐘意個名呀?」
『頂！有咩分別?咪又係一樣求戀其?』
「喵~」
「喵！」
『搞錯呀！我叫就唔理，女叫就即刻應！你哋唔係貓嚟㗎咩?幾時做咗狗公㗎?我肯定你哋一定有柄！』
我走過去拿起牠倆的後腿看了看，『果然！』。
「喂！你做咩呀?」小惠喝道。
「無呀，我睇吓佢哋公定乸咋嘛，我見你嗌親佢哋都會應，我就騷都唔騷吓。」
「果然係狗公。」然後我邊點頭邊作恍然大悟狀。
「你先係狗公呀！」小惠抱起牠倆在胸前，對牠們溫柔的說﹕「我哋仲係BB嚟㗎~」
「喵~喵嗚~喵~」
我看著兩隻披著貓皮的狗公被小惠豐滿的胸脯擠得一面享受，還發出歡愉的叫聲，真是令我羡慕嫉妒恨呀！
「佢哋係貓星人嚟㗎嘛，肯定聽得明我哋講咩嘅。」Rachel的說話將我拉回現實。
「嘩！」兩隻狗公突然一起跳到Rachel胸前，嚇了Rachel一跳。
「喵喵~喵~喵嗚~喵~」兩隻傢伙在Rachel胸前翻來覆去，享盡溫柔。
四周只剩下貓的叫聲，尷尬的氣氛開始彌漫......
我受不了這種氛圍，決定打破沉默﹕「Rachel，其實我噚晚...」
「你肚唔肚餓呀?我煲咗粥呀，你快啲去刷牙洗面先啦！」Rachel截住我的下半句。
我唯有先去梳洗，出來後，已經見到飯桌上放著一鍋粥。
「唔好意思喎，未問過你就用你個廚房。」Rachel端給我一碗粥，粥裏飄著粟米的香氣。
「係我唔好意思就真，過門都係客仲要你落手落腳整埋早餐。」我喝了一口粥，真心讚道﹕「好好味喎！」
「我見你雪櫃有盒粟米蓉同有啲肉絲，咪丟哂落煲粥度囉。」Rachel笑了笑，一小口一小口的呷著粥。
粟米肉碎粥?我想起當年小惠煮給我吃的「粟米膠粒肉羹粥」，心裏一甜。
我喝著粥，偷看了Rachel一眼，心想﹕『解唔解釋返噚晚件事好呢?解釋又好似好尷尬。唔解釋又好似搞到我係衰人咁，明明有女朋友都話無。』『而家搞到我好似扮到好專一咁但又想呃蝦條喎！唉！死就死啦！』
我豁了出去﹕「嗯...其...其實我噚晚話我有女朋...」
「嗯，我明白㗎啦，你唔駛解釋喎。」Rachel又截住我的說話，有點黯然道。
「唉！你聽我講先！嗯...我比啲嘢你睇。」說罷我走到書桌拿了相冊給Rachel看。
「呢個叫小惠，係我讀U嗰陣識嘅。」我指著相中的少女說。
「嚴格嚟講，她係我老婆，未來嘅老婆。」我決定將整個故事說給她聽。
「吓?！」Rachel瞪大眼睛看著我，一臉訝異，不明白我是甚麼意思。
接著我就將我和小惠的故事一五一十的告訴她。
Rachel一臉疑惑道﹕「嗯......假設你講嘅嘢係真嘅......」
我認真道﹕「真！珍珠都無咁真！」
Rachel微笑道﹕「咁我覺得如果你要呃我嘅，都唔駛諗一個咁無稽嘅理由嘅。」
我喜道﹕「你信我講嘅嘢?」
Rachel點頭道﹕「信呀，正如你嗰陣都信小惠啦。」
我點頭道﹕「咁佢知道哂我所有嘢喎，我都好難唔信啦。」
Rachel側頭想了一想，沒有再說甚麼。
過了一會，她道﹕「所以，你而家就等緊同而家嘅小惠相遇?」然後咬了一口我煮的意粉。
「嗯，但我都唔知要等幾耐先可以撞返佢......」我用叉捲著碟中的意粉，卻沒有放進口中。
「等我仲以為你係有個女朋友喺外國，先至......」Rachel俏臉突然一紅，好像想到了甚麼。
「嘿！如果唔係有小惠喺度，我一定會追你㗎！」我故作輕挑，希望令氣氛可以輕鬆一些。
Rachel手抬下巴看著我，語帶挑逗﹕「其實而家都可以㗎，反正你又未遇返小惠，不如我哋......」
『嘩天呀！點解我識小惠之前識唔到個咁正嘅女㗎?祢係咪玩鳩我呀?一係就唔比嘢我食，一係就叫我有得睇無得食！』
「我認輸！我投降啦！」我高舉雙手。
Rachel抿嘴淺笑，續道﹕「其實你而家都有啲嘢可以做吓嘅...」
我馬上追問﹕「係咩呀?係咩呀?」
Rachel安撫我道﹕「冷靜啲。你咪話最初佢叫你學日文，係因為你鐘意嗰個女仔都揀咗日文嘅?但其實你後尾先發現個女仔根本無揀日文讀，反而因為你知道小惠讀過日文，所以叫佢都一齊讀。」
「嗯，無錯。」
Rachel續道﹕「而且小惠嗰陣已經有初階日文嘅水平，係唔係?」
我點頭。
「咁即係話，小惠喺未來嘅時候，係已經修讀咗初階嘅日文啦。咁你知唔知佢係喺邊度學日文㗎?」
「知！知！佢話過係喺九龍灣間HKU Space讀㗎！」我腦袋靈光一閃，好像想到了甚麼。
「唔...咁佢有無話讀咗幾耐呀?」
「佢話嚟搵我之前讀緊初階日文。」
「咁就得啦！咁即係話喺佢遇到你之前，佢嘅日文程度就一定係維持喺初階日文完滿以下啦！而佢又係讀完無耐就返咗過去，咁即係話而家嘅小惠好可能係啱啱開始，又或者係讀咗日文一段短時間......」
「啊！我知道啦，咁我而家即刻去報名！」說罷我馬上站起來。
「等等，冷靜啲先，間學校唔會走咗去嘅。」Rachel拉著我讓我坐下，續道﹕「當然，佢都可能係遇到你之後先開始讀日文，咁如果真係咁嘅話，你就唯有繼續等落去啦。」
我搖了搖頭﹕「我唔想再等啦！我已經等咗好耐啦！」
Rachel表情好像有點落寞﹕「咁...咁其實而家係7月，據我所知HKU Space啲課程通常都係9月中先開始嘅，你而家慢慢去搵資料先決定報邊班都未遲。」
我感到未來充滿希望，不禁緊握著Rachel雙手，感激道﹕「多謝你呀！好彩有你提醒我咋！如果唔係我都唔知幾時先遇返小惠呀！」
Rachel臉頰紅了一紅﹕「唔...唔駛......」
「噢！...sorry......」我剛剛才發現自己握著Rachel軟綿綿的雙手，立時縮開。
四周再次彌漫著尷尬的空氣......
「呀！估...估唔到你頭腦都幾清晰喎，咁都比你搵到可以遇返小惠嘅方法。」我有點沒話找話說。
「嘻！旁觀者清啫。」
「好啦！為咗多謝你，我今晚請你刷餐勁啦！」
「好呀！咁我就唔客氣啦！」