《我老婆教我追女仔》: 第八章
我吹著口哨，在九龍塘地鐵站的月台等著。
一個倩影漸漸在右方出現，我向她用力揮著手。
她發現了我，向我揮了一下手，笑著的走了過來。
「次次都係你早過我嘅。」Fiona笑道。
Fiona今天穿著卡其色長袖衫，外加深藍色厚外套，灰黑色短褲配上黑色襪褲，再加上黑色的絨布短靴。雖然顏色較為深沉，但無損她少女的可愛味道，與小惠可謂是各擅勝場。
我的視線被她深深吸引著，沒法子離開她，笑道﹕「無理由要一個靚女等㗎嘛，係咪?」小惠教我現在跟Fiona的對話可以輕挑一點，可以讓彼此的距離拉近更多。
Fiona臉紅一紅﹕「哼！口花花！有車啦，行啦！」
「係係！」我馬上跟她走進車廂。
沿途上我的目光百分之九十的時間都停留在Fiona上，看得她忍不住問我﹕「我塊面係咪有啲咩呀?」
我笑道﹕「係呀，有好多嘢黐咗喺你塊面度。」
Fiona大急﹕「吓?係咩呀?」然後拿出鏡子左照右照。
她邊照邊疑惑道﹕「無呀?有啲咩呀?」
我笑著點了點她的五官道﹕「呢度、呢度、呢度同呢度，咪黐咗啲好靚嘅眼耳口鼻喺度囉。」
Fiona雙頰緋紅，拍了我一下嗔道﹕「好啦，再亂講嘢我返屋企啦。」
我笑道﹕「okok，我唔講嘢啦。」說罷乖乖閉嘴，只是定定的看著她。
過了一會，她又嗔道﹕「做咩又望住人啫?」
我無奈道﹕「唔可以講嘢嘛，咪望住你囉~」
Fiona滿臉通紅的嬌嗔﹕「唔準望住我呀！」
我投降﹕「好好，唔望唔望。」說罷將目光投到車窗外。
我從潻黑的車窗窺看著Fiona，發現她偷偷瞄了我好幾眼，我心裏暗暗好笑，繼續默不作聲。
過了好一會兒，Fiona受不了靜默的氣氛，輕輕拉一拉我衣袖，輕聲道﹕「做咩唔出聲呀?」
我轉頭看著她，指著自己的嘴巴，又做了個交叉的手勢，唔唔作聲，示意我不能說話。
Fiona噗哧一笑﹕「你唔亂講嘢咪比你講囉。」
我笑道﹕「我唔亂講嘢就無嘢好講啦~」
Fiona白了我一眼，沒好氣的道﹕「講啦講啦！講飽佢啦！」說罷就鼓起腮別過一面。
我拍了拍她肩膊，笑道﹕「喂，你食咗早餐未呀?」我拿出了一包朱古力在她眼前晃了晃。
Fiona瞳孔放大，訝道﹕「你點知我鐘意食呢隻朱古力㗎?」伸手就拿走了朱古力。
我聳聳肩，若無其事的道﹕「我唔知㗎，我都鐘意食咋。」制造共通點也是增加好感的方法，這當然是小惠告訴我的。
Fiona收起了朱古力，調皮道﹕「咁呢包朱古力就當係報答我上個禮拜買比你嘅蛋糕啦！」
我苦起口臉﹕「咁我早餐食咩呀?」
Fiona呵呵笑了起來﹕「睇住我食囉。」
說說笑笑，我們已經站在濕地公園門口了。
我馬上拿出相機，向Fiona道﹕「我去叫人同我哋影張相囉。」
Fiona點頭﹕「好呀。」
我東張西望，找了一個外表慈祥的大叔，馬上跑了過去。
「唔該，可唔可以幫我哋影張相呀?」我指了指Fiona。
大叔爽快答應﹕「好呀！」
「er呢...係咁嘅，我追緊嗰個女仔，咁一陣你可唔可以叫我哋企埋啲親密啲咁影相呀?」我有點難為情道。
大叔作了個明瞭的眼神，拍著我的肩膊﹕「無問題！無問題！」又做出OK的手勢。
「唔該哂！」我給了一個感激的眼神，接著就跑回Fiona身邊。
「你同個大叔講咩講咁耐呀?」Fiona疑惑的問我。
「哦，個大叔唔係好識用個相機，我教佢用咋嘛。」我當然不會老實說。
這時大叔向我們喊﹕「好喇，要影喇，準備。」然後就舉起相機。
我站在Fiona旁邊，刻意離遠一點。
大叔馬上又喊﹕「你哋企埋啲，我影唔哂個景呀。」
我和Fiona聽到後都各自站近了一點。
大叔邊打手勢邊喊﹕「再埋啲，親密啲......」
我心裏暗爽，大讚大叔辦事得力。
正當我和Fiona已經肩貼肩，手臂碰手臂時，大叔突然喊﹕「後生仔你搭住女仔個膊頭啦，咁樣影好睇啲呀。」
哇塞！大叔你未免太給力了吧?待會我要給你報酬嗎?
