她是我的青梅竹馬…(已實體上市): 第二十三章
「早晨。」
星期一，在早上出門口回校之際，碰見在隔壁出來的詩雨。
應該說，是我刻意去碰她。
「早晨。」她回應，眼神有點閃縮。
「你嗰晚，做咩拒絕個學長？」我問她。
對，她拒絕了陳山軍學兄的告白，原因不明，我正在打聽。
「呃……呃……」她有點答不上話來。
「其實佢幾好吖！人又高，又叫係幾靚仔，仲要係社長添！」我嘗試誘導她回答我的問題。
「你覺得佢好好咩？」她反問我。
「係呀，算叫係唔錯啦，聽講佢成績都幾好添！」
「嗯……」
「你覺得佢唔好咩？」我再問。
「唔係呀……佢幾好吖……人又nice，又有禮貌……」
「咁你做咩唔應承佢？」
「呃……呃……」
又回到原點。
踏出大廈大堂，有點冷。
畢竟都十二月了。
「哇，好凍……今日凍左咁多嘅……」詩雨說。
「凍呀？上去著多件衫先返學啦！我等埋你喇！」
「唔啦，廢事一陣遲到……」
「咁一係，披住我呢件先？」我把我的開胸冷衫脫下來遞給她。
而我只剩一件冬季長袖校服，和一件背心底衫……
好冷呀……
「唔使啦！你唔凍咩？你自己著返啦！」
「我有少少熱添，晏就回暖你先俾返我啦，依家咁凍你就披住先啦！」
「哦……唔該……」
「係呢，點解你唔應承學長既？唔講得架？」
「你做咩成朝都咁問嘅？乜你好想我同佢一齊咩？」她竟然拋出這個問題，殺我一個措手不及……
「呃……呃……無呀，問下之嘛……」
「咁即係想定唔想？」
「呃……呃……」我像她一樣變得語塞。
「想定唔想？」她停下來，定晴看向我。
「唔想！」我斬釘截鐵地說。
「呢個咪原因囉！傻佬！」詩雨先是踏出一步，再轉過頭來笑嘻嘻地說。
那即是怎樣？
那算是答了我的問題？
「行快啲啦！遲到喇！」她在前方催促我。
「詩雨，我鍾……」就在我快將衝口而出說出我喜歡她的時候。
「跑喇，要遲到喇！」王屎華不知在哪一條馬路跑過來，並牽扯著詩雨的背包。
詩雨就這樣被他拉走。
而我，再次把自己的一肚疑問藏了起來。
如果我不想就是你拒絕他的原因，那麼為什麼你會知道我不想？如果我不想就是你拒絕他的原因，那麼是因為你喜歡我嗎？如果我不想你就不想，那麼，我想你和他一起，你亦會這樣想嗎？
我不解。
在那個愛尋根究底的年齡中，我壓根就沒意會過詩雨的種種暗示……或者有，但其後卻不斷尋找能反駁自己推想的線索，只要找到丁點，就會把一切之前想出來的都推翻……
結果錯過了一次，又一次。
翌日，我請了病假。
原因是我感冒，發高燒。
再詳盡點的原因是因為我把外套借了給詩雨，導致我著涼，才會發燒感冒。
而這個原因則導致放學後，詩雨來到我家探望我。
在這裡略略交代一下我的家庭背景。
我是獨生子，爸爸是生意人，經常在內地談生意；媽媽則是極典型的家庭主婦，閒時沒事幹就去打三兩圈麻雀，再不就是和一眾師奶朋友去參加一日遊。
就在今天，爸爸去了上海談生意；而媽媽，去了參加大澳一日遊。
即是說，在家的數面牆壁和一個天花下，只有我和詩雨二人。
「水水你無事嘛？哇好熱！」詩雨摸著我的額頭說。
雖然我們是隔離鄰舍，但因為那兩年空白的關係，中四以來我們都沒有一起相約上學的習慣。
不知怎的，她今天卻在我家門口等了起來。
可是我已經病得不醒人事。
鼻涕就像馬桶的沖廁水一樣，沖了又來，沖了又來……
當我有意識的時候，已經是聽到詩雨按我家門鈴的時候。
給她開門的，是我媽。
「伯母你好，請問阿渢佢係唔係出咗門口喇？」
「你嚟得啱喇！渢仔佢病到五顏六色呀！個死佬又上咗去傾生意！我又約咗班阿太去一日遊，比晒錢架喇嘛！你放學就過嚟幫我睇住佢啦！麻煩晒你喇！」我媽一口氣說，根本沒有給詩雨搭嘴的空間，更沒有徵詢過她的意見。
「哦好呀！我會睇住佢架喇！伯母放心去玩啦！」詩雨有禮地回答。
我都幾歲了……還是要人照顧的年紀嗎？
「水水我返學先喇！一陣放學再嚟睇你啦！」詩雨向著屋內大喊。
然後等到她放學，就是現在眼前的情景了。
如果按照正常的步速，她應該沒這麼早回到家的。
聽她說話還有一點喘，應該是跑過了吧……
傻瓜……
「我無事呀，你返過去啦……唔使理我……」
「你點會無事呀！個額頭咁鬼慶！一定係尋日因為借件外套俾我，之後冷親啦……對唔住呀……你食咗藥未架？再燒落去真係要去睇醫生架喇！」
「我……今朝食咗……」
「今朝食咗？依家都過左咁多個鐘，你仲未食第二次藥？你瞓一陣先啦，我煮個麵俾你填填肚再食藥！」
「詩雨！」我叫住她。
「你乖乖地瞓一陣先啦，唔好叫我返過去呀！」她說完後把嘴鼓起來，再叉一叉腰，裝作強勢。
「唔係呀……乜你識煮嘢食嘅咩……」
「黃水水！病咗都要玩我！」
其實我是認真想問……她到底會不會煮……因為我對食有一定要求，不會胡亂進食難吃的東西……
結果她端出一碗香氣四溢的腸蛋麵，把我的憂慮擊退。
煎得恰到好處的腸仔，半生熟的雞蛋，和過了冷河極具彈性的麵條……堪稱完美的腸蛋麵！
她將來，一定是個好妻子……
那是我人生中一碗最難忘的腸蛋麵。多年後，詩雨向我宣佈她的婚訊後，我在頹靡不振之際認識了一位叫詩晴的女生，她同樣泡製了一碗腸蛋麵給我吃，不過是黑暗料理類的。但這卻成為了我，想留住她的原因…