我有點不知所措的看了看Fiona，正好和她的眼神對上，只見她俏臉一紅就低下了頭。
小惠說過，大部分事情女孩子不拒絕就等於默許，那麼Fiona現在是默許吧?
不管那麼多了，搭膊頭而已，又不是接吻，先搭了再說。
我伸手搭著Fiona的肩膊，感到她的嬌軀震了一下。
大叔的聲音傳來﹕「望鏡頭啦，一、二、三、笑~」
咔喳~
「再嚟多張。」
咔喳~
我跑到大叔身邊，握著他的手，衷心感激道﹕「唔該哂！唔該哂你呀！」
大叔哈哈一笑﹕「小事啦！你哋係咪入去濕地公園呀?一陣如果撞到我再幫你哋影相啦！」
我點頭如搗蒜﹕「好呀好呀！」
我愉快的跟大叔說再見，就走回Fiona身邊。
「你同個大叔好似好好傾喎。」Fiona笑著說。
我點頭﹕「係呀，佢話佢都係入去公園，話一陣撞到我哋再同我哋影相喎。」
Fiona有點害羞道﹕「係呀?我哋入去囉。」
「嘩！嗰隻雀成身白色，但係個嘴又扁又長，個樣好得意呀！叫咩名呀?」Fiona沒想過我會回答，逕自去找那些鳥類介紹牌。
我充滿自信﹕「呢隻叫黑臉琵鷺，係冬季季候鳥嚟㗎。」
Fiona剛好找到介紹牌，訝道﹕「咦?係喎！呀Sam你咁犀利一睇就知嘅?」
我裝作謙虛一笑﹕「嘿嘿......曾經有段時間有啲興趣研究過下啦......」這當然是昨晚惡補了數小時的成果。
然後我拿出望遠鏡遞給Fiona﹕「用呢個睇啦，清楚啲呀。」
Fiona接過望遠鏡，喜道﹕「估到你裝備齊全喎。」然後就用望遠鏡觀雀。
我趁著這段時間，拿出相機拍下了幾張Fiona漂亮的特寫。
之後，Fiona每見到一些漂亮的動物或植物，都放棄了尋找介紹牌，改而直接問我。
「呀Sam，藍色嗰隻又叫咩名呀？」
「Sam，呢朵花呢？」
「Sam，咁呢隻蜻蜓呢？」
Fiona簡直當我是人肉導覽一樣，不斷抓著我問東問西。
「呀Sam你喺度真係好呀！有咩唔知都可以問你。」
Fiona的稱讚令我感到飄飄然，我當然裝作謙虛﹕「其實都係咁啱之前見過啫......」如果你是問我濕地公園以外的東西，我就要出洋相了。
「Sam，我去一去洗手間先。」
我點了點頭，然後就坐在附近的椅子等候。
『趁呢個時候，話比小惠知進度良好都好喎。』
我馬上發訊息給小惠。
「好彩你上次提我要影低啲資料啫，真係超有用！」
「有用就得啦」
「仲有多謝你個望遠鏡」
「想多謝我就買嘢食返嚟比我」
「咁你想食咩？」
「唔......我要食榴槤雪糕」
「.......咁高難度？邊度有得買呀？」
「你諗你啦，總之我一定要食！」
正當我繼續想問小惠時，手臂給人拍了一下。
「喂！行得啦！同邊個傾緊偈呀？」Fiona的一雙大眼睛看著我。
我馬上將電話放回褲袋，有點心虛的道﹕「無...無呀，同呀媽講聽日先返屋企咋嘛。」不知不覺我就對Fiona說了謊話，心裏覺得跟她約會時和別的女孩通訊息還是很不妥。
Fiona不以為意﹕「咁行得未？」
「行啦行啦。」
又走到那些植有紅樹林的濕地區域。
Fiona指著下面﹕「你睇下，係彈塗魚呀！」「嘩！仲有招潮蟹呀！佢哋隻槓好大隻呀！」
看著招潮蟹，我又想起炸蟹鉗，「哈」的一聲笑了出來。
Fiona聽到我的笑聲，疑惑的看著我。
我笑道﹕「你話如果隻槓再大隻啲攞嚟做炸蟹鉗都應該唔錯喎。」
Fiona「格」的一聲笑出來﹕「咁為食㗎你！」
我笑道﹕「你諗吓下面啲招潮蟹隻槓變哂炸蟹鉗咁樣。」
我倆一起運用起想像力來，同時間嘻哈大笑起來。
「咦？你哋喺呢度呀？」一把熟悉的聲音傳來。
我們一起向聲音來源望去，一個大叔正走近我們。
「嗨！我哋又撞到啦！」我愉快道。
「呢度個景咁靚，再幫你哋影張相啦！」說罷給了我一個眼神示意。
『嘩大叔！我口都未開你已經開聲，搞到我直情想啜你一啖呀！』
「好呀！」我馬上答應，將相機交給大叔並走回Fiona身邊。
這次我只是乖乖的站在Fiona旁邊，沒有刻意靠近或遠離，因為我知道大叔一定會有進一步指示。
果然。
「靚女你要撓住男仔隻手，咁樣影先好睇呀！」
「吓?哦......」只見Fiona紅著臉，雙手慢慢的挽著我的右手。
今天真是出路遇貴人，大叔你是我的再生父母啊！
拍完照，大叔又跟我們揮手道別。
Fiona看著遠去的大叔﹕「呢個大叔都幾熱情喎。」
我看著相機裏剛拍的親密照，愉快道﹕「係啦，呢個呀叔真係好人屎！」
走走逛逛，一直到了下午五時左右我們才捨得離開。
「呀.......」我對著冬日的斜陽伸了個懶腰，感受著和暖的日光，突然間想到了一個好主意。
我興奮的問Fiona﹕「Fiona，有無興趣去睇日落?」
Fiona訝道﹕「日落?去邊度睇呀?」
「你跟我嚟就得啦。」說罷興奮得拉起她的手臂就走。
「下白泥，專係睇日落嗰度呀唔該。」其實我也不知道實際地址，唯有依靠的士司機吧。
Fiona看了看外面的天色，有點擔心道﹕「太陽好似就落山啦......」
我自信道﹕「唔駛驚，我啱啱check過天文台，六點二先日落，而家仲有差唔多成粒鐘，實趕得切。」
沒多久，我們已經坐在下白泥某一塊石頭上，面向著夕陽。四周圍坐著三三兩兩的情侶，看來目的和我們一樣。
「呀Sam，你之前有無嚟過呢度睇日落呀?」Fiona輕輕問道。
「無呀，第一次嚟咋，仲係第一次......」我看了她一眼，就沒法再移開目光了。只見夕陽中的Fiona眼波流轉，臉龐散發著柔柔金光，髮絲隨著微風飄揚，這個畫面真的美呆了！
Fiona聽我說了一半就停下，轉過頭問我﹕「第一次咩呀?」她發現我呆呆的看著她，俏臉一紅又別過臉去。
我不好意思看下去，同時別過臉迎著夕陽﹕「第一次專登去睇日落。」
『仲要係同鐘意嘅人一齊去睇。』我心裏默默想著。
這一刻我就是沒膽說出來。或者說出來了，下一刻就可以牽著她的手。
「我都係呀。」Fiona頓了一頓，又道﹕「個太陽好靚呀！」
「嗯！真係好靚！」我點了點頭。
靜默了一會，Fiona突然問我﹕「係呢，你同小惠由細玩到大㗎?」
我心中一突，看了她一眼，語氣裝作平靜﹕「係呀，咁我大佢少少，細細個開始到佢去外國讀書之前都成日一齊玩。」
怎麼突然說起小惠?
Fiona繼續語出驚人﹕「你唔覺得小惠鐘意你咩?」
甚麼?為甚麼你會覺得小惠喜歡我?雖然我是她的未來老公，但我毫不感到她有丁點兒喜歡我啊，我覺得她只是喜歡打我而已。
我吃了一驚，馬上澄清﹕「吓?點會呀?佢剩係鐘意打我咋喎！同埋佢呢排同嗰個呀Roy行得咁埋。」小惠近幾次P.E.課後都跟那個Roy去吃飯，說起來我心裏都有一點戚戚然。
Fiona看了我一眼，淡淡然道﹕「哦?係咩?」
我奇道﹕「你點解會覺得佢會鐘意我嘅?」Fiona誤會了甚麼嗎?
Fiona道﹕「無呀，我諗住青梅竹馬嗰啲係會咁咋。」
就是這樣簡單?我暗呼一口氣。
這個時候，一陣海風吹來，Fiona瑟縮了一下。
我默默的脫下頸巾，然後圍在她的脖子。
Fiona看著我替她圍好了頸巾，望著我柔聲道﹕「咁你呢?你唔凍呀?」
我瑟縮了一下，老實答道﹕「凍㗎！但係你都凍嘛！我病好過你病啦。」
Fiona嗔道﹕「傻瓜！邊個病都唔好呀！」然後將頸巾脫下一半，圍在我的脖頸上，甜甜的對我笑道﹕「咁咪得囉~」
頸巾有如月老的紅線將我和Fiona連繫起來。拉近了的距離，讓她髮絲的香味若隱若現的飄過來，我看著她緋紅的側面，忍著想親吻她臉龐的衝動，默默的坐著。
噗通！噗通！噗通！
我心如鹿撞，為了舒緩一下緊張的心情，我拿出了電話按了幾按。
Fiona噗哧一笑﹕「做咩播歌呀?」
我笑道﹕「呢首歌好啱feel喎，等我唱比你聽啦！」
Fiona瞪大雙眼疑惑的看著我，這時候陳奕迅的《夕陽無限好》響起，我馬上「埋嘴」扮唱。
一曲既畢，Fiona拍手笑道﹕「你唱得好好聽喎！同陳奕迅完全有得揮呀！」
我得意洋洋﹕「緊係啦，如果我做歌星呀，Eason都要企埋一邊呀！」
Fiona掩嘴笑道﹕「係啦，叻啦你！」
然後又拍一拍我﹕「Sam你睇下，好靚呀！」
我倆一臉讚嘆的看著徐徐降下的夕陽，並感受著冬日的餘溫。
隨著最後一絲陽光消失在地平線上，我倆相視一笑。
我將頸上半條頸巾重新圍在Fiona頸上，然後站起來，向Fiona伸出手道﹕「走囉。」
「嗯。」Fiona扶著我的手，默默的隨著我從石灘走回馬路旁。
「我哋返去又一城食飯囉。」我提議。
Fiona微笑著點點頭﹕「好呀。」
一小時後，我們已經身處又一城。
Fiona問我﹕「我哋食咩呀？」
我想了想﹕「意粉pizza好嗎？」
Fiona道﹕「好呀。」
鏡頭一轉，我們已經坐在餐廳裏面。
我將餐牌遞給Fiona﹕「你睇下想食咩？」
Fiona推回給我﹕「你話事啦！我咩都食㗎。」
「哦。」我應了一聲，就專心看著餐牌。
正當我決定好，想招侍應生過來時，Fiona向著我的左後方說話。
「咦？乜咁啱嘅?」Fiona訝道。
我望向左方，赫然見到小惠跟賤人Roy正訝異的看著我們。
「係喎，你哋又嚟食飯呀？」小惠臉色回復平常。
Fiona笑道﹕「橫掂撞到，一齊食啦！」
我心裏有點不情不願，本來可以和Fiona撐枱腳，現在多了兩大個電燈泡，而且其中一個還是賤人Roy。但轉念一想，我正在為小惠和Roy在約會而發愁，這正好可以讓我一探究竟。
我心念電轉，馬上笑臉迎人﹕「係呀！一齊食飯啦！」
小惠用疑惑的眼光望著我﹕「會唔會阻住你哋呀？」
我虛偽笑道﹕「唔阻唔阻，你哋快啲坐低啦！多啲人一齊食容易啲點菜呀！」說罷我示意Fiona坐在我身旁，讓他們坐在我們的對面。
Roy坐下後，展示他的陽光笑容﹕「真係唔阻?」
『個人賤起上嚟笑都笑得衰啲！』
Fiona俏臉一紅沒有回答，我皮笑肉不笑﹕「你唔好怪我哋阻住你哋就得喇。」
『係呀！我就係要阻住你！吹咩？』
Fiona道﹕「我哋仲未嗌嘢食㗎，你哋睇下食啲咩？」然後將餐牌遞給小惠。
小惠看了看餐牌，又將目光瞟去我和Roy，Roy會意，笑道﹕「你話事啦，我無所謂。」
我亦聳聳肩﹕「你想嗌咩就嗌咩啦~」
小惠馬上招了侍應生來，點了一桌子的食物。
Fiona掩嘴笑道﹕「小惠你仲係點咁多呀？」
小惠撅撅嘴﹕「怕咩喎，有兩個男人喺度嘛~」
Roy笑道﹕「唔怕唔怕，我多多都食得哂！」
我心中大駡﹕『你以為小惠講緊女呀？多多都食得哂？』
然後他又道﹕「係呢，Samuel你讀邊科㗎?」
『調理農務系呀！問問問！』
「哦？我讀Account㗎。」
「咁Fiona你呢？」
「我同小惠一樣讀Econ㗎。」
Roy訝道﹕「原來你都係讀Econ㗎?咁你識唔識Gary呀？佢都係讀Econ㗎喎。」
Fiona點了點頭﹕「識呀，佢上個sem同過我一group一齊做project。」
Roy露出恍然大悟狀﹕「哈，個世界真係細喎，佢係我個friend呀~」
我好像想到一些東西，但又隱隱約約抓不住，到底是甚麼呢？
我想了一會，不得要領，心想還是先解決小惠和Roy約會的事吧。
於是我開口問﹕「係呢，你哋去完街嚟呀？」
Roy答道﹕「我哋諗住食完飯去睇戲。」
『睇戲?仲要睇戲?食完飯都八點幾啦！睇完咪成十點十一點?』
我有點不自在﹕「哦?睇咩戲呀?」不會是那些可以乘機摟著女伴的恐怖片吧?
小惠道﹕「跳舞片。」然後在電話找了trailer給我們看。
還好只是有關跳舞的戲，應該沒甚麼事會發生吧。
Roy問﹕「咁你哋又去完邊呀?」
Fiona看著小惠愉快道﹕「我哋頭先去咗濕地公園，之後去咗下白泥睇日落呀！」
小惠有點反應不過來﹕「哦...哦係呀......好...好浪漫喎......」
Fiona臉紅起來，沒有回答。
我解窘道﹕「咁啱順路，時間又啱，咪去睇下囉。」
Roy大有深意的看了我一眼，我突然記起剛才想到的東西了！
『呀Roy個friend唔通就係上次canteen嗰個?』
我在打量著這個可能性有多大時，只聽見Fiona向他們道﹕「你哋下次都去嗰度睇日落呀！真係好靚呀！」
Fiona你幹甚麼?為甚麼要推薦給他們?他們只是普通朋友啊?
正當我不知所措時，Roy已經道﹕「好喎！咁我哋搵次去囉！」他這一句是對小惠說的。
誰知小惠竟然微笑道﹕「好呀。」
小惠你幹甚麼?不是跟你說Roy不是好人嗎?今天去看戲就算了，怎麼還要答應跟他去看甚麼鬼日落?
接著Fiona跟小惠邊吃邊談，不時發出格格嬌笑，我和Roy在旁邊只是有的沒的搭訕著。
吃過晚餐，小惠跟Roy去了看戲，我默默的看著他們離開，思如潮湧。
「走囉。」Fiona拍一拍我。
「哦。」我跟在Fiona身後離開。
我們靜靜的在商場走著，Fiona突然間問我﹕「咁靜嘅?諗緊咩呀?」
我在想甚麼?我也不知道。這刻，我的思緒有點亂。
「無咩呀......我送你返屋企啦。」
「嗯。」Fiona點了點頭。
又到了初遇小惠的地方，Fiona跟我道﹕「你送到呢到得啦。」
怎麼又是走到這裏就行人止步?Fiona你家門口養了只老虎嗎?
我沒有想太多，因為我已經被小惠和Roy的事搞得心煩意亂。
「哦，咁你自己小心啲啦，你返到屋企話聲我知啦。」
Fiona點頭道﹕「嗯，你自己都小心啲啦，拜拜。」
「拜拜~」
看著Fiona沿著斜路離開，我有點依依不捨。看了一會，我還是轉身離開了。
『今晚要點樣問小惠佢同呀Roy啲嘢呢?質問佢?以佢嘅性格肯定唔會采我，盞嗌交收場。扮唔覺意咁問?定係直情唔理佢呢?』
我走著想著，想起了答應買榴槤雪糕給小惠，於是我走到TASTE，希望可以找到。
我站在超市裏的雪櫃前，尋找著榴槤雪糕，褲袋中的電話響起了。
「我返到屋企啦，你呢?」我看著Fiona的訊息，心裏甜甜的。
「就返到啦」
「咁你返到去話我知啦」
「好呀」
和Fiona好像越來越像情侶了，看來和她只差最後一步，是時候表白嗎?還是先詢問一下小惠吧，畢竟她比我有辦法。
找來找去還是找不到榴槤雪糕，我想了想，決定到九龍城一趟，心想就算找不到榴槤雪糕，也可以找到其他榴槤甜品吧。
之後到了九龍城，還是找不到榴槤雪糕，結果我買了好幾款榴槤甜品作補償，希望小惠不會介意吧。
********************************************************************************************************************
跟呀Roy看完戲，我拒絕了他吃宵夜的邀請，獨自坐小巴回宿舍。
坐在車上，我在想剛才吃飯的事。
他們...他們竟然去了看日落......Fiona是故意說給我知道嗎?而且還建議我和呀Roy去看，她明明知道我對呀Roy沒興趣的，為甚麼?......她是要讓我知道她現在和呀鋒很好嗎?又讓呀鋒以為我跟Roy會有甚麼嗎?我想不透。我很想告訴Fiona，我不會和呀鋒在一起的，請你放心，而且呀鋒的確很喜歡你，若你願意的話，請快點讓他牽著你的手，那我就可以快點離開......
下了車，看著遠方的宿舍飯堂，還有一對對的學生情侶在互相餵著甜品，令我的心酸了起來。我忍著淚水走到房間前，深深吸了一口氣，將淚水壓回肚子裏，然後打開了門。
「我返嚟啦。」我對著房中大喊。
沒人?呀鋒到哪裏了?還在跟Fiona約會嗎?
我將手袋丟到書桌上，眼角瞥到了一張字條貼了在書桌面。
「打開雪櫃，有你鐘意嘅嘢。呀鋒」
甚麼嘛?我喜歡的東西?是甚麼?
我打開了雪櫃，發現了一堆外賣盒，上面還貼有另一張字條。
「對唔住呀，搵唔到榴槤雪糕呀，粗粗地食住呢啲先啦~」
我打開外賣盒，發現有榴槤班戟、榴槤布丁、榴槤糯米糍、榴槤水晶撈、榴槤奶凍還有榴槤奶昔，看樣子是從九龍城不同的甜品店買來的。
我的眼眶迅間填滿了喜悅的淚水。
這個臭傢伙還記得我嗎?他不是有了Fiona就夠了嗎?想...想不到他還記得要買給我......
嘩啦...嘩啦...浴室傳來水聲，他在洗澡嗎?
我按捺不住內心的感動，打開了廁所的門。
「係咪呀鋒呀?」我小聲問道。
我有點難為情，畢竟第一次要跟他說謝謝。
「嗯?」水聲中傳來男子的回答聲。
「我想講...想話呢......好多謝你呀......」我越說聲音越小，難為情得低下了頭。
「吓?...你...講咩話?」夾雜在水聲中的回答聲同樣很朦朧，呀鋒他聽不清楚嗎?
想起要再說一遍，我連耳根都紅透了。算了，豁出去了！
我大喊﹕「呀鋒，我話好多謝你呀！真係好多謝你呀！我好鐘意呀！」
水聲霍地停止，只剩下水滴在地板上的聲音。我緊張了起來。
「係咪小惠呀?呀Sam佢落咗六樓同樂言打機喎。」呀君的聲音從浴室裏傳出來。
「呀！」砰！
我驚叫一聲，滿臉通紅的關掉廁所門，逃回房間。
我挨著門，掩著發燙的臉龐，心裏噗嗵噗嗵的亂跳。
死人陳洛鋒！害我出了這麼一個醜，看我怎樣對付你！
「乞嚏！......」這時候Samuel打了一個大噴嚏。
********************************************************************************************************************
********************************************************************************************************************
我看著Sam剛剛發給我的合照，不禁臉紅耳赤。想起那個大叔，真是的，不是要Sam搭著我肩膊，就是要我挽著Sam的手臂，叫人多難為情......不過因為他，我們才有這幾張親密的合照吧?
我看著看著，偷偷的笑了起來，又想起了夕陽下Sam的背影，和他暖暖的頸巾，還有他「埋嘴」的趣怪模樣...嘻...我又忍不住笑出來了。
他是喜歡我吧?
想到這裏，我又想到了他對小惠奇怪的態度。他為甚麼要中途偷偷發訊息給小惠，還騙我說是媽媽呢?他到底跟小惠說些甚麼?害得我剛才吃飯時耍了點手段，那時候突然就控制不住自己，說了那些話......而且當小惠和呀Roy走了後又顯得心緒不寧，呀Sam你到底在想甚麼?
********************************************************************************************************